សេដ្ឋកិច្ច

Mercedes Benz ចុះកិច្ចសន្យាផលិតរថយន្តអគ្គិសនីនៅប្រទេសថៃ

បានផុស

២ years មុន

នៅ

ថ្ងៃអង្គារ ១១ មិថុនា ២០២៤

ដោយ

អ្នកនាំពាក្យរដ្ឋាភិបាលថៃ លោក Chai Wacharonke បានថ្លែងឱ្យដឹងកាលពីថ្ងៃចន្ទថា ក្រុមហ៊ុនផលិតរថយន្តប្រណិតអាល្លឺម៉ង់ Mercedes Benz បានចុះកិច្ចសន្យាជាមួយដៃគូថៃរបស់ខ្លួន ក្នុងការផលិតរថយន្តអគ្គិសនីក្នុងប្រទេសថៃ។ នេះបើតាមការចុះផ្សាយរបស់កាសែតក្នុងស្រុក The Nation។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Chai បាននិយាយថា Mercedes Benz បានចុះកិច្ចសន្យាជួលក្រុមហ៊ុន Thonburi Automotive Assembly Plant Co Ltd ដែលជាដៃគូរយៈពេលវែងរបស់ខ្លួននៅថៃ ដើម្បីផលិតរថយន្តអគ្គិសនី Mercedes Benz ក្នុងរយៈពេល ១០ ឆ្នាំទៅមុខ។

លោកបានថ្លែងបន្តថា ក្នុងគោលបំណងគាំទ្រគោលនយោបាយសេដ្ឋកិច្ចរបស់រដ្ឋាភិបាល លោកនាយករដ្ឋមន្ត្រី សេដ្ឋា ថាវីស៊ីន បានស្វាគមន៍ចំពោះការសម្រេចចិត្តរបស់ក្រុមហ៊ុន Mercedes Benz ក្នុងការប្រើប្រាស់ប្រទេសថៃជាមូលដ្ឋានផលិតកម្មរបស់ខ្លួនដើម្បីផលិតរថយន្តអគ្គិសនី ដោយលើកឡើងថា ផែនការនេះត្រូវនឹងចក្ខុវិស័យ «Ignite Thailand» របស់រដ្ឋាភិបាល ក្នុងការប្រែក្លាយប្រទេសថៃទៅជាមជ្ឈមណ្ឌលប្រើយានយន្តចល័តមួយ។

គួរគូសបញ្ជាក់ថា ថៃក្លាយជាទីផ្សារលក់រថយន្តដ៏ធំមួយនៅក្នុងតំបន់អាស៊ីអាគ្នេយ៍ ដែលមានក្រុមហ៊ុនផលិតរថយន្តអន្តរជាតិជាច្រើន ធ្វើការប្រកួតប្រជែងទីផ្សារគ្នា។ បច្ចុប្បន្ន រថយន្តអគ្គិសនីចិន កំពុងវាយលុកទីផ្សាររបស់ប្រទេសនេះ។

យ៉ាងណាមិញ ខណៈទីផ្សារបច្ចុប្បន្នត្រូវបានគ្រប់គ្រងដោយក្រុមហ៊ុនផលិតចិន និងជប៉ុន រដ្ឋាភិបាលថៃក៏មានបំណងទាក់ទាញក្រុមហ៊ុនផលិតរថយន្តអគ្គិសនីបន្ថែមទៀតផងដែរ ជាពិសេសពីសហរដ្ឋអាមេរិក អឺរ៉ុប និងកូរ៉េខាងត្បូង។ ការណ៍នេះ គឺស្របនឹងគោលដៅ «30@30» របស់ប្រទេសថៃ ដែលចង់ឱ្យផលិតកម្មរថយន្តអគ្គិសនីរួមចំណែក ៣០ ភាគរយ នៃផលិតកម្មរថយន្តទាំងមូល ត្រឹមឆ្នាំ ២០៣០៕

Related Topics: