សំឡេងអាសអាភាសរំខានដល់ពិធីចាប់ពូលជើងឯក Euro 2024 កំពុងត្រូវបានស៊ើបអង្កេត

សំឡេងថ្ងូរដែលមិនអាចពន្យល់បាន​រំខានដល់ពិធីចាប់ឆ្នោតបែងចែកពូល​ជើងឯកទ្វីបអឺរ៉ុប Euro 2024 សម្រាប់​វិញ្ញាសា​បាល់ទាត់បុរស កាលពីថ្ងៃសៅរ៍​ ទី​២ ខែ​ធ្នូ ឆ្នាំ​២០២៣​ បានធ្វើឱ្យមានការចាប់អារម្មណ៍ជាមួយនឹងឈ្មោះក្រុមដែលកំពុងត្រូវបានអាននៅលើឆាក។

ការរំខានដែលហាក់ដូចជាសំឡេង “ការរួមភេទ” ត្រូវបានឮយ៉ាងច្បាស់អស់រយៈពេលជាច្រើននាទី​នៅ​ក្នុង​ពិធីដែលបានចាក់ផ្សាយពីសាលប្រគុំតន្ត្រីនៅទីក្រុង Hamburg។

ក្រោយមក ឃ្លីប​ត្រូវ​បានបង្ហោះ​ចូល​ក្នុង​គេហទំព័រប្រព័ន្ធផ្សព្វផ្សាយសង្គម X ដែលគេស្គាល់ថាជា Twitter ហាក់បង្ហាញអ្នកលេងសើចដែលមានឈ្មោះតាមអ៊ីនធឺណិតថា Daniel Jarvis នៅ​កន្លែងក្នុងពេលហាត់សមសម្រាប់ព្រឹត្តិការណ៍ល្ងាចថ្ងៃសៅរ៍ដែលមានរយៈពេលមួយម៉ោង។

វាជាការធ្វេសប្រហែសផ្នែកសុវត្ថិភាពចុងក្រោយបំផុតក្នុងព្រឹត្តិការណ៍ដ៏ល្បីមួយរបស់សហព័ន្ធ​កីឡា​បាល់ទាត់​ទ្វីប​អឺរ៉ុប (UEFA)។ ស្ថាប័នដឹកនាំនេះបាននិយាយថា ខ្លួនកំពុងស៊ើបអង្កេតលើហេតុការណ៍នេះ។

គួររម្លឹក​ថា កាលពីថ្ងៃសៅរ៍ សំលេងរំខានបានចាប់ផ្តើមលេច​ឮ​ បន្ទាប់ពីឈ្មោះរបស់ប្រទេសស្វីសត្រូវបានប្រកាស ហើយគ្រាប់ឆ្នោតបន្តបន្ទាប់ដើម្បីបែងចែកពូលរបស់ក្រុមនៅក្នុងកាលវិភាគប្រកួតត្រូវបានចាប់ដោយអតីតកីឡាករអេស្ប៉ាញ​ និង​ Manchester​ City លោក David Silva។

Euro 2024 គ្រោងនឹងលេងនៅក្នុងទីក្រុងចំនួន១០ របស់អាល្លឺម៉ង់ ចាប់ពីថ្ងៃទី១៤ ខែមិថុនា ឆ្នាំក្រោយ៕

ប្រែសម្រួល៖ មន្នីរ័ត្ន
ប្រភព៖ euronews.com