Liverpool យក​បាន Szoboszla ជំនួស Mason Mount ដើម្បី​រដូវ​កាល​ថ្មី

ក្លិបហង្សក្រហម Liverpool ​កាល​ពី​ថ្ងៃ​ទី​២ ខែ​កក្កដា បាន​ប្រកាស​ពី​ការ​ចុះ​កុងត្រា​យកខ្សែ​បម្រើ​ Dominik Szoboszlai សញ្ជាតិ ហុងគ្រី វ័យ២២​ឆ្នាំ​របស់​ក្លិប RB Leipzig ក្នុងតម្លៃផ្ទេរ​ ៦០ លានផោនក្នុងកិច្ចសន្យារយៈពេល៥ឆ្នាំ បន្ទាប់​ពី​គោល​ដៅនាំយកកីឡាករ Mason Mount ពីក្លិបតោខៀវ Chelsea ​មិន​បាន​សម្រេច។

Szoboszlai ជាកីឡាករខ្សែបម្រើទី​២ បន្ទាប់ពី Liverpool បាន​ចុះហត្ថលេខានាំយកខ្សែបម្រើសញ្ជាតិអាហ្សង់ទីន Alexis Mac Allister ពីក្លិប Brighton ក្នុងតម្លៃ ៣៥ លានផោន។ កីឡាករ Szoboszlai នឹងពាក់អាវលេខ៨ជំនួស​កីឡាករ Naby Keïta ដែលបានផ្លាស់ទៅក្លិប Werder Bremen។

ខ្សែមប្រើប្រយុទ្ធ Szoboszlai បង្ហាញខ្លួនឲ្យ RB Leipzig បានចំនួន ៦២ ប្រកួតដោយស៊ុតបញ្ចូលទីបាន១២ គ្រាប់ និង​បង្ហាញ​ខ្លួន​ឲ្យ​​ក្រុមជម្រើសជាតិ​ហុងគ្រី​៣២​ប្រកួតដោយស៊ុតបញ្ចូលទីបាន៧គ្រាប់។ រូប​គេ​ជាសមាជិកមួយ​រូប​ដែល​បាន​ជួយក្លិប RB Leipzig ឈ្នះពានរង្វាន់ German Cup ២រដូវកាលជាប់គ្នា។

លោក Jürgen Klopp គ្រូបង្វឹករបស់ក្លិប Liverpool បាននិយាយថា៖ «ខ្ញុំច្បាស់ណាស់ថា Szoboszla ជាកីឡាករវ័យក្មេងនៅពេលបច្ចុប្បន្ននេះ។ ចាប់តាំងពី​បានផ្ទេរទៅក្លិប Leipzig រូបគេធ្វើបានយ៉ាងល្អក្នុងលីគ Bundesliga និងជម្រើសជាតិហុងគ្រី»។

សម្រាប់ការ​ត្រៀម​រដូវកាលថ្មី លោក Jürgen Klopp បាននាំយកខ្សែបម្រើ​២​រូប​​គឺកីឡាករ Dominik Szoboszla និង Alexis Mac Allister មកដើម្បីពង្រឹងតំបន់បម្រើឲ្យកាន់តែមានភាពល្អប្រសើរឡើងដើម្បីប្រកួតប្រជែងនៅរដូវកាលថ្មី៕

ប្រែ​សម្រួល៖ ផា រតនា