ពលរដ្ឋ១០០គ្រួសារនៅស្រុករតនៈមណ្ឌល ទទួលបានអំណោយពីកាកបាទក្រហមកម្ពុជា

កាលពីព្រឹក ថ្ងៃទី១៥ ខែកក្កដា ឆ្នាំ២០២៤នេះ លោក  សុខ លូ អភិបាល នៃគណៈអភិបាលខេត្តបាត់ដំបង ជាប្រធានគណៈកម្មាធិការសាខាកាកបាទក្រហមកម្ពុជា ខេត្តបាត់ដំបង និងសហការី បានអញ្ជើញចុះសួរសុខទុក្ខ និងផ្តល់អំណោយមនុស្សធម៌ដល់ប្រជាពលរដ្ឋងាយរងគ្រោះចំនួន ១០០គ្រួសារ មកពីភូមិចំនួន៣៣ក្នុងឃុំទាំង៥នៃស្រុករតនមណ្ឌល ដែលពិធីនេះបានប្រារព្វធ្វើឡើងនៅបរិវេណវត្តស្ដៅខាងកើត ឃុំស្ដៅ ស្រុករតនៈមណ្ឌល។

នាឱកាសនោះផងដែរ លោក សុខ លូ ប្រធានគណៈកម្មាធិការសាខា ក៏បាននាំយកនូវប្រសាសន៍ផ្តាំផ្ញើការសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលតែងតែយកចិត្តទុកដាក់ចំពោះប្រជាពលរដ្ឋគ្រប់រូប ជាពិសេសប្រជាពលរដ្ឋដែលរងគ្រោះ និងងាយរងគ្រោះ ទោះនៅទីណាក៏ដោយ ត្រូវមានការប្រុងប្រយ័ត្នខ្ពស់ឲ្យជាប់ជាប្រចាំ ពោលគឺសម្តេចកិត្តិព្រឹទ្ធបណ្ឌិត តែងតែយកចិត្តទុកដាក់ និងគិតគូរខ្ពស់ចំពោះសុខទុក្ខប្រជាពលរដ្ឋគ្រប់រូប ដោយមិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ ពោលគឺ ទីណាមានទុក្ខលំបាក ទីនោះមានកាកបាទក្រហមកម្ពុជា និងផ្តាំផ្ញើដល់បងប្អូនប្រជាពលរដ្ឋទាំងអស់ប្រកាន់យកនូវ អនាម័យល្អ រស់នៅស្អាត ហូបស្អាត ផឹកស្អាត និងខិតខំប្រឹងប្រែងប្រកបមុខរបរបង្កបង្កើនផលដាំដំណាំរួមផ្សំ ចិញ្ចឹមសត្វ ដើម្បីទ្រទ្រង់ជីវភាពគ្រួសារឱ្យបានប្រសើរឡើង។ 

អំណោយដែលគ្រួសារនីមួយៗទទួលបាន អង្ករ២៥គីឡូក្រាម, ទឹកបរិសុទ្ធ១កេស មី១កេស ត្រីខ១០កំប៉ុង ទឹកស៊ីអ៉ីវ១យួរ ទឹកត្រី១យួរផងដែរ ៕

អត្ថបទ៖ សោ និយមរ័ត្ន