ក្រោយផ្ទុះការរិះគន់ ពេលនេះថៃ បញ្ជាក់ចំពោះព័ត៌មាន ហៅប៉ូលិសចិន មកល្បាតលើដីរបស់ខ្លួន

ក្រោយមានការរិះគន់ខ្លាំង ពេលនេះ អគ្គស្នងការនគរបាលជាតិថៃ លោកឧត្ដមសេនីយ៍ Torsak Sukwimol បានបដិសេធថា ប៉ូលិសថៃមិនចង់ឲ្យសមភាគីចិន មកល្បាតនៅក្នុងប្រទេសខ្លួនទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបង្ហាញពីជំហរបែបនេះ កាលពីថ្ងៃចន្ទ ដើម្បីឆ្លើយតបទៅនឹងរបាយការណ៍មុនៗដែលថា អាជ្ញាធរ គ្រោងអញ្ជើញប៉ូលិសចិន ឲ្យដើរល្បាតនៅតាមតំបន់ទេសចរណ៍ពេញនិយម ដើម្បីបង្កើនទំនុកចិត្តក្នុងចំណោមភ្ញៀវទេសចរចិន ដែលបង្កើតបានជាប្រភពចំណូលសំខាន់ទាក់ទងនឹងវិស័យទេសចរណ៍។

អគ្គស្នងការនគរបាលជាតិនិយាយថា ការិយាល័យនគរបាលថៃ មិនបានធ្វើសំណើនេះឡើយ ហើយលោកគិតថា មានការយល់ច្រឡំលើបញ្ហានេះ។ លោក​មិន​យល់​ស្រប​នឹង​គំនិត​នៃ​ការ​អញ្ជើញ​ប៉ូលិស​ចិន ​ឲ្យ​មក​មើល​ថែ​ភ្ញៀវ​ទេសចរ​ពួកគេ ​ក្នុងដី​ថៃ​ទេ ព្រោះរឿងនេះ​នឹង​បំពាន​អធិបតេយ្យ​របស់​ថៃ ។ ម្យ៉ាងទៀតប៉ូលិស​ភូមិន្ទ​ថៃ ក៏​អាច​មានសមត្ថភាពការពារបាន​ទាំង​អ្នក​ស្រុក និង​ភ្ញៀវ​ទេសចរដែរ ។

យ៉ាងណា លោកក៏ដឹងដែរថា ប៉ូលិសចិន ត្រូវបានដាក់ពង្រាយនៅក្នុងប្រទេសអ៊ីតាលី ដែលជាកន្លែងមានបញ្ហាទំនាក់ទំនង ​ប៉ុន្តែ​មិន​មាន​បញ្ហា​បែប​នេះ​នៅ​ក្នុង​ប្រទេស​ថៃ​ទេ។

តាមរបាយការណ៍កន្លងមកបានឲ្យដឹងថា គំនិតក្នុងការអញ្ជើញប៉ូលិសចិន ឲ្យមកធ្វើការល្បាតរួមគ្នាជាមួយសមភាគីថៃ នៅតាមតំបន់ទេសចរណ៍នានា គឺត្រូវបានលើកឡើងក្នុងកិច្ចប្រជុំរបស់នាយករដ្ឋមន្ត្រី សេដ្ឋា ថាវីស៊ីន ជាមួយតំណាងអាជ្ញាធរទេសចរណ៍ថៃ ការិយាល័យស៊ើបអង្កេតកណ្តាល ប៉ូលិសអន្តោប្រវេសន៍ និងប៉ូលិសទេសចរណ៍៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ ថៃ អនុញ្ញាតឲ្យប៉ូលិសចិន មកល្បាតលើដីរបស់ខ្លួន ដើម្បីបង្កើនទំនុកចិត្តអ្នកទេសចរ