មានសង្ឃឹមឡើងវិញ! អណ្តើកខ្មៅជិតផុតពូជកើនឡើងវិញ បន្ទាប់ពី​កម្ពុជាភ្ញាស់ពងដោយជោគជ័យ

តាមការចេញផ្សាយរបស់សារព័ត៌មានMGR online នៅថ្ងៃទី២៤ ខែកក្កដា នេះ​ បានឱ្យដឹងថាកូនអណ្តើកខ្មៅ​ដំបូង​គេដែលញាស់ចេញ​ពីពងក្នុងអាងចិញ្ចឹមនៅ​កម្ពុជា កំពុងទទួលបានការថែទាំយ៉ាងយក​ចិត្ត​ទុកដាក់ពី​អ្នក​អភិរក្ស រហូតទាល់តែអាចប្រលែងវាត្រឡប់ទៅកាន់​ធម្មជាតិ​វិញបាន។ នេះគឺ​ជា​ផ្នែក​មួយ​នៃ​ផែនការកសាងចំនួននៃសត្វ​ល្មូន​ដែល​ជិត​ផុត​ពូជប្រភេទ​នេះ​ឡើង​វិញ។

កូនអណ្តើកខ្មៅនេះបានញាស់កាលពីចុងខែឧសភា នៅមជ្ឈមណ្ឌលដើម្បីការអភិរក្សជីវចម្រុះនៅកម្ពុជាបន្ទាប់ពីមេរបស់វាត្រូវបានជួយសង្គ្រោះពីទីផ្សារងងឹត។

នាយកមជ្ឈមណ្ឌលដើម្បីការអភិរក្សជីវចម្រុះបាននិយាយថា សត្វល្មូនតូចមួយនេះមានប្រវែងត្រឹមតែ៦សង់ទីម៉ែត្រ និងមានទម្ងន់ត្រឹមតែ៤០ក្រាមប៉ុណ្ណោះ។ គេរំពឹងថា វានឹងរស់រាននៅក្នុងជម្រកអភិរក្សនេះរហូតទាល់តែវាធំល្មម ដែលលែងប្រឈមនឹងហានិភ័យពីធម្មជាតិបាន។

នាយកមជ្ឈមណ្ឌលដើម្បីការអភិរក្សជីវចម្រុះបានបន្តថា កូនអណ្តើកខ្មៅនេះអាចនឹងចំណាយពេលពី ៤-៦ ឆ្នាំ ទើបអាចពិចារណាយកវាប្រលែងទៅកាន់ធម្មជាតិវិញបាន។

អណ្តើកខ្មៅ គឺជាសត្វល្មូនទឹកសាបដែលមានដើមកំណើតនៅអាស៊ីអាគ្នេយ៍ ត្រូវបានគេចុះបញ្ជីជាប្រភេទសត្វដែលជិតផុតពូជដោយអង្គការអន្តរជាតិដើម្បីការអភិរក្សធម្មជាតិ។ ជាទូទៅ អណ្តើកខ្មៅអាចលូតលាស់បានប្រមាណ ១៧-២០ សង់ទីម៉ែត្រ។ ចំនួនសត្វអណ្តើកខ្មៅកំពុងស្ថិតក្នុងការគំរាមកំហែងពីការបាត់បង់ទីជម្រក និងការជួញដូរសត្វព្រៃខុសច្បាប់។ ទាំងសាច់និងស្នូករបស់វាត្រូវបានគេយកទៅប្រើប្រាស់ជាឱសថបុរាណ៕

អត្ថបទ៖ គង់ សំអាន