មន្ត្រីជាន់ខ្ពស់ ជំរុញសិស្សថ្នាក់ទី១២ ខិតខំរៀនសូត្រដើម្បីជោគជ័យប្រឡងខាងមុខ

លោក ហេង រតនា អនុប្រធានក្រុមការងារគណៈ​ពង្រឹងមូលដ្ឋានស្រុកលើកដែក ខេត្តកណ្តាល បានណែនាំដល់សិស្សានុសិស្សថ្នាក់ទី១២ ដែលត្រូវប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) នៅឆ្នាំនេះ ត្រូវខិតខំប្រឹងប្រែងរៀនសូត្រដើម្បីទទួលបានលទ្ធផលល្អប្រសើរនាពេលខាងមុខនេះ។

ថ្លែងនៅក្នុងឱកាស​ចុះជួបសំណេះសំណាលជាមួយ លោកគ្រូអ្នកគ្រូ និងសិស្សថ្នាក់ទី១២ ដែលកំពុងរៀនបំប៉នត្រៀមប្រលងនៅ នៅថ្ងៃទី៧​ ខែតុលា នេះ នៅវិទ្យាល័យពាមរាំង​ ស្រុកលើកដែក លោក ហេង រតនា មានប្រសាសន៍ថា នៅសល់តែ ២៩ថ្ងៃទៀតប៉ុណ្ណោះ ប្អូនៗនឹងត្រូវចូលរួមប្រឡងបាក់ឌុប។ ដូចនេះប្អូនត្រូវខិតខំប្រឹងប្រែងរៀនសូត្រដើម្បីឈានឆ្ពោះទៅរកភាពជោគជ័យ ពោលគឺធ្វើយ៉ាងណាឱ្យប្រឡងជាប់។

លោក ហេង រតនា បានបន្តថា៖ “ខ្ញុំសូមថ្លែងអំណរគុណលោកគ្រូអ្នកគ្រូ​ ដែលបានចូលរួមលះបង់កម្លាំងចិត្តសម្រាប់កសាងសមត្ថភាពធនធានមនុស្សល្អ នៃសង្គមជាតិយើង។ សូមជូនពរក្មួយៗទទួលបានជោគជ័យសម្រាប់ការប្រឡងដ៏សំខាន់សម្រាប់ជីវិតយុវជន​ និងមានទំនុកចិត្តខិតខំរៀនគឺ​ ចេះ​ ជាប់។ ប្រសិនបើប្អូនៗប្រឡងជាប់និទ្ទេសល្អ និងបានទទួលរង្វាន់ល្អ​ តែប្រសិនបើប្រឡងជាធ្លាក់ ក៏មិនត្រូវបោះបង់គ្នាដែរ”។

គួរបញ្ជាក់ថា ឆ្នាំនេះ ក្រសួងអប់រំ យុវជន និងកីឡា នឹងរៀបចំការប្រឡងសញ្ញាបត្រមធ្យមសិក្សាទុតិយភូមិ នៅថ្ងៃទី៦ ខែវិច្ឆិកា និងប្រកាសលទ្ធផល នៅថ្ងៃទី២៩ វិច្ឆិកា ឆ្នាំ២០២៣៕

អត្ថបទ៖ សំអឿន