ថៃ មានពិធីការិនី AI ផ្សាយព័ត៌មានតាមទូរទស្សន៍ លើកដំបូង

ប្រទេសថៃ បានបោះជំហានថ្មីមួយទៀត ដោយស្ថានីយទូរទស្សន៍ Nation TV នឹងបង្ហាញពិធីការិនី AI ដំបូងបង្អស់របស់ប្រទេសថៃ ឈ្មោះ Natcha និង Nitchan ដែលអ្នកទាំងពីរ នឹងលេចមុខតាមកញ្ចក់ទូរទស្សន៍ផ្សាយព័ត៌មានជូនអ្នកទស្សនាចាប់ពីថ្ងៃទី១ខែមេសាទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី Apirawee Pichayadecha នាយកគ្រប់គ្រងទូរទស្សន៍ Nation TV និយាយថា “បច្ចេកវិទ្យា AI ត្រូវបានអនុម័តនៅក្នុងអាជីវកម្មនិងឧស្សាហកម្មមួយចំនួន រួមទាំងទូរទស្សន៍និងប្រព័ន្ធផ្សព្វផ្សាយ។ ជាក់ស្តែង ទីភ្នាក់ងារព័ត៌មាននៅក្នុងប្រទេសចិននិងឥណ្ឌា បានប្រើប្រាស់ AI រួចទៅហើយ ក្នុងការវិភាគទិន្នន័យដើម្បីធានាបាននូវការផ្សាយព័ត៌មានលឿនរហ័ស និងប្រកបដោយភាពត្រឹមត្រូវជូនចំពោះសាធារណជន។

លោកស្រីបន្តថា “ពិធីការិនី AI នឹងជួយសម្រួលដល់ការងាររបស់បុគ្គលិកជាមនុស្ស ធ្វើឲ្យពួកគេមានពេលវេលាច្រើនជាងមុន ដើម្បីផ្តោតលើការប្រមូលនិងផ្ទៀងផ្ទាត់ព័ត៌មាន។ សេចក្តីរាយការណ៍របស់ Natcha និង Nitchan នឹងត្រូវបានអមដោយខ្លឹមសារព័ត៌មានស្វ័យប្រវត្តិ ដូច្នេះអ្នកទស្សនាមានអារម្មណ៍ថា ពួកគេកំពុងស្តាប់មនុស្សពិតនិយាយផ្ទាល់”។

សូមបញ្ជាក់ ពិធីការិនី AI ទាំងពីរនាក់ នឹងត្រូវដាក់ឲ្យផ្សាយសាកល្បង ចាប់ពីថ្ងៃទី១ខែមេសាទៅ ក្នុងកម្មវិធី Nation News Alert ដែលចាក់ផ្សាយនៅម៉ោង ២:០៥នាទីរសៀល ដល់ម៉ោង​ ២:៥៥នាទីរសៀល។

មិនត្រឹមប៉ុណ្ណឹង ទូរទស្សន៍ Nation TV ក៏មានគោលបំណងប្រើប្រាស់អ្នកយកព័ត៌មាន AI ទាំង២នេះ ធ្វើជាអ្នកតំណាងម៉ាកយីហោរបស់ស្ថានីយ៍ ក៏ដូចជាពង្រីកការប្រើប្រាស់ AI ទូទៅក្នុងតួនាទីផ្សេងទៀត ដូចជា influencer និងជាពិធីការរិនីក្នុងព្រឹត្តិការណ៍និងសន្និសីទនិម្មិត ផ្សេងៗផងដែរ៕

អត្ថបទ៖ សុខ​ សុវណ្ណ

ចុចអាន៖ IMF ព្រមានថា បន្តិចទៀត AI នឹងដណ្តើមការងារមនុស្ស ៤០% ទូទាំងសកលលោក