ដឹងមូលហេតុ ដែលក្រុមហាម៉ាស់ ដោះលែងចំណាប់ខ្មាំងជាស្រ្តីវ័យចំណាស់ ២នាក់

កាលពីថ្ងៃអង្គារទី២៣ខែតុលា ក្រុមហាម៉ាស់ បញ្ជាក់ថា ខ្លួនបានដោះលែងលោកយាយ Yocheved Lifshitz និងស្ត្រីវ័យចំណាស់ម្នាក់ទៀតឈ្មោះ Nurit Cooper អាយុ៧៩ឆ្នាំ ដោយសារហេតុផលសុខភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកយាយ Lifshitz គឺជាសកម្មជនសន្តិភាព ដែលបានជួយនាំមនុស្សឈឺពីតំបន់ ហ្គាហ្សា មកទទួលបានការព្យាបាលនៅក្នុងប្រទេសអ៊ីស្រាអែល។ នេះបើតាមការបញ្ជាក់ពីចៅប្រុសរបស់គាត់។

Daniel Lifshitz បានប្រាប់ទីភ្នាក់ងារសារព័ត៌មាន Reuters ថា លោកយាយ និងស្វាមីគាត់ឈ្មោះ Oded (នៅជាប់ជាចំណាប់ខ្មាំងនៅឡើយ) បានធ្វើរឿងជាច្រើនជួយដល់ប្រជាជន ហ្គាហ្សា។

លោកនិយាយ​ថា “អ្នកទាំង២សុទ្ធសឹង​ជា​សកម្មជន​សិទ្ធិមនុស្ស សកម្មជន​សន្តិភាព​ពេញ​មួយ​ជីវិត។ អស់​រយៈពេល​ជាង​មួយ​ទសវត្សរ៍​មក​ហើយ ដែលលោកតាលោកយាយ បានជួយ​យក​ជនជាតិ​ប៉ាឡេស្ទីន​ដែល​ឈឺ​ចេញពី​តំបន់ ហ្គាហ្សាស្រ្ទីប ជា​រៀង​រាល់​សប្ដាហ៍​ ទៅ​មន្ទីរពេទ្យ​ក្នុង​ប្រទេស​អ៊ីស្រាអែល ដើម្បី​ទទួល​បាន​ការ​ព្យាបាល​ជំងឺនានាដូចជា មហារីកជាដើម”។

សូមបញ្ជាក់ អ្នកទាំងពីរត្រូវ​បានក្រុមហាម៉ាស់ ​ចាប់​ខ្លួនពី​ផ្ទះ​នៅតំបន់ ​ Nir Oz ក្នុង​អំឡុង​ការ​វាយ​ប្រហារ​ថ្ងៃ​ទី៧តុលា។

មកទល់ពេលនេះ ចំណាប់ខ្មាំងដែលក្រុមហាម៉ាស់ដោះលែង បានកើនដល់៤នាក់ហើយ បន្ទាប់ពីម្តាយកូនជនជាតិអាមេរិក ត្រូវបានដោះលែងកាលពីសប្តាហ៍មុន៕

ប្រែសម្រួល៖ Vann Vann

ប្រភព៖ SKY

ចុចអាន៖ ក្រុមហាម៉ាស់ ដោះលែងចំណាប់ខ្មាំង២នាក់ទៀត សុទ្ធជាស្រ្តីវ័យចំណាស់