ចៅសង្កាត់ចាក់អង្រែក្រោម៖ ករណីគ្រោះថ្នាក់ចរាចរណ៍ដែលតែងកើតឡើងនៅផ្លូវ៦០ម៉ែត្រគឺដោយសារអ្នកបើកបរមិនគោរពច្បាប់

លោក ជា សុខៃ ចៅសង្កាត់ចាក់អង្រែក្រោម បានឲ្យដឹងថា ផ្លូវ៦០ម៉ែត្រដែលស្ថិតក្នុងមូលដ្ឋានសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ដែលតែងតែជួបគ្រោះថ្នាក់ចរាចរណ៍ហើយបណ្តាលឲ្យអ្នកធ្វើដំណើររងរបួសនិងស្លាប់នោះ គឺព្រោះតែអ្នកបើកបរមិនគោរពច្បាប់ចរាចរណ៍។

លោក ជា សុខៃ បានបន្តថា ក្នុងអំឡុងឆ្នាំ២០២២ និង២០២៣កន្លងមក គឺករណីគ្រោះថ្នាក់ចរាចរណ៍តែងកើតឡើងញឹកញាប់ ខុសប្លែកឆ្នាំ២០២៤នេះឃើញថា បានថយចុះខ្លះ។ បើតាមការពិនិត្យពីស្ថានភាពបច្ចប្បុន្ន គឺកត្តាគ្រោះថ្នាក់បង្កដោយអ្នកបើកបរលឿន និងច្រើនកើតឡើងនៅពេលយប់។

លោកចៅសង្កាត់បានបន្តទៀតថា នៅលើកំណាត់ផ្លូវ៦០ម៉ែត្រសព្វថ្ងៃ មានភ្លើងស្តុបចំនួន២ប៉ុណ្ណោះ គឺនៅក្រុមហ៊ុន មែកសឺដែសចំនួន១ និង១ទៀតនៅមុខផ្សារទំនើបអុីអន៣។ ក្នុងនាមអាជ្ញាធរ លោកសូមស្នើសុំភ្លើងស្តុបចរាចរណ៍ និងភ្លើងបំភ្លឺផ្លូវបន្ថែមទៀត។

ទាក់ទិនទៅចំនួនករណីគ្រោះថ្នាក់ចរាចរណ៍បណ្តាលឲ្យមានមនុស្សស្លាប់ និងរបួសនេះ ផ្នែកស្ថាបន្ននគរបាលលោកពុំបានបញ្ចេញព័ត៌មានឡើយ៕

អត្ថបទ៖ នរា