អ្នកដាំផ្ទី​ ស នៅឃុំក្រាំងអំពិលថា មិនខ្វះម៉ូយទិញ ដោយសារការដាំប្រើតែជីធម្មជាតិ

ម្ចាស់ចំការដាំផ្ទី ស បាននិយាយថា ពួកគាត់ដាំផ្ទីសដោយប្រើប្រាស់តែជីធម្មជាតិត្រូវបានម៉ូយចុះមកទិញដល់ចំការ គឺខ្វះតែបន្លែផ្ទីលក់ឲ្យប៉ុណ្ណោះ។

លោក គឿង វ៉ាង ក្នុងវ័យ៥៦ឆ្នាំ ជាម្ចាស់ចំការរស់នៅភូមិស្រែផ្ស ឃុំក្រាំងអំពិល ស្រុកសំរោងទង ខេត្តកំពង់ស្ពឺ បានឲ្យដឹងថា បន្លែផ្ទី ស របស់លោក គឺប្រើតែជីលាមកលាយនឹងដើមកន្ទ្រៀងខែតយកមកស្រោចពីលើដោយពុំបានប្រើជីគីមីដែលលូតលាស់លឿន ប៉ុន្តែប៉ះពាល់សុខភាពដល់អ្មកទិញយកទៅពិសារខ្លាំងណាស់។ ចំណែកបន្លែដែលប្រើប្រាស់ជីធម្មជាតិថ្វីត្បិតតែមានសត្វដង្កូវសុីស្លឹកបន្តិចបន្តួចក្តី តែម៉ូយចុះមកប្រមូលទិញដោយមិនសូញសាញពីតម្លៃនោះទេ។ ម្យ៉ាងទៀតបន្លែរបស់កសិកនៅឃុំក្រាំងអំពិលនេះ មិនសូវខ្វះព្រោះកសិកនាំគ្នាដាំជាបន្តបន្ទាប់មិនឲ្យសល់ដីទំនេឡើយ។

ម្ចាស់ចំការរូបនេះបន្ថែមថា ចំពោះតម្លៃវិញ គឺផ្ទីស១គីឡូក្រាមថ្លៃ២៥០០រៀល ចំណែកឈ្មួញនាំយកទៅបោះឲ្យម៉ូយលក់រាយតាមផ្សារមិនក្រោម៣៥០០រៀលនោះឡើយ។

អ្នកដាំបន្លែនៅឃុំក្រាំងអំពិលអំពាវនាវឲ្យអ្នកចំការទាំងអស់ ប្រើប្រាស់ជីធម្មជាតិទៅទើបមិនប៉ះពាល់ដល់សុខភាពអ្នកយកទៅពិសារហើយជីធម្មជាតិគឺងាយរកបំផុត៕

អត្ថបទ៖ នរា