សម្ដេចតេជោ ហ៊ុន សែន ៖ ២ថ្ងៃនៃព្រះរាជពិធីបុណ្យអុំទូក មានប្រជាពលរដ្ឋ និងភ្ញៀវទេសចរ បានដើរលេងកម្សាន្ដយ៉ាងច្រើនកុះករ

សម្ដេចតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ និងប្រធានគណបក្សប្រជាជនកម្ពុជា បានលើកឡើងថា ក្នុងរយៈពេល ២ថ្ងៃ នៃព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក មានប្រជាពលរដ្ឋ ភ្ញៀវជាតិ-អន្តរជាតិ​ និងកីឡាករអុំទូក បានដើរលេងកម្សាន្ដយ៉ាងច្រើនកុះករ។

តាមរយៈបណ្ដាញសង្គម សម្ដេចតេជោ ហ៊ុន សែន បានសរសេរថា នៅថ្ងៃទី ២៨ វិច្ឆិកានេះ គឺជាថ្ងៃទី ៣ និងជាថ្ងៃចុងក្រោយ នៃព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ក្នុងឆ្នាំ ២០២៣នេះ បន្ទាប់ពីការខកខាននៃព្រះរាជពិធីនេះ រយៈពេល ៣ឆ្នាំកន្លងទៅ។

សម្ដេចតេជោ ហ៊ុន សែន បានសរសេរបន្តថា រយៈពេល ២ថ្ងៃ នៃព្រះរាជពិធីនេះ យើងឃើញថា កីឡាករអុំទូក បងប្អូនប្រជាពលរដ្ឋ ភ្ញៀវជាតិ អន្តរជាតិ យ៉ាងច្រើនកុះករ មកលេងកម្សាន្តការប្រណាំងទូកងនៅមាត់ទន្លេមុខព្រះបរមរាជវាំង ការដើរទិញទំនិញតាមស្តង់តាំងពិពរណ័ទំនិញជាច្រើន នៅតាមទីតាំងនីមួយៗ ក្នុងរាជធានីភ្នំពេញ ព្រមទាំងទស្សនាការប្រគំតន្ត្រី តាមទម្រង់សិល្បៈបុរាណ និងសម័យដែលមានប្រគុំជូន នៅតាមសួនសាធារណៈផងដែរ ប្រកបដោយភាពសប្បាយរីករាយ។

សម្ដេចតេជោ ហ៊ុន សែន បានលើកឡើងថា «ការប្រារព្ធពិធីបុណ្យជាតិដ៏ធំប្រចាំឆ្នាំបែបនេះ អាចធ្វើទៅបាន គឺដោយ សារប្រទេសជាតិយើង មានសុខសន្តិភាពពេញលេញ។ សូមជូនពរបងប្អូន កីឡាករអុំទូក ប្រជាពលរដ្ឋ ភ្ញៀវជាតិ អន្តរជាតិ ទទួលបានភាពសប្បាយរីករាយ និងសុខសុវត្ថិភាព ក្នុងការត្រត្រឡប់ទៅកាន់ភូមិកំណើតវិញ»៕