ទ័ពជើងទឹកបារាំង រៀបជើងព្រួល ត្រៀមធ្វើសង្គ្រាម

ស្ថានការណ៍កាន់តែមិនស្រួល នាំឲ្យកងទ័ពជើងទឹកបារាំង បង្វែការផ្តោតយកចិត្តទុកដាក់ជាចម្បងពីការស្ទាក់ចាប់អ្នកជួញដូរគ្រឿងញៀននិងអ្នកនេសាទខុសច្បាប់ ទៅជាការសម្រុកហ្វឹកហាត់ខ្លាំងក្លាវិញ ដើម្បីរៀបជើងព្រួលធ្វើសង្គ្រាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងបទសម្ភាសជាមួយកាសែត Politico ចេញផ្សាយកាលពីថ្ងៃព្រហស្បតិ៍ទី១១ខែមេសា មេទ័ពជើងទឹកបារាំង ឧត្តមនាវីឯក Jacques Mallard បាននិយាយថា “យើងកំពុងផ្លាស់ប្តូរវិធីសាស្រ្តរបស់កងទ័ពជើងទឹក ចំពេលមានការគំរាមកំហែងមិនធម្មតា។ ឥឡូវ​នេះ យើង​ហ្វឹកហាត់​សម្រាប់​បេសកកម្ម​ផ្សេង​ទៀត ជា​ពិសេស​រៀបជើងព្រួលសម្រាប់សង្គ្រាមធំតែម្តង”។

លោកបន្ត​ថា “បច្ចុប្បន្ន ការ​ប្រយុទ្ធ​ជើង​ទឹក ​ទំនង​ជា​រឿងដែលត្រូវគិតគូរបំផុត ហើយ​នាវិក​បារាំងត្រូវរៀបចំខ្លួន​ប្រយុទ្ធ​ប្រឆាំង​នឹង​អ្នក​ដែល​ចង់​បំផ្លាញ​យើង។ មិន​មែន​អ្នក​ដែល​ចង់​ធ្វើ​ការ​ជួញ​ដូរ​ខុស​ច្បាប់ ហើយក៏មិន​មែន​អ្នក​ដែល​ចង់​លួច​ត្រីខុសច្បាប់ទៀតដែរ”។

ពាក់ព័ន្ធរឿងនេះ លោកបានលើកឡើងពីស្ថានភាពដែលកាន់តែតានតឹងជុំវិញពិភពលោក ដូចជាកងទ័ពជើងទឹករុស្ស៊ីចូលទៅក្នុងសមុទ្រខ្មៅ, ក្រុម Houthis នៃប្រទេសយេម៉ែនរារាំងនាវាដែលមានទំនាក់ទំនងជាមួយអ៊ីស្រាអែល និងវត្តមានសហរដ្ឋអាមេរិកនិងចក្រភពអង់គ្លេសនៅក្នុងសមុទ្រក្រហម ដូច្នេះបារាំងត្រូវតែប្រុងប្រយ័ត្នចំពោះសត្រូវ។

ទោះបីជាយ៉ាងណាក៏ដោយ ជុំវិញការប្រកាសត្រៀមខ្លួនរបស់បារាំង, រដ្ឋាភិបាលទីក្រុងប៉ារីស មិនបានបញ្ជាក់ថាតើ សត្រូវរបស់ខ្លួនគឺជាប្រទេសណានោះទេ។

ការ​អត្ថាធិប្បាយ​របស់​លោក Mallard កើត​ឡើង ​បន្ទាប់​ពី​ប្រធានាធិបតី​បារាំង​លោក Emmanuel Macron បានលើកឡើងម្តងហើយម្តងទៀត អំពីលទ្ធភាពនៃការបញ្ជូនកងទ័ពអង្គការណាតូ ទៅកាន់ប្រទេសអ៊ុយក្រែន ដើម្បីប្រយុទ្ធជាមួយរុស្ស៊ី។

កាលពីចុងខែកុម្ភៈ លោក Macron បានប្រកាសក្តែងៗថា យើងមិនអាចច្រានចោលលទ្ធភាពណាមួយឡើយ ហើយថា លោកខាងលិច នឹងធ្វើរឿងចាំបាច់គ្រប់យ៉ាង ដើម្បីរារាំងរុស្ស៊ីមិនឲ្យឈ្នះសង្គ្រាមនេះ។

យ៉ាងណា សហរដ្ឋអាមេរិក អាល្លឺម៉ង់ អង់គ្លេស ប៉ូឡូញ សាធារណរដ្ឋឆែក និងបណ្តាប្រទេសអឺរ៉ុបជាច្រើនទៀត បានប្រកាសថា ពួកគេគ្មានគម្រោងបញ្ជូនទ័ពទៅអ៊ុយក្រែនឡើយ ​ព្រោះមិនចង់ឲ្យកងកម្លាំងរបស់ពួកគេ ចូលរួមដោយផ្ទាល់នៅក្នុងសង្រ្គាម ហើយក៏មិនចង់ឲ្យមានការប៉ះទង្គិចដោយផ្ទាល់ជាមួយរុស្ស៊ី ដែលជាប្រទេសមានអាវុធនុយក្លេអ៊ែរដែរ។

វិមានក្រឹមឡាំងក៏ធ្លាប់ព្រមានដែរថា ប្រសិនបើលោកខាងលិច បញ្ជូនទ័ពទៅអ៊ុយក្រែនមែន ពួកគេច្បាស់ជាប្រថុយ បង្កឲ្យមានការប្រឈមមុខដាក់គ្នាដោយផ្ទាល់មិនអាចចៀសបានរវាងណាតូ និងរុស្ស៊ីហើយ៕

អត្ថបទ៖ សុខ សុវណ្ណ

ចុចអាន៖ សមាជិកណាតូ ថ្មីថ្មោង គាំទ្រគំនិតលោក Macron បញ្ជូនទ័ពទៅ អ៊ុយក្រែន