ព័ត៌មានជាតិ

ទាហានមួកខៀវកម្ពុជាម្នាក់ វិជ្ជមានកូវីដ-១៩ ក្រោយត្រឡប់មកពីបំពេញបេសកកម្មនៅប្រទេសស៊ូដង់ខាងត្បូង

បានផុស

៤ years មុន

នៅ

ថ្ងៃសុក្រ ៣០ តុលា ២០២០

ដោយ

ក្រសួងសុខាភិបាល បានប្រកាសនៅព្រឹកថ្ងៃទី៣០តុលានេះថា ទាហានមួកខៀវកម្ពុជាយើងម្នាក់ ធ្វើតេស្តវិជ្ជមានកូវីដ-១៩ ក្រោយពីត្រឡប់មកពីបំពេញបេសកកម្ម ក្រោមឆត្រអង្គការសហប្រជាជាតិវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួង បញ្ជាក់ថា បុរសជនជាតិខ្មែរអាយុ៥១ឆ្នាំម្នាក់ មានអាសយដ្ឋានស្នាក់នៅខណ្ឌទួលគោក រាជ ធានីភ្នំពេញ ជាមន្ត្រីផ្នែកប្រតិបត្តិការរបស់អង្គការសហប្រជាជាតិប្រចាំបេសកកម្មនៅ South Sudan (UNMISS) បានធ្វើដំណើរមកពីប្រទេសស៊ូដង់ខាងត្បូង បន្តជើងហោះហើរនៅប្រទេសគុយបា មកបន្តជើងហោះហើរនៅប្រទេសអេត្បូពី (Ethiopia) រួចបានបន្តជើងហោះហើរនៅប្រទេសកូរ៉េខាងត្បូង មកដល់កម្ពុជា កាលពីថ្ងៃទី២៨ ខែតុលា ឆ្នាំ២០២០។ លទ្ធផលធ្វើតេស្តវត្ថុសំណាករបស់បុគ្គលនេះ គឺវិជ្ជមានវីរុសកូវីដ-១៩ ដែលផ្តល់ដោយវិទ្យាស្ថានប៉ាស្ទ័រកម្ពុជា រាជធានីភ្នំពេញ ហើយបច្ចុប្បន្ន អ្នកជំងឺត្រូវបានដាក់ឲ្យសម្រាកព្យាបាលនៅមន្ទីរពេទ្យ មិត្តភាពខ្មែរ-សូវៀត។

ក្រសួងសុខាភិបាល អះអាងថា អ្នកដំណើរតាមយន្តហោះជាមួយអ្នកជំងឺខាងលើ សរុបមានចំនួន៨៧នាក់ (ស្រី២៥នាក់ កុមារ០៤នាក់ ទារក០១នាក់ និងបុរស៥៧ នាក់) ដែលក្នុងចំនួននេះ មានអ្នកជំងឺខាងលើនេះផងដែរ។

រីឯអ្នកដំណើរចំនួន៨៦នាក់ទៀត ដែលមានលទ្ធផលតេស្ត អវិជ្ជមានវីរុសកូវីដ-១៩ នោះ ត្រូវបានដាក់ឲ្យធ្វើចត្តាឡីស័កចំនួន១៤ថ្ងៃ នៅវិទ្យាល័យពោចិនតុងចំនួន២៤នាក់ សណ្ឋាគារមួយ ក្នុងរាជធានីភ្នំពេញចំនួន១៤នាក់ , សណ្ឋាគារមួយទៀតក្នុងរាជធានីភ្នំពេញចំនួន០៣នាក់, សណ្ឋាគារមួយទៀត ក្នុងរាជធានីភ្នំពេញចំនួន៤៣នាក់ និងសណ្ឋាគារមួយផ្សេងទៀតក្នុងរាជធានីភ្នំពេញចំនួន០២នាក់។

សូមបញ្ជាក់ថា គិតមកដល់ម៉ោង៧ព្រឹក ថ្ងៃទី៣០ ខែតុលា ឆ្នាំ២០២០ នៅទូទាំងប្រទេសកម្ពុជា រកឃើញអ្នកឆ្លងជំងឺកូវីដ-១៩ សរុបចំនួន២៩១នាក់។ ក្នុងនោះ២៨៣នាក់ ត្រូវបានព្យាបាលជាសះស្បើយ និង៨នាក់ កំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត ក្នុងរាជធានីភ្នំពេញ ( បុរសជនជាតិខ្មែរ៤នាក់ ស្ត្រីជនជាតិខ្មែរម្នាក់ បុរសជនជាតិប៉ូឡូញម្នាក់ បុរសជនជាតិបារាំង ម្នាក់ និងស្ត្រីជនជាតិបារាំងម្នាក់ )៕

អត្ថបទ ៖ កោះកែវ

Related Topics:កូវីដ-១៩