ប្រទេស El Salvador មានលក្ខណៈពិសេសអ្វី ទើបក្លាយជាម្ចាស់ផ្ទះការប្រកួតបវរកញ្ញាចក្រវាល ២០២៣?

នៅសល់តែជាង ១០ថ្ងៃទៀតប៉ុណ្ណោះ កម្មវិធីប្រកួតសម្រស់លំដាប់ថ្នាក់ពិភពលោក Miss Universe 2023 នឹងប្រារព្ធឡើងនៅឯប្រទេស អែលសាវ៉ាឌ័រ (El Salvador) ។ ឆ្នាំនេះ ជាការប្រកួតលើកទី៧២ នៃកម្មវិធី Miss Universe ខណៈបេក្ខនារីតាមបណ្ដាប្រទេសមួយចំនួនក៏បានទៅដល់ទឹកដី អែលសាវ៉ាឌ័រ រួចហើយ។

មុននឹងការប្រកួតចាប់ផ្ដើម សូមណែនាំប្រិយមិត្តមកដឹងពីការពិតគួរឱ្យចាប់អារម្មណ៍ចំនួន ៤ យ៉ាង អំពីប្រទេស អែលសាវ៉ាឌ័រ ជាមួយ កម្ពុជាថ្មីផ្លឹស ដូចខាងក្រោម!

១. អែលសាវ៉ាឌ័រ ជាប្រទេសសម្បូរធនធានធម្មជាតិ និងល្បីល្បាញដោយសារភ្នំភ្លើង

ប្រទេស អែលសាវ៉ាឌ័រ ត្រូវបានគេស្គាល់យ៉ាងទូលំទូលាយដោយសារជាទឹកដីសម្បូរទៅដោយភ្នំភ្លើង សូម្បីតែទង់ជាតិក៏មានរូបភាពភ្នំភ្លើងតំណាងដែរ។ វាជាប្រទេសតូចមួយនៅអាមេរិកកណ្តាល មានទីតាំងនៅភាគខាងត្បូងនៃប្រទេសហ្គាតេម៉ាឡា និងមានព្រំប្រទល់ខាងកើតជាមួយប្រទេសហុងឌូរ៉ាស នៅ​ប៉ែក​ខាងលិច​ជាប់​នឹង​មហាសមុទ្រ​ប៉ាស៊ីហ្វិក។ ប្រទេសនេះមានផ្ទៃដីប្រមាណ ២១,០៤១គីឡូម៉ែត្រការ៉េ ជាមួយនឹងចំនួនប្រជាជនប៉ាន់ស្មានជិត ៧ លាននាក់។ បច្ចុប្បន្នលោក Nayib Bukele ជាប្រធានាធិបតីនៃប្រទេស អែលសាវ៉ាឌ័រ។ នៅទីនេះប្រជាជនប្រើភាសាអេស្ប៉ាញ និងប្រើប្រាស់ប្រាក់ដុល្លារអាមេរិកជារូបិយប័ណ្ណផ្លូវការរបស់ខ្លួន។

ក្រៅពីភ្នំភ្លើង អែលសាវ៉ាឌ័រ វាមានភាពល្បីល្បាញដោយសារទេសភាពដ៏ស្រស់ស្អាតសម្រាប់ដំណើរកម្សាន្តបែបធម្មជាតិនិងស្ងប់ស្ងាត់ ហើយប្រទេសនេះក៏សម្បូរគ្រាប់កាហ្វេល្អៗផងដែរ ជាពិសេសមានរាជធានីចំណាស់ជាងគេនៅអាមេរិកកណ្តាលគឺរាជធានី សានសាល់វ៉ាឌ័រ (San Salvador) ។

២. នេះជាលើកទី២ ដែល អែលសាវ៉ាឌ័រ ក្លាយជាម្ចាស់ផ្ទះកម្មវិធីប្រកួតបវរកញ្ញាចក្រវាល

នេះ​ជា​លើក​ទី​២​ហើយ ដែល​ប្រទេស​អែលសាវ៉ាឌ័រ​ធ្វើ​ជា​ម្ចាស់​ផ្ទះ​បវរកញ្ញា​ចក្រវាល ខណៈលើកទីមួយ គឺកាលពី ៤៨ឆ្នាំមុន ដែលពេលនោះមានប្រទេសជាង ៧០ ចូលរួមប្រកួតប្រជែង។ ចំណែកការប្រកួតលើកនេះមានជិត ៩០ប្រទេសចូលរួម ហើយវានឹងធ្វើឡើងនៅ The Adolfo Pineda Gymnasium ដែលជាទីតាំងដូចគ្នា ទៅនឹងការប្រកួតពីមុន។

៣. ប្រទេសប៉ាគីស្ថាន និងប្រទេសជាង ១០ ផ្សេងទៀត បញ្ជូនបេក្ខភាពទៅប្រឡង ក្រោយខកខានប៉ុន្មានឆ្នាំ

ឆ្នាំនេះ មានប្រទេសជិត ៩០ប្រទេសបានចូលរួមប្រកួតសម្រស់ Miss Universe 2023 ដោយប៉ាគីស្ថានបានបញ្ជូនអ្នកតំណាងទៅចូលរួមជាលើកដំបូង ហើយប្រទេសជាង ១០ ទៀត បានបញ្ជូនបវរកញ្ញាតំណាងខ្លួនម្តងទៀត រួមមាន បង់ក្លាដែស ដាណឺម៉ាក ន័រវែស អេហ្ស៊ីប ហ្គីយ៉ាណា ហុងគ្រី ហ្សីមបាវ៉េ អៀរឡង់ កាហ្សាក់ស្ថាន ឡាតវី និងម៉ុងហ្គោលីជាដើម។

៤. ស្រ្តីកែភេទ ស្ត្រីរៀបការរួច និងស្ត្រីមានកូនអាចចូលរួមក្នុងការប្រកួត Miss Universe បាន

នេះ​ជា​ឆ្នាំ​ដំបូង​ដែល​បេក្ខនារីកែភេទ ស្ត្រីរៀបការរួច និងស្ត្រីមានកូន អាចចូលរួមប្រកួតបាន ខណៈប្រទេសហូឡង់ និងព័រទុយហ្គាល់ មានបេក្ខនារីកែភេទចូលរួម ចំណែកប្រទេស Guatemala និង Colombia មានបេក្ខនារីរៀបការរួចចូលរួមប្រកួត៕

ប្រែសម្រួល៖ សន្យា

ចុចអាន៖ Halloween ឆ្នាំនេះ ប្ដីប្រពន្ធ Mark -Kim ប្រែក្លាយទៅជាព្រះក្រិកដ៏សិចស៊ី