ជាលើកដំបូង រថយន្តជំនួយមនុស្សធម៌ ត្រូវបានបញ្ជូនពីព្រំដែនអេស៊ីបទៅហ្គាហ្សា

អ្នកឆ្លើយឆ្លងព័ត៌មាន AFP ឱ្យដឹងថា ឡានដឹកទំនិញដំបូង ក្នុងចំណោមរថយន្ត ២០គ្រឿងដែលដឹកជំនួយមនុស្សធម៌របស់អង្គការសហប្រជាជាតិ (UN) បានចូលទៅដល់តំបន់ហ្គាហ្សាស្ទ្រីបហើយនៅថ្ងៃនេះ។

បន្ទាប់ពីអង្គការសហប្រជាជាតិបានឱ្យស្នើដល់ប្រទេសអេស៊ីបឱ្យអនុញ្ញាតដឹកជំនួយមនុស្សធម៌តាមច្រកព្រំដែន Rafah ទៅកាន់តំបន់ហ្គាហ្សា នៅថ្ងៃសៅរ៍ ទី២១ ខែតុលា នេះ រថយន្តមនុស្សធម៌ទី១ បានចូលទៅដល់តំបន់ដែលហែកហួរដោយសង្រ្គាមមួយនេះដោយជោគជ័យ។

ប្រធានផ្នែកមនុស្សធម៌របស់អង្គការសហប្រជាជាតិ លោក Martin Griffiths បាននិយាយថា លោកមានទំនុកចិត្តថា ការដឹកជញ្ជូននេះនឹងក្លាយជាការចាប់ផ្តើមនៃកិច្ចខិតខំប្រឹងប្រែងប្រកបដោយនិរន្តរភាពក្នុងការផ្គត់ផ្គង់តម្រូវការសំខាន់ៗដល់ប្រជាជននៅតំបន់ហ្គាហ្សា ហើយលោករំពឹងថាក្បួនរថយន្តទីមួយនេះ នឹងមិនជារថយន្តចុងក្រោយដែលទៅដល់តំបន់រងគ្រោះឡើយ។

ទីភ្នាក់ងារអង្គការសហប្រជាជាតិឱ្យដឹងថា រថយន្តទីមួយនេះបានដឹកអាហារ និងការផ្គត់ផ្គង់ថ្នាំពេទ្យពីទីភ្នាក់ងារ UN ដើម្បីជួយសម្រាលទុក្ខលំបាករបស់ប្រជាជនស្លូតត្រង់នៅតំបន់ហ្គាហ្សា ដែលកំពុងឡោមព័ទ្ធដោយសង្រ្គាម។

សូមបញ្ជាក់ថា​ ចាប់តាំងពីការវាយប្រហាររបស់ក្រុមហាម៉ាស់នៅថ្ងៃទី៧ ខែតុលា ពេលនេះប្រជាជនប៉ាឡេស្ទីនជាង ៤,១០០នាក់ដែលភាគច្រើនជាជនស៊ីវិលត្រូវបានសម្លាប់នៅក្នុងការទម្លាក់គ្រាប់បែករបស់អ៊ីស្រាអែល។ នេះបើយោងតាមក្រសួងសុខាភិបាលដែលគ្រប់គ្រងដោយក្រុមហាម៉ាសរបស់ហ្គាហ្សា៕

ប្រែសម្រួល៖ សន្យា

ប្រភព៖ CNA

ចុចអាន៖ អ៊ីស្រាអែល បន្តការវាយឆ្មក់តាមអាកាសសម្លាប់មនុស្ស ៤៦ នាក់ទៀតនៅ ហ្គាហ្សា