ស្លាកគណបក្សភ្លើងទៀន ត្រូវបានអតីតសមាជិក ទម្លាក់ចោលជាបន្តបន្ទាប់ព្រោះអស់ជំនឿ

គ្រួសារអតីតសកម្មជនបក្សភ្លេីងទៀនចំនួន ៣ គ្រួសារ ក្នុងឃុំកងតាណឹង ស្រុកកងមាស ខេត្តកំពង់ចាម បានសម្រេចចិត្តទម្លាក់ស្លាកគណបក្សភ្លេីងទៀនពីមុខផ្ទះចោល ខណៈពួកគេអស់ជំនឿលេីកការដឹកនាំរបស់មេបក្សគឺលោក សម រង្សី ដែលតែងតែរត់ចោលស្រុក។

ជាក់ស្ដែងនៅព្រឹកថ្ងៃទី២៣ ខែមិថុនា ឆ្នាំ ២០២៣ ម្ចាស់ផ្ទះឈ្មោះ យុ ផន អាយុ៨១ឆ្នាំ, លោក សម្រង់ អៀង អាយុ៤០ឆ្នាំ, លោកស្រី យាំ ស្រីពៅ អាយុ៤៣ឆ្នាំ និងលោក សុខ ពិសិដ្ឋ អាយុ៣៧ឆ្នាំ រស់នៅក្នុងភូមិ១ ឃុំកងតាណឹង បានសម្រេចចិត្តដកស្លាកគណបក្សភ្លេីងទៀនចេញពីមុខផ្ទះ។

ម្ចាស់ដែលមានស្លាកពីមុខផ្ទះ និងជាសកម្មជនបក្សភ្លេីងទៀនក៏បានសម្រេចចិត្តលាលែងពីបក្សមួយនេះ។  ម្ចាស់ផ្ទះឈ្មោះ ភឿន ផៃ អាយុ៥៣ មានប្រពន្ធឈ្មោះ ឡាច មី អាយុ៤៤ឆ្នាំ រួមនឹង២នាក់ លោក សុខ សេងច័ន្ទ និងលោកស្រី ផាត់ សុខភ័ស្ភ អាយុ២០ឆ្នាំ រស់នៅក្នុងភូមិ៣ ឃុំកងតាណឹង។

ចំណែកលោកស្រី សម្បត្តិ មករា អាយុ៣២ឆ្នាំ លោក ស្រី ចេង សុភា អាយុ៣៣ឆ្នាំ និងលោក សុខ ម៉េង អាយុ៣៩ឆ្នាំ រស់ក្នុងភូមិ៤ ឃុំកងតាណឹង នៃស្រុកកងមាស ក៏នាំគ្នាដកស្លាកគណបក្សភ្លេីងទៀនពីមុខផ្ទះចោលផងដែរ ដោយបានបញ្ជាប់ថា ពួកគាត់អស់ជំនឿជឿមេដឹកនាំបោកប្រាសទៀតហេីយ។ ដោយមកចូលរួមជីវភាពនយោបាយជាមួយគណបក្សប្រជាជនកម្ពុជា៕

អត្ថបទ៖ ឡេក ចាន់ពេជ្រ