លោក សេដ្ឋា អង្វរករឲ្យពលរដ្ឋថៃ នៅអ៊ីស្រាអែល វិលមកស្រុកវិញ ខណៈស្ថានការណ៍ កាន់តែយ៉ាប់យ៉ឺន

ជាថ្មីម្តងទៀត នាយករដ្ឋមន្ត្រីថៃ លោក សេដ្ឋា ថាវីស៊ីន បានអង្វរករដល់ពលករថៃទាំងអស់ឲ្យចាកចេញពីអ៊ីស្រាអែល វិលត្រលប់មកស្រុកវិញ បន្ទាប់ពីពលរដ្ឋខ្លួនបីនាក់ទៀត ត្រូវបានក្រុមសកម្មប្រយុទ្ធហាម៉ាស់ ចាប់ជាចំណាប់ខ្មាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងការបរទេស ប្រកាសកាលពីយប់ថ្ងៃអាទិត្យថា ចំនួនជនជាតិថៃដែលត្រូវបានចាប់ជាចំណាប់ខ្មាំងបានកើនឡើងពី១៩នាក់ដល់២២នាក់ បើទោះបីជាតួលេខអ្នកស្លាប់នៅតែ ៣២នាក់និងរបួស១៩នាក់ក៏ដោយ។

ថ្លែងប្រាប់អ្នកសារព័ត៌មាន មុនពេលឡើងយន្តហោះទៅប្រទេសឡាវ ក្នុងខេត្ត Udon Thani លោក សេដ្ឋា និយាយថា ជនជាតិថៃចំនួន៣នាក់ទៀត ត្រូវបានក្រុមហាម៉ាស់បញ្ជាក់ ចាប់ធ្វើជាចំណាប់ខ្មាំង ខណៈពលរដ្ឋមួយចំនួន នៅមិនទទួលបានដំណឹង។

លោក​បន្ត​ថា ការ​ធ្វើ​ដំណើរ​ជុំវិញប្រទេស​អ៊ីស្រាអែល​កាន់​តែ​លំបាក​ទៅៗ ​ហើយ​ឥឡូវ​នេះអ៊ីស្រាអែល ​បាន​ចាប់​ផ្តើម​ប្រតិបត្តិការ​ជើង​គោក​ចូល​ទៅ​ក្នុង​តំបន់ ហ្គាហ្សាស្ទ្រីប ទៀត។ ដូច្នេះ​ហើយ​ ជន​ជាតិ​ថៃ​ដែលស្ថិត​នៅ​ក្នុង​ប្រទេស​អ៊ីស្រាអែល ​គួរ​តែរកមធ្យោបាយ​ដើម្បី​វិលត្រលប់​មក​ស្រុក​វិញ​ឲ្យ​បាន​ឆាប់​តាម​ដែល​អាច​ធ្វើ​ទៅ​បាន។

ទន្ទឹមនោះលោក សេដ្ឋា បញ្ជាក់ថា ពេលនេះ ការជម្លៀស​ពលករ​ថៃ ចេញ​ពី​ទីតាំងក្បែរ​តំបន់​សង្គ្រាម​ ក៏​កាន់​តែ​មាន​ហានិភ័យ​ដែរ ហើយរដ្ឋាភិបាល​របស់​លោក​ ក៏កំពុង​បង្កើន​កិច្ច​ខិត​ខំ​ប្រឹង​ប្រែង​ក្នុង​ការ​ចរចា​ដោះ​លែង​ចំណាប់​ខ្មាំង​ថៃផងដែរ៕

ប្រែសម្រួល៖ Vann Vann

ប្រភព៖ Bangkok Post