លោក ពូទីន ប្ដេជ្ញាថា នឹងធ្វើគ្រប់យ៉ាង ដើម្បីនាំសន្តិភាពទៅ​កាន់តំបន់មជ្ឈិមបូព៌ា

កាលពីថ្ងៃទី២៧ ខែមេសា លោកប្រធានាធិបតីរុស្ស៊ី វ៉្លាឌីមៀរ ពូទីន បានផ្ញើសារយ៉ាងកក់ក្ដៅ​មួយ​ទៅកាន់ពិភពលោក ជាពិសេសទៅកាន់តំបន់មជ្ឈិមបូព៌ាដែលកំពុងមានភ្លើងសង្គ្រាម។ ក្នុងកិច្ចពិភាក្សាជាមួយរដ្ឋមន្ត្រីការបរទេសអ៊ីរ៉ង់ លោក Abbas Araghchi នៅ​ទីក្រុង Saint Petersburg លោក ពូទីន បានបញ្ជាក់យ៉ាងច្បាស់ៗថា ប្រទេសរុស្ស៊ីនឹងប្រើប្រាស់រាល់លទ្ធភាពដែលមាន និងធ្វើ «គ្រប់បែបយ៉ាង» ដើម្បី​ឲ្យ​តំបន់ដែលពោរពេញដោយជម្លោះមួយនេះ អាចរកឃើញពន្លឺសន្តិភាពឡើងវិញក្នុងពេលដ៏ខ្លីបំផុត។

យោង​តាម​សារព័ត៌មាន Meduza លោក ពូទីន បានសង្កត់ធ្ងន់ថា រាល់សកម្មភាពរបស់រុស្ស៊ី គឺធ្វើឡើងដើម្បីបម្រើដល់ផលប្រយោជន៍របស់អ៊ីរ៉ង់ ក៏ដូចជាប្រជាជនទាំងអស់នៅក្នុងតំបន់។ បន្ថែមពីលើការសន្យារឿងសន្តិភាព លោក ពូទីន ក៏បានពោលពាក្យសរសើរមិនដាច់ពីមាត់ ចំពោះភាពក្លាហាន និងភាពអង់អាចរបស់ប្រជាជនអ៊ីរ៉ង់ ដែលបានតស៊ូយ៉ាងប្ដូរផ្ដាច់ ដើម្បីឯករាជ្យ និងអធិបតេយ្យភាពរបស់ខ្លួនផង​ដែរ។ លោកបានបញ្ជាក់ទៀតថា រុស្ស៊ីនៅតែរក្សាជំហរយ៉ាងច្បាស់លាស់ ក្នុងការបន្តពង្រឹងទំនាក់ទំនងយុទ្ធសាស្ត្រជាមួយអ៊ីរ៉ង់ឲ្យ​កាន់តែស្អិតរមួតខ្លាំងឡើង។

ការប្ដេជ្ញាចិត្តរបស់មេដឹកនាំរុស្ស៊ីនៅពេលនេះ បានធ្វើឲ្យ​បរិយាកាសនៃជំនួបកាន់តែមានភាពជិតស្និទ្ធ ដោយខាងភាគីអ៊ីរ៉ង់បានចាត់ទុកថា រុស្ស៊ីមិនត្រឹមតែជាមិត្តនោះទេ ប៉ុន្តែគឺជាដៃគូយុទ្ធសាស្ត្រដ៏សំខាន់បំផុតមិនអាចខ្វះបាន។

ជំនួបដ៏សំខាន់រវាងមហាអំណាចទាំងពីរនេះ បានបង្ហាញ​ឲ្យ​ឃើញនូវការរួមកម្លាំងគ្នារវាងរុស្ស៊ី និងអ៊ីរ៉ង់ ក្នុងពេលដែលស្ថានភាពពិភពលោកកំពុងស្ថិតក្នុងភាពមិនច្បាស់លាស់។ ការដែលលោក ពូទីន ចេញមុខមកធានាថានឹងធ្វើ «គ្រប់យ៉ាង» ដើម្បីសន្តិភាព មិនត្រឹមតែជាការផ្ដល់កម្លាំងចិត្តដល់អ៊ីរ៉ង់ប៉ុណ្ណោះទេ ប៉ុន្តែវាក៏ជាសញ្ញាមួយបង្ហាញទៅកាន់ពិភពលោកថា រុស្ស៊ីកំពុងបង្កើនឥទ្ធិពលរបស់ខ្លួនយ៉ាងខ្លាំង ក្នុងការសម្រេចជោគវាសនានៅតំបន់មជ្ឈិមបូព៌ា៕

ប្រែសម្រួល៖ ឈាង