សេដ្ឋកិច្ចតំបន់អាស៊ីនៅតែមានភាពរឹងមាំ ទោះ ADB ទម្លាក់ការព្យាករណ៍​កំណើន ០.១ ភាគរយក៏ដោយ

ធនាគារអភិវឌ្ឍន៍អាស៊ី (ADB) ​បានទម្លាក់ការព្យាករណ៍កំណើនសេដ្ឋកិច្ច​ ០.១ ភាគរយ ពោលពី ៤.៨ ភាគរយមកនៅត្រឹមតែ ៤.៧ ភាគរយវិញប៉ុណ្ណោះ​ ប៉ុន្តែសេដ្ឋកិច្ចនៅក្នុងតំបន់នៅតែមានភាពរឹងមាំ បើទោះបីជាកំពុងមានវិបត្តិក៏ដោយ ។

ចំពោះចិនដែលជាប្រទេសមានសេដ្ឋកិច្ចធំជាងគេនៅក្នុងតំបន់វិញ ​ត្រូវបាន ADB ទម្លាក់ការព្យាករណ៍មកនៅត្រឹម ៤.៩ ភាគរយ ខណៈការព្យាករណ៍លើកមុនគឺ ៥ ភាគរយ ។ ចំណែកប្រទេសឥណ្ឌាបានថយចុះពី ៦.៤ ភាគរយមកនៅត្រឹម​តែ ៦.៣ ភាគរយវិញ ។

ទោះបីជាតម្រូវការសកលមានការធ្លាក់ចុះក៏ដោយ ប៉ុន្តែចំពោះសកម្មភាពសេដ្ឋកិច្ចត្រូវបានអ្នកសេដ្ឋកិច្ចមើលឃើញថា កំពុងមានការស្ទុះងើបឡើងវិញ ជាពិសេសទាក់ទិនទៅនឹងវិស័យទេសចរណ៍ និងតម្រូវការក្នុងស្រុក ។

ពាក់ព័ន្ធនឹងបញ្ហានេះដែរ ADB ក៏បានលើកឡើងពីហានិភ័យចម្បងចំនួន ៣ ចំពោះទស្សនវិស័យទាំងនេះដោយរួមមាន ផលប៉ះពាល់នៃភាពទន់ខ្សោយក្នុងវិស័យអចលនទ្រព្យចិន ផលរំខានពីការផ្គត់ផ្គង់ជាហូរហែដោយសារសង្គ្រាមរបស់រុស្ស៊ីមកលើអ៊ុយក្រែន និងការទប់ស្កាត់ការនាំចេញអង្ករ ចំពេលមានហានិភ័យនៃគ្រោះរាំងស្ងួត និងទឹកជំនន់ដែលបណ្តាលមកពីបាតុភូត El Nino ។

តាមរយៈលោក Albert Park ប្រធាន​សេដ្ឋវិទូ​របស់ ADB បាននិយាយថា តំបន់​អាស៊ី​កំពុង​អភិវឌ្ឍ​​យ៉ាង​ខ្លាំង ហើយ​សម្ពាធ​អតិផរណា​កំពុង​តែធ្លាក់ចុះ ​ខណៈធនាគារកណ្តាលមួយចំនួន​នៅក្នុងតំបន់ក៏បានចាប់ផ្តើមបន្ថយអត្រាការប្រាក់ដែលនឹងជួយជំរុញកំណើនសេដ្ឋកិច្ច ៕

ប្រែសម្រួល៖ នាង រតនៈ

ប្រភព៖ BNN Bloomberg

ចុចអាន៖ តម្លៃប្រេងសាំង ពិភពលោក ធ្លាក់ថ្លៃជិត ១ ដុល្លារក្នុងមួយបារ៉ែល