មន្ត្រី UN ឲ្យក្រុមប្រឹក្សាសន្តិសុខងាកមើលវិបត្តិមនុស្សធម៌នៅ អ៊ុយក្រែន ផង កុំគិតតែផ្ដោតលើជម្លោះមជ្ឈិមបូព៌ា

មន្ត្រីជាន់ខ្ពស់របស់អង្គការសហប្រជាជាតិ (UN) បានអំពាវនាវដល់ក្រុមប្រឹក្សាសន្តិសុខអង្គការសហប្រជាជាតិ (UNSC) ឲ្យងាកទៅយកចិត្តទុកដាក់លើស្ថានភាពមនុស្សធម៌ដ៏ធ្ងន់ធ្ងរនៅក្នុងប្រទេសអ៊ុយក្រែនផង កុំគិតតែផ្ដោតពីជម្លោះនៅមជ្ឈិមបូព៌ាដែលកំពុងផ្ទុះឡើងរវាងអ៊ីស្រាអែល និងប៉ាឡេស្ទីន ។

លោក Ramesh Rajasingham ដែលជានាយកផ្នែកសម្របសម្រួលនៃការិយាល័យ UN សម្រាប់កិច្ចការមនុស្សធម៌ ឬ OCHA ​បាន​ប្រាប់​ក្រុមប្រឹក្សា​សន្តិសុខ​អំពី​ស្ថានភាព​ក្នុង​ប្រទេស​អ៊ុយក្រែនថា រហូតមកដល់ពេលនេះ ជនស៊ីវិលជាង ៩,៩០០ នាក់ត្រូវបានសម្លាប់នៅក្នុងប្រទេសអ៊ុយក្រែន ចាប់តាំងពីផ្ទុះប្រតិបត្តិការសឹករបស់រុស្ស៊ីកាលពីខែកុម្ភៈឆ្នាំមុនមក ។

លោក Rajasingham បាននិយាយថា “ការវាយប្រហារតាមផ្លូវអាកាស ការបាញ់កាំភ្លើងធំ និងការប្រយុទ្ធគ្នានៅលើដីគោកនៅទូទាំងប្រទេសនៅតែបន្តកើតមានជារៀងរាល់ថ្ងៃ ។ ជីវិតរបស់មនុស្សត្រូវគ្របដណ្ដប់ដោយសំឡេងស៊ីរ៉ែនប្រកាសអាសន្នពីការវាយប្រហារតាមផ្លូវអាកាសស្រោចដូចទឹកភ្លៀង និងការសម្លាប់ប្រជាជនស៊ីវិលជាដើម” ។

ទន្ទឹមនោះ មន្ត្រី UN រូបនេះក៏បានសម្តែងក្ដីព្រួយបារម្ភយ៉ាងខ្លាំងផងដែរ ចំពោះស្ថានភាពមនុស្សធម៌ដ៏ធ្ងន់ធ្ងរនៅរដូវរងាដែលក៏ខិតជិតមកដល់ ស្របពេលដែលការខូចខាត និងការបំផ្លិចបំផ្លាញនៃហេដ្ឋារចនាសម្ព័ន្ធសំខាន់ៗកំពុងជះឥទ្ធិពលយ៉ាងខ្លាំងដល់ការប្រើប្រាស់អគ្គិសនី ទឹក និងបណ្ដាញទូរគមនាគមន៍របស់ប្រជាពលរដ្ឋ ។

ជាចុងក្រោយលោក Rajasingham បញ្ជាក់ថា “ទោះបច្ចុប្បន្នសហគមន៍អន្តរជាតិកំពុងផ្ដោតសំខាន់ទៅលើព្រឹត្តិការណ៍ដ៏ធ្ងន់ធ្ងរនៅមជ្ឈិមបូព៌ាក៏ពិតមែន ប៉ុន្តែវាក៏មិនមែនជារឿងសំខាន់ដែលយើងត្រូវបំភ្លេចការផ្តោតអារម្មណ៍លើវិបត្តិផ្សេងទៀតនោះដែរ ជាពិសេសវាមិនមែនជារឿងដ៏សាហាវឃោរឃៅ និងធំដូចអ្វីដែលបានកើតឡើងចំពោះសង្រ្គាមនៅអ៊ុយក្រែនឡើយ” ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ បេសកជន ប៉ាឡេស្ទីន ប្រចាំ UN ៖ “ឥឡូវនេះតំបន់ហ្គាហ្សាជាឋាននរកនៅ លើផែនដី”