អូស្រ្តាលី បញ្ជូនយន្តហោះយោធាបន្ថែមទៀត ទៅ មជ្ឈិមបូព៌ា

អូស្ត្រាលី បានដាក់ពង្រាយយន្តហោះយោធាពីរគ្រឿងបន្ថែមទៀត និងបុគ្គលិកការពារជាតិក្នុងចំនួនដ៏ច្រើន ទៅកាន់តំបន់មជ្ឈិមបូព៌ា ដើម្បីជួយគាំទ្រពលរដ្ឋរបស់ខ្លួននៅទីនោះ ប្រសិនបើសង្រ្គាមដែលកំពុងបន្តរវាងប្រទេសអ៊ីស្រាអែល និងក្រុមសកម្មប្រយុទ្ធហាម៉ាស់ ពុះកញ្ជ្រោលខ្លាំងជាងនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការវាយប្រហារឆ្លងដែនពីសំណាក់ក្រុមហាម៉ាស់ កាលពីថ្ងៃទី៧ខែតុលា បានធ្វើឲ្យអ៊ីស្រាអែលភ្ញាក់ផ្អើលយ៉ាងខ្លាំង ដោយបានសម្លាប់មនុស្សជាង១៤០០នាក់ ខណៈក្រសួងសុខាភិបាលប៉ាឡេស្ទីននិយាយថា ប្រជាជនប៉ាឡេស្ទីនយ៉ាងតិច ៥,៧៩១ នាក់ ត្រូវបានសម្លាប់ដោយការទម្លាក់គ្រាប់បែកជាបន្តបន្ទាប់របស់អ៊ីស្រាអែល ក្នុងនោះរួមមានទាំងកុមារ ២,៣៦០ នាក់ផងដែរ ។

រដ្ឋមន្ត្រីក្រសួងការពារជាតិ លោក Richard Marles និយាយថា ប្រទេសអូស្ត្រាលី បានបញ្ជូនយន្តហោះ Boeing C-17 មួយគ្រឿងនិងយន្តហោះចាក់សាំងមានសមត្ថភាពផ្ទុកអ្នកដំណើរមួយគ្រឿង នាំឲ្យចំនួនយន្តហោះសរុបដែលអូស្រ្តាលីបញ្ជូនទៅមជ្ឈិមបូព៌ាកើនដល់ ៣ គ្រឿងហើយ ។

ទោះបីជាយ៉ាងណាក៏ដោយ លោកមិនបានបង្ហាញពីចំនួនបុគ្គលិកសរុប ដែលត្រូវបានដាក់ពង្រាយ និងទីតាំងដែលយន្តហោះត្រូវឈរជើងនោះទេ ដោយសារតែហេតុផលសន្តិសុខ ប៉ុន្តែបញ្ជាក់ថា វាមិនមានទីតាំងនៅក្នុងប្រទេសអ៊ីស្រាអែលឡើយ។

សូមបញ្ជាក់ ចាប់តាំង​ពី​ជម្លោះ​​កើត​ឡើង រដ្ឋាភិបាល​អូស្ត្រាលី​បាន​ធ្វើ​ដំណើរ​​មាតុភូមិនិវត្តន៍ជាច្រើនលើក ​សម្រាប់​ពលរដ្ឋ​ដែល​ជាប់​គាំង​ក្នុង​ប្រទេស​អ៊ីស្រាអែល។ ខ្លួនក៏​បាន​និង​កំពុង​ព្យាយាម​ជួយ​សង្គ្រោះ​ជនជាតិ​អូស្ត្រាលី ៧៩ នាក់​ពី​តំបន់ ហ្គាហ្សាស្រ្ទីប និង ៥១ នាក់​ពី​តំបន់ West Bank ផងដែរ។

លើសពីនេះ ប្រទេសអូស្ត្រាលីកាលពីថ្ងៃពុធ ក៏បានបញ្ចេញកញ្ចប់យោធាថ្មីទំហំទឹកប្រាក់ ២០លានដុល្លារអូស្រ្តាលី (១២.៧លានដុល្លារ) សម្រាប់អ៊ុយក្រែនផងដែរ ដោយនាំឲ្យជំនួយសរុបរបស់ខ្លួនដល់ទីក្រុងកៀវ កើនដល់ ៩១០ លានដុល្លារអូស្ត្រាលី ចាប់តាំងពីរុស្ស៊ីវាយលុកក្នុងខែកុម្ភៈ ឆ្នាំ២០២២៕

ប្រែសម្រួល៖ Vann Vann

ប្រភព៖ CNA

ចុចអាន៖ អូស្រ្តាលី ផ្តល់ជំនួយជាអាវុធស្មើនឹងទឹកប្រាក់ ៥០លានដុល្លារអាមេរិក ដល់ អ៊ុយក្រែន