អាកាសយានដ្ឋានអន្តរជាតិតេជោទំនើបជាងគេនៅអាស៊ី គ្រោងបើកដំណើរការ នៅឆ្នាំ២០២៥

អាកាសយានដ្ឋានអន្តរជាតិតេជោ លំដាក់ថ្នាក់ 4F ដំណាក់កាលទី១ គ្រោងនឹងបើកដំណើរការនាឆមាសទី១ ឆ្នាំ២០២៥ ខាងមុខនេះ។ នេះបើតាមការថ្លែងឱ្យដឹងដោយរដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល លោក ម៉ៅ ហាវណ្ណាល់ ក្នុងពិធីសំណេះសំណាល និងត្រួតពិនិត្យវឌ្ឍនភាពនៃគម្រោងសាងសង់អាកាសយានដ្ឋានអន្តរជាតិតេជោ ក្រោមអធិបតីភាពសម្ដេចធិបតី ហ៊ុន ម៉ាណែត នាព្រឹកថ្ងៃទី១២ ខែមីនានេះ។

លោកបណ្ឌិត ម៉ៅ ហាវណ្ណាល់ បានអះអាងថា ដើម្បីឈានទៅសម្រេចបានតាមកាលបរិច្ឆេទ ដែលបានគ្រោងទុក រដ្ឋលេខាធិការដ្ឋានអាកាសចរណ៍ស៊ីវិល នៅថ្ងៃទី១៨ ខែធ្នូ ឆ្នាំ២០២៣ បានបង្កើតគណៈកម្មការបច្ចេកទេសមួយជាសេនាធិការដើម្បីដឹកនាំគ្រប់គ្រង និងសម្របសម្រួលដោះស្រាយ ការរៀបចំប្រតិបត្តិការអាកាសយានដ្ឋានអន្តរជាតិតេជោ លំដាប់ថ្នាក់ 4F ដំណាក់កាលទីមួយ។

លោក បន្ថែមថា បច្ចុប្បន្នគណៈកម្មការនេះ បាននឹងកំពុងបំពេញការងារយ៉ាងសកម្មរបស់ខ្លួន ដោយបានសហការយ៉ាងជិតស្និតជាមួយក្រុមហ៊ុន ខេមបូឌា អ៊ែរផត អ៊ិនវេសមិន ខូលអិលធីឌី និងក្រុមហ៊ុន Cambodia Air Traffic Services ក្នុងការរៀបចំបំពេញបែបបទតាមលក្ខខណ្ឌតម្រូវនៃការធ្វើវិញ្ញាបនបត្រអាកាស យានដ្ឋាន (Aerodrome Certification) ដោយអនុលោមតាមគោលការណ៍នៃច្បាប់ បទដ្ឋានបច្ចេកទេស និងនីតិវិធីជាធរមាន។

គួរឱ្យដឹងថា អាកាសយានដ្ឋានអន្តរជាតិតេជោ បានបើកសាងសង់ឡើងនៅថ្ងៃទី១៦ ខែមិថុនា ឆ្នាំ២០២០ នៅលើផ្ទៃដី ២៦០០ហិកតា ចាយទុនវិនិយោគចំនួន១៥០០លានដុល្លារសហរដ្ឋអាមេរិក។ អាកាសយានដ្ឋានអន្តរជាតិភ្នំពេញថ្មី ស្ថិតនៅចម្ងាយប្រមាណ ២០គីឡូម៉ែត្រពីរាជធានីភ្នំពេញ។ គម្រោងសាងសង់នេះ មាន៣ដំណាក់កាល គឺដំណាក់កាលទី១ សាងសង់រួចអាចទទួលអ្នកដំណើរបានប្រមាណ ១៣ លាននាក់ក្នុងមួយឆ្នាំ ដំណាក់កាលទី២ នឹងបញ្ចប់នៅឆ្នាំ ២០៣០ ដែលអាចទទួលបានអ្នកដំណើរប្រមាណជា ៣០ លាននាក់ក្នុងមួយឆ្នាំ និងដំណាក់កាលចុងក្រោយ នឹងបញ្ចប់នៅឆ្នាំ ២០៥០ អាចនឹងទទួលបានអ្នកដំណើររហូតដល់ ៥០ លាននាក់ក្នុងមួយឆ្នាំ៕

ដោយ៖ ង៉ិល ណារ៉ាត់