សម្ដេចតេជោ៖ ក្នុងពេលពិភពលោកមានបញ្ហាសេដ្ឋកិច្ច ការឡើងប្រាក់ខែជារឿងល្អ  តែត្រូវខំរក្សា និងបង្កើតការងារថ្មី

សម្ដេចតេជោ ហ៊ុន សែន ប្រធានក្រុមឧត្ដមប្រឹក្សាផ្ទាល់ព្រះមហាក្សត្រ និងជាប្រធានគណបក្សប្រជាជនកម្ពុជា បានថ្លែងតាមរយៈបណ្ដាញសង្គមតេឡាក្រាម នារាត្រីទី០២ ខែតុលា ឆ្នាំ២០២៣នេះថា ក្នុងពេលពិភពលោកមានបញ្ហាសេដ្ឋកិច្ច នៅក្នុងពេលវេលាដ៏លំបាកបែបនេះ    ការឡើងប្រាក់ខែជារឿងល្អ ក៏ប៉ុន្តែ កម្មករ កម្មការនីត្រូវខំរក្សាការងារធ្វើផង និងបង្កើតការងារថ្មីផង។

សម្ដេចបានថ្លែងក្នុងន័យដើមថា “នៅក្នុងសភាពការណ៍ដែលសេដ្ឋកិច្ចពិភពលោកកំពុងប្រឈមជាមួយនឹងការធ្លាក់ចុះ។ ការដំឡើងបានបៀវត្តន៍ជូន កម្មករ-កម្មការិនី គឺជារឿងល្អ តែអ្វីដែលសំខាន់ជាងទៀត នៅក្នុងពេលវេលាដ៏លំបាកនេះ គឺត្រូវខិតខំរក្សាការងារធ្វើផង និងបង្កើតការងារថ្មីផង”។

បន្ថែមពីនេះ សម្ដេចតេជោ បានអបអរសាទរជាមួយរាជរដ្ឋាភិបាល កម្មករ-កម្មការិនី ក៏ដូចជាស្ថាបន័ពាក់ព័ន្ធដែលរក្សាបាននូវចំណុចសំខាន់៣គឺ៖ ទី១៖ ដំឡើងបានបៀវត្តន៍ទោះច្រើនក្តីតិចក្តី ទី២៖ រក្សាបានការងារធ្វើ ទី៣៖ បង្កើតបានការងារថ្មី។ សម្ដេចតេជោ ហ៊ុន សែន បានចាត់ទុកការឡើងបៀវត្សរ៍ឡើងតិចតួចនេះថាជារឿងល្អ ព្រោះបានបៀវត្សរ៍តិចប្រសើរជាងបាត់បង់ការងារធ្វើ ដែលនឹងបាត់បង់ប្រាក់ចំណូលទាំងស្រុង៕