សម្ដេចតេជោ ហ៊ុន សែន ៖ រាជរដ្ឋាភិបាល នឹងយកចិត្តទុកដាក់ផងដែរ ទៅលើការរៀបចំឲ្យមានសមាគមកសិករ

សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា បានគូសបញ្ជាក់ថា រាជរដ្ឋាភិបាល នីតិកាលទី ៧ ដែលដឹកនាំដោយគណបក្សប្រជាជនកម្ពុជា នឹងយកចិត្តទុកដាក់ផងដែរ ទៅលើការរៀបចំឲ្យមានសមាគមកសិករ។

ការគូសបញ្ជាក់របស់សម្ដេចតេជោ ហ៊ុន សែន បានធ្វើឡើងគ្រាដែលគណបក្សប្រជាជនកម្ពុជា នៅព្រឹកថ្ងៃទី ១ ខែកក្កដា ឆ្នាំ ២០២៣នេះ បានរៀបចំពិធីជួបជុំសមាជិក-សមាជិការបស់ខ្លួនជាង ៧ម៉ឺននាក់ ដើម្បីបើកយុទ្ធនាការឃោសនាបោះឆ្នោត និងអបអរសាទរខួបអនុស្សាវរីយ៍លើកទី ៧២ ថ្ងៃកំណើតរបស់គណបក្សប្រជាជនកម្ពុជា។

សម្ដេចតេជោ ហ៊ុន សែន បានថ្លែងថា កម្មវិធីនយោបាយរបស់គណបក្សប្រជាជនកម្ពុជា ត្រង់ចំណុចទី ៦ សម្រាប់យកទៅអនុវត្តក្នុងរាជរដ្ឋាភិបាល អាណត្តិទី ៧ គឺការរៀបចំចាត់បញ្ជូនមន្ត្រីបច្ចេកទេស ផ្ដល់សេវាកម្មឲ្យបានគ្រប់ឃុំទាំងអស់នៅទីជនបទ ទូទាំងប្រទេស ដើម្បីជំរុញលើកកម្ពស់ផលិតភាពកសិកម្ម និងជួយដល់គ្រួសារកសិករ និងការលើកស្ទួយផលិតផលកសិកម្មផងដែរ។

សម្ដេចតេជោ ហ៊ុន សែន ថ្លែងបន្តថា «ក្នុងចំណុចកសិកម្មនេះ ខ្ញុំក៏សូមបញ្ជាក់ផងដែរថា រាជរដ្ឋាភិបាល នីតិកាលទី ៧ ក៏នឹងយកចិត្តទុកដាក់ផងដែរ ទៅលើការរៀបចំឲ្យមានសមាគមកសិករ នៅតាមទីជនបទ ដើម្បីរក្សានូវកម្លាំងរបស់កសិករ ក្នុងការផលិត ក៏ដូចជាការតថ្លៃជាមួយនឹងអ្នកទទួលទិញ»៕