ប្រធានវិទ្យាស្ថាន KSI ចង់់ឱ្យសម្ដេចតេជោ ចែករំលែកការដឹកនាំរបស់សម្ដេចដល់ថ្នាក់ដឹកនាំអាស៊ាន

ប្រធានវិទ្យាស្ថានយុទ្ធសាស្ត្រ KSI ប្រចាំតំបន់អាស៊ីប៉ាស៊ីហ្វិក បានបង្ហាញបំណងចង់ឱ្យសម្ដេចតេជោ ហ៊ុន សែន ជួយចែករំលែកការដឹកនាំរបស់សម្ដេចទៅដល់បណ្ដាថ្នាក់ដឹកនាំនៃប្រទេសជាសមាជិកអាស៊ាន។

ការលើកឡើងរបស់ប្រធានវិទ្យាស្ថានយុទ្ធសាស្ត្រ KSI បែបនេះ ក្នុងឱកាសចូលជួបសម្ដែងការគួរសម និងពិភាក្សាការ ងារជាមួយសម្ដេចតេជោ ហ៊ុន សែន ប្រមុខរដ្ឋស្ដីទី និងជាប្រធានព្រឹទ្ធសភាកម្ពុជា នាព្រឹកថ្ងៃទី៩ ខែមេសា ឆ្នាំ ២០២៤ នៅវិមានព្រឹទ្ធសភា រាជធានីភ្នំពេញ។ ក្នុងជំនួបនេះ សម្ដេចតេជោ បានអរគុណលោក Tan Sri Michael Yeoh ដែលកន្លងមកវិទ្យាស្ថាន KSI តែងតែគាំទ្រកម្ពុជាជាហូរហែរ ពិសេសក្នុងពេលដែលកម្ពុជាធ្វើជាម្ចាស់ផ្ទះដឹកនាំអាស៊ានឆ្នាំ2022។ សម្ដេចតេជោ ក៏បានអរគុណចំពោះវិទ្យាស្ថានដែលបានផ្ដល់ពានរង្វាន់មួយជីវិតដល់សម្ដេច ជាថ្នាក់ដឹកនាំឆ្នើមនៅក្នុងអាស៊ាន ដែលបានកាន់ញរញ៊ូអាស៊ានរហូតដល់ទៅ៣ដង។

ជាការឆ្លើយតប លោក តាន់ ស្រ៊ី មីឆែល យ៉េវ (Tan Sri Michael Yeoh) ប្រធានវិទ្យាស្ថានយុទ្ធសាស្ត្រ KSI ប្រចាំតំបន់អាស៊ីប៉ាស៊ីហ្វិក បានថ្លែងការកោតសរសើរចំពោះការដឹកនាំរបស់សម្ដេចតេជោ ចាប់តាំងពីលោកបានចាប់ផ្ដើមគ្រប់គ្រង KSI មក គឺលោកបានកត់សម្គាល់ឃើញថា កម្ពុជាមានការអភិវឌ្ឍរីកចម្រើនយ៉ាងសម្បើម ដែលបង្ហាញពីការដឹកនាំរបស់សម្ដេចតេជោ។ លោកប្រធានវិទ្យាស្ថាន សង្ឃឹមថា សម្ដេចតេជោ នឹងមានការចែករំលែកនូវការដឹកនាំរបស់សម្ដេច ប្រកបដោយប្រសិទ្ធភាពនេះដល់បណ្ដាថ្នាក់ដឹកនាំនៃបណ្ដាប្រទេសអាស៊ានផ្សេងទៀត។

លោក តាន់ ស្រ៊ី មីឆែល យ៉េវ បានគូសបញ្ជាក់ថា ការដឹកនាំរបស់សម្ដេចតេជោ បាននាំមកនូវស្ថិរភាព សន្តិសុខដល់កម្ពុជា ធ្វើឱ្យមានកំណើនក្នុងវិស័យសេដ្ឋកិច្ច-សង្គម ហើយប្រែក្លាយកម្ពុជាទៅជាប្រទេសដែលមានការអភិវឌ្ឍលឿននៅក្នុងតំបន់។ នៅចំពោះមុខសម្ដេចតេជោ លោក Tan Sri Michael Yeoh ក៏បានសម្ដែងការចាប់អារម្មណ៍ចំពោះ សម្ដេចធិបតីនាយករដ្ឋមន្ត្រី ដែលមានចក្ខុវិស័យវែងឆ្ងាយ មានភាពឆ្លាតវៃក្នុងការដឹកនាំ ហើយសង្ឃឹមថា សម្ដេចធិបតី នឹងបន្តពីសម្ដេចតេជោ ដឹកនាំកម្ពុជាទៅរកការរីកចម្រើននៅក្នុងសម័យកាលថ្មីមួយថែមទៀត។

ក្នុងឱកាសនោះដែរ លោក Tan Sri Michael Yeoh ក៏បានជម្រាបជូនសម្ដេចតេជោអំពីការគ្រោងនឹងនាំមកនូវ សហគ្រិន អ្នកវិនិយោគជាច្រើន ដែលផ្ដោតទៅលើវិស័យហិរញ្ញវត្ថុ វិស័យកសិកម្ម វិស័យថាមពលដែលកកើតពីជីវម៉ាស ដោយលោក បានស្នើសុំសម្ដេចធិបតី ដើម្បីរៀបចំវេទិកា ២សំខាន់ ដែលគ្រោងរៀបចំនៅខែវិច្ឆិកា ឆ្នាំ២០២៤នេះ ដែលចង់ឱ្យកម្ពុជាធ្វើជាម្ចាស់ផ្ទះនៃព្រឹត្តិការណ៍។  

ពាក់ព័ន្ធនឹងគម្រោងនេះ សម្ដេចតេជោ បានថ្លែងអំណរគុណចំពោះការរៀបចំវេទិកាទាំងពីរនោះ និងបានផ្ដល់យោបល់ឱ្យមានការគិតគូរ ដោយធ្វើការជាមួយដៃគូរនានានៅក្នុងកម្ពុជា ហើយផ្ដោតលើពាណិជ្ជកម្មតម្រង់ទិសទៅលើពាណិជ្ជកម្មអាស៊ាន និងចិន។ សម្ដេច ចាត់ទុកថា ប្រទេសចិន គឺជាទីផ្សារធំមួយសម្រាប់អាស៊ាន និងសម្រាប់កម្ពុជា ដូច្នេះ ការយកចិត្តទុកដាក់ទៅលើទីផ្សារនៅក្នុងតំបន់ ត្រូវយកទុកដាក់លើអ្វីដែលមានហើយ ដូចជា កិច្ចព្រមព្រៀង RCEP, China-ASEAN Free Trade និងសមាជិកអាស៊ាននីមួយៗជាមួយបណ្ដាប្រទេសផ្សេងទៀត៕