សមាជិកព្រឹទ្ធសភា នឹងមិនបោះឆ្នោតឲ្យបក្សភឿថៃធ្វើជានាយករដ្ឋមន្ត្រីដាច់​ខាត បើបក្សលោក Pita នៅតែស្ថិតក្នុងក្រុមចម្រុះ

សមាជិកព្រឹទ្ធសភាថៃជាច្រើនរូបបានប្រកាសកាលពីថ្ងៃចន្ទថា ពួកគេនឹងមិនបោះឆ្នោតឲ្យបេក្ខជនមកពីគណបក្សភឿថៃធ្វើជានាយករដ្ឋមន្ត្រីនៅក្នុងការបោះឆ្នោតសភារួមគ្នានាថ្ងៃព្រហស្បតិ៍ ទី២៧ ខែកក្កដានេះឡើយ ប្រសិនបើគណបក្សចលនាឆ្ពោះទៅមុខរបស់លោក Pita Limjaroenrat នៅតែជាផ្នែកមួយនៃក្រុមចម្រុះ ។

ទន្ទឹមនោះ សមាជិកព្រឹទ្ធសភាក៏បានប្រាប់ទៅដល់គណបក្សភឿថៃ កុំឲ្យបញ្ជូនក្រុមការងារដែលដឹកនាំដោយសមាជិកសភាលោក Suriya Juangroongruangkit មកបញ្ចុះបញ្ចូលសមាជិកព្រឹទ្ធសភាដែលតែងតាំងដោយយោធា ឲ្យបោះឆ្នោតគាំទ្របក្សរបស់ខ្លួនដើម្បីបង្កើតរដ្ឋាភិបាលថ្មីផងដែរ ។

សមាជិកព្រឹទ្ធសភាលោក Seree Suwanpanont បាននិយាយថា រដ្ឋធម្មនុញ្ញថៃហាមឃាត់សមាជិកព្រឹទ្ធសភាមិនឲ្យស្ថិតនៅក្រោមការគ្រប់គ្រងរបស់គណបក្សនយោបាយណាមួយឡើយ ដូច្នេះវាគ្មានន័យអ្វីទេដែលគណបក្សភឿថៃបញ្ជូនលោក Suriya ដើម្បីបញ្ចុះបញ្ចូលសមាជិកព្រឹទ្ធសភាឲ្យបោះឆ្នោតគាំទ្រពួកគេនោះ ជាពិសេសសមាជិកព្រឹទ្ធសភានឹងរក្សាជំហរមិនគាំទ្រគណបក្សនយោបាយណាដែលស្វែងរកការកែប្រែរដ្ឋធម្មនុញ្ញធ្វើឲ្យប៉ះពាល់ទៅដល់របបរាជានិយម ឬប៉ះពាល់ដល់ស្ថាប័នសំខាន់ៗរបស់ប្រទេសនោះឡើយ ។

ដោយឡែកសមាជិកព្រឹទ្ធសភាមួយរូបទៀតគឺលោក Anusit Kunakorn បានលើកឡើងផងដែរថា គណបក្សភឿថៃគួរតែគិតគូរពីផលប្រយោជន៍ជាតិ នៅពេលសម្រេចចិត្តថាតើត្រូវបញ្ចូលគណបក្សចលនាឆ្ពោះទៅមុខនៅក្នុងក្រុមចម្រុះរបស់ខ្លួន ជាពិសេសក៏​បាន​អំពាវនាវ​ឲ្យ​អ្នក​គាំទ្រ​បក្សចលនា​ឆ្ពោះទៅ​មុខ ​ទម្លាក់​ចោល​ផែនការ​ធ្វើ​បាតុកម្មផងដែរ ​ព្រោះ​វា​នឹង​បើក​ទ្វារ​ឲ្យ​មាន​អំពើ​ហិង្សានៅក្នុងប្រទេសថៃ ។

លោក Anusit បានបន្ថែមថា សមាជិកព្រឹទ្ធសភាភាគច្រើនមានជំហររួមក្នុងការមិនគាំទ្រភាគីណាមួយដែលស្វែងរកការកែប្រែមាត្រា ១១២ នៃក្រមព្រហ្មទណ្ឌ ឬច្បាប់ប្រមាថព្រះមហាក្សត្រ ឬផ្តល់ស្វ័យភាពកាន់តែច្រើនដល់ខេត្តភាគខាងត្បូង ដែលជាគោលនយោបាយដាក់ចេញដោយបក្សចលនាឆ្ពោះទៅមុខនោះឡើយ ។

គួរបញ្ជាក់ថា នៅក្នុងការបោះឆ្នោតជ្រើសតាំងនាយករដ្ឋមន្ត្រីជុំទី១ កាលពីថ្ងៃទី១៣ ខែកក្កដា សមាជិកព្រឹទ្ធសភាភាគច្រើនមិនបានបោះឆ្នោតគាំទ្រមេដឹកនាំគណបក្សចលនាឆ្ពោះទៅមុខលោក Pita Limjaroenrat ឲ្យក្លាយជានាយករដ្ឋមន្ត្រីនោះទេ ហើយបន្ទាប់មកកាលពីសប្តាហ៍មុន សមាជិកព្រឹទ្ធសភាថែមទាំងបានសម្រេចដកសិទ្ធិលោក Pita មិនឲ្យឈរឈ្មោះក្នុងការបោះឆ្នោតជ្រើសរើសជានាយករដ្ឋមន្ត្រីជុំទី២ នាថ្ងៃទី២៧ ខែកក្កដាខាងមុខនេះផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ The Nation Thailand

ចុចអាន ៖ លោក Pita ចេញមុខនិយាយទៅកាន់ប្រជាជន ថៃ ក្រោយអស់សិទ្ធិធ្វើជា​នាយករដ្ឋមន្ត្រី