ក្រុមហ៊ុនរថយន្តអគ្គិសនី វៀតណាម កើនតម្លៃជាង ១៩១ ពាន់លានដុល្លារ និងឈរលេខ ៣ លើទីផ្សារពិភពលោក

ក្រុមហ៊ុនផលិតរថយន្តអគ្គិសនីរបស់វៀតណាម VinFast ឥឡូវនេះមានមូលធននីយកម្មទីផ្សារខ្ពស់បំផុតទី ៣ ក្នុងចំណោមក្រុមហ៊ុនផលិតរថយន្តពិភពលោក នៅពីក្រោយតែក្រុមហ៊ុន Tesla និងក្រុមហ៊ុន Toyota Motor របស់ជប៉ុនប៉ុណ្ណោះ ។

បើយោងតាមការចុះផ្សាយរបស់សារព័ត៌មាន CNBC បានឲ្យដឹងថា ភាគហ៊ុនរបស់ក្រុមហ៊ុនបានកើនឡើង ២០ ភាគរយនៅក្នុងទីផ្សារសហរដ្ឋអាមេរិកកាលពីថ្ងៃចន្ទ ហើយមូលធននីយកម្មទីផ្សារឈានដល់ ១៩១.២ ពាន់លានដុល្លារ ។

ទោះយ៉ាងណា សម្រាប់ប្រតិបត្តិការនៅសហរដ្ឋអាមេរិករបស់ក្រុមហ៊ុននេះ នៅមិនទាន់ដំណើរការពេញលេញនៅឡើយទេ ប៉ុន្តែការរីកដុះដាលនៃរថយន្តអគ្គិសនីក្នុងទឹកដីអាមេរិក នាំឲ្យវិនិយោគិននាំគ្នាប្រញាប់ប្រញាល់ទិញភាគហ៊ុនជាច្រើន ។

ទន្ទឹមនោះ យោងតាមទិន្នន័យអាជីវកម្ម FactSet បានឲ្យដឹងថា ក្រមហ៊ុន Tesla មានមូលធននីយកម្មទីផ្សារចំនួន ៧៦០ ពាន់លានដុល្លារគិតត្រឹមថ្ងៃទី២៥ ខែសីហា និងក្រុមហ៊ុន Toyota មាន ២៧០ ពាន់លានដុល្លារ។

ដោយឡែក ក្នុងចំណោមក្រុមហ៊ុនផលិតធំៗផ្សេងទៀតដូចជា BYD របស់ចិន មានតម្លៃ ៩០ ពាន់លានដុល្លារ និង Volkswagen របស់អាល្លឺម៉ង់មានតម្លៃ ៧០ ពាន់លានដុល្លារ ។

គួរឲ្យដឹងថា ក្រុមហ៊ុន VinFast បានឡើងផ្សារហ៊ុននៅអាមេរិក Nasdaq កាលពីពាក់កណ្តាលខែសីហា ហើយនៅថ្ងៃដំបូងនៃការជួញដូរ មូលធននីយកម្មទីផ្សាររបស់ខ្លួន ឡើងលើសក្រុមហ៊ុន General Motors និង Ford Motor ដែលបានបង្កើតឡើងជាយូរមកហើយនៅក្នុងទីផ្សាររបស់ពួកគេ ៕

ប្រែសម្រួល៖ នាង រតនៈ

ប្រភព៖ Nikkei Asia