មន្ត្រី និងអ្នកជំនាញលើកឡើងដូចគ្នា ជុំវិញស្ថានភាពបន្តជាប់​គាំងនៃវិស័យ​អចលនទ្រព្យ

ស្ថានភាពវិស័យអចលនទ្រព្យ និងសំណង់នៅកម្ពុជា មិនទាន់បង្ហាញសញ្ញាល្អ​ប្រសើរ​​នៅឡើយ​នោះទេ នៅក្នុងឆ្នាំ ២០២៤នេះ បន្ទាប់ពីឆ្លងកាត់វិបត្តិកូវីដ១៩ និង​បញ្ហាសង្គ្រាម និងជម្លោះពាណិជ្ជកម្មរវាងចិន និងសហរដ្ឋអាមេរិក។

លោកបណ្ឌិត គីម ហ៊ាង ប្រធាន KW Cambodia ​មានប្រសាសន៍នៅថ្ងៃទី ២០ ខែមិថុនា នេះថា ស្ថានភាពវិស័យអចលនទ្រព្យ​បច្ចុប្បន្នមិនទាន់ត្រឡប់​ទៅរកភាព​ប្រសើរ​​ឡើងវិញនោះទេ ដោយសារនៅកម្ពុជា វិស័យមួយនេះ បានធ្លាក់ចុះរយៈ​ពេល ៥ ឆ្នាំ ជាប់គ្នា ចាប់តាំងពីវិបត្តិកូវីដ១៩ សង្គ្រាមរុស្ស៊ី-អ៊ុយក្រែន និងការ​ធ្លាក់ចុះ​នៃសេដ្ឋកិច្ចសកល។

លោកបណ្ឌិត គីម ហ៊ាង បញ្ជាក់ថា នៅពេលដែលស្ថានភាពល្អ​អ្នកទិញ គឺគាត់មាន​គោល​បំណងច្បាស់លាស់ គាត់ទិញវិនិយោគផង ប្រើប្រាស់ផង និងទុកលក់យកផល​ចំណេញ​​ផង ហើយទិញទុកផង ប៉ុន្តែនៅឆ្នាំ ២០២៤ នេះ អ្នកដែលទិញទុក និងលក់​ចំ​ណេញ មិនមានទៀតទេ បើទិញគឺដើម្បី​តែប្រើ​ប្រាស់ប៉ុណ្ណោះ។

ចំណែកឯការសាងសង់ សម្រាប់អ្នកដែលចាប់អាជីពនេះបច្ចុប្បន្ន គឺនៅតែបន្ត​ដដែល ខណៈ​អ្នក​ដែលធ្វើតាមគ្នា គាត់​ខាតបង់ គាត់បោះបង់ចោលអស់ហើយ។

បើតាមលោកបណ្ឌិត គីម ហ៊ាង វិស័យដីធ្លី នឹងល្អប្រសើរឡើង នៅពេលណាដែលបញ្ចប់បញ្ហាសង្គ្រាមរវាងរុស្ស៊ី-អ៊ុយក្រែន តំបន់មជ្ឈឹមបូព៌ា និងទំនាស់សេដ្ឋកិច្ចរវាងចិន-អាមេរិកត្រូវបានបញ្ចប់ ព្រមទាំងដំណើរការសេដ្ឋកិច្ចពិភពលោកមានភាពល្អប្រសើរឡើងវិញ នោះវិស័យអចលនទ្រព្យនៅ​កម្ពុជា​នឹង​ងើបឡើងវិញ។

លោក មាស សុខ សេនសាន រដ្ឋលេខាធិការ និងជាអ្នកនាំពាក្យក្រសួងសេដ្ឋកិច្ច និងហិរញ្ញវត្ថុ ​មានប្រសាសន៍ថា សេដ្ឋកិច្ចកម្ពុជានៅដើមឆ្នាំ ២០២៤ មានកំណើន ដោយសារវិស័យកសិកម្ម ឧស្សាហកម្ម និងសេវាកម្ម ខណៈវិស័យអចលទ្រព្យ និងសំណង់មិនទាន់ងើបឡើងវិញនោះទេ ហើយបន្តជះឥទ្ធិពលនៅពេលខាងមុខទៀត។

លោកស្រី ជា សិរី ទេសាភិបាលធនាគារជាតិនៃកម្ពុជា មានប្រសាសន៍ថា កម្ពុជាត្រូវបន្តប្រុងប្រយ័ត្នចំពោះភាពទន់ខ្សោយនៃវិស័យអចលនទ្រព្យ ដែលមានការផ្គត់ផ្គង់លើសតម្រូវការ ខណៈសន្ទស្សន៍ថ្លៃលំនៅឋាននៅឆ្នាំ ២០២៣ បានថយចុះ ទន្ទឹមនឹងការថមថយលំហូរនៃវិនិយោគផ្ទាល់ពីបរទេសក្នុងវិស័យអចលនទ្រព្យនេះ។

ធនាគារជាតិនៃកម្ពុជា បានព្យាករថា វិស័យសំណង់នៅកម្ពុជានឹងសម្រេចបានកំណើនក្នុងកម្រិតទាប១,១% នៅឆ្នាំក្នុង២០២៤ នេះ ដែលគាំទ្រដោយកំណើនលំហូរទុនវិនិយោគពីបរទេស និងគម្រោងសំណង់ហេដ្ឋារចនាសម្ព័ន្ធ​សាធារណៈ។

តែយ៉ាងណា វិស័យនេះអាចបន្តប្រឈមនឹងភាពមិនច្បាស់លាស់នៃសេដ្ឋកិច្ចសកល បញ្ហាសង្គ្រាម និងភាពតានតឹងផ្នែកភូមិសាស្ត្រនយោបាយសកល ជាពិសេសជម្លោះពាណិជ្ជកម្មរវាងប្រទេសចិន និងសហរដ្ឋអាមេរិក ក៏ដូចជាការធ្លាក់ចុះនៃទីផ្សារអចលនទ្រព្យនៅក្នុងប្រទេសចិន។

បើយោងតាមរបាយការណ៍របស់ក្រសួងពាណិជ្ជកម្ម ការនាំចូលសម្ភារសំណង់នៅរយៈពេល ៥ ខែ ឆ្នាំ ២០២៤ មានទំហំជាង ៦២២ លានដុល្លារ កើនឡើង ២១% បើធៀនឹងរយៈពេលដូចគ្នាកាលពីឆ្នាំមុន ដែលមានទំហំជាង ៥១៣ លានដុល្លារ៕

អត្ថបទ៖ ឡេង ដេត