សេដ្ឋកិច្ច

តួកគីចេញវិធានការតម្លើងពន្ធលើរថយន្តចិន ដើម្បីលើកកម្ពស់ផលិតកម្មក្នុងស្រុក

បានផុស

២ years មុន

នៅ

ថ្ងៃចន្ទ ១០ មិថុនា ២០២៤

ដោយ

ក្រសួងពាណិជ្ជកម្មតួកគី បានប្រកាសកាលពីថ្ងៃសៅរ៍ថា តួកគីនឹងដាក់ពន្ធបន្ថែម ៤០ ភាគរយលើការនាំចូលរថយន្តពីប្រទេសចិន ដើម្បីកាត់បន្ថយអសមតុល្យពាណិជ្ជកម្មបច្ចុប្បន្នរបស់ប្រទេស និងការពារគាំទ្រក្រុមហ៊ុនផលិតរថយន្តក្នុងស្រុក។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វិធានការថ្មីនេះ ធ្វើឡើងក្រោមការសម្រេចឡើងរបស់ប្រធានាធិបតី ដោយវានឹងដាក់កំណត់ពន្ធយ៉ាងតិច ៧ ០០០ ដុល្លារក្នុងរថយន្តមួយគ្រឿង ហើយនឹងចូលជាធរមានចាប់ពីថ្ងៃទី ៧ ខែកក្កដា។ វិធានការកំណត់ថា ប្រសិនបើពន្ធ ៤០ ភាគរយសម្រាប់រថយន្តនាំចូលមួយតិចជាង ៧ ០០០ ដុល្លារ នោះពន្ធអប្បបរមាចំនួន ៧ ០០០ ដុល្លារ នឹងត្រូវគិតចូល។

ក្រសួងពាណិជ្ជកម្ម និយាយក្នុងសេចក្ដីថ្លែងការណ៍យ៉ាងដូច្នេះថា៖ «ពន្ធបន្ថែមនឹងត្រូវដាក់លើការនាំចូលរថយន្តដឹកអ្នកដំណើរធម្មតា និងរថយន្តកូនកាត់ពីប្រទេសចិន ដើម្បីបង្កើន និងការពារចំណែកនៃផលិតកម្មក្នុងស្រុក ដែលកំពុងធ្លាក់ចុះ»។

ក្រសួងក៏បាននិយាយផងដែរថា ការសម្រេចចិត្តលើពន្ធបន្ថែម ធ្វើឡើងដោយគិតគូរពីគោលដៅឱនភាពគណនីចរន្ត និងការខិតខំប្រឹងប្រែង ដើម្បីលើកទឹកចិត្តដល់ការវិនិយោគ និងផលិតកម្មក្នុងស្រុក។

គួររំឭកថា នៅឆ្នាំ ២០២៣ តួកគីបានដាក់ពន្ធបន្ថែមលើការនាំចូលរថយន្តអគ្គិសនីពីប្រទេសចិន ហើយដាក់ចេញនូវបទប្បញ្ញត្តិមួយចំនួនទាក់ទងនឹងការថែទាំ និងសេវាកម្ម EV។ បច្ចុប្បន្ន រដ្ឋាភិបាលកំពុងលើកទឹកចិត្តដល់ការផលិត និងការនាំចេញបន្ថែមទៀត ដើម្បីកាត់បន្ថយឱនភាពពាណិជ្ជកម្មរ៉ាំរ៉ៃ ដែលមានចំនួន ៤៥,២ ប៊ីលានដុល្លារកាលពីឆ្នាំមុន។

គេមើលឃើញថា ការបន្ថែមពន្ធលើរថយន្តនាំចូលពីចិនរបស់តួកគី ធ្វើឡើងខណៈប្រទេសចិនកំពុងប្រឈមមុខនឹងសម្ពាធពាណិជ្ជកម្មកាន់តែខ្លាំងឡើងៗនៅទូទាំងពិភពលោក ជុំវិញការនាំចេញរថយន្តអគ្គិសនីដែលកំពុងកើនឡើងរបស់ខ្លួន។ ប្រទេសជាច្រើន រួមទាំងអាមេរិក និងនៅអឺរ៉ុប បានអះអាងថា ក្រុមហ៊ុនចិនទទួលបានការឧបត្ថម្ភធនពីរដ្ឋចិន ដែលអាចធ្វើឱ្យខ្លួនវាតទីផ្សាររថយន្ត ដោយលក់ក្នុងតម្លៃថោកជាងគូប្រជែង៕

Related Topics: