ដឹងហើយ ប្រភេទអាវុធ ដែលគេប្រើដើម្បីធ្វើឃាតមេក្រុមហាម៉ាស

តាមការបញ្ជាក់ពីសារព័ត៌មានអារ៉ាប៊ីសាអូឌីត Al Hadath នៅថ្ងៃពុធទី៣១ខែកក្កដាឆ្នាំ២០២៤, ឥស្សរជនជាន់ខ្ពស់របស់ក្រុមហាម៉ាស Ismail Haniyeh ត្រូវគេធ្វើឃាត ដោយប្រើមីស៊ីលបញ្ជាពីចម្ងាយ (Guide Missile) បាញ់សំដៅលើលំនៅដ្ឋានឯកជនរបស់គាត់ក្នុង ទីក្រុងតេហេរ៉ង់នៃប្រទេសអ៊ីរ៉ង់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្របពេលជាមួយគ្នានោះ ប្រព័ន្ធផ្សព្វផ្សាយរបស់អ៊ីរ៉ង់ Fars news ក៏រាយការណ៍ដែរថា មីស៊ីលបានវាយប្រហារអគារនៅម៉ោងប្រហែល២:០០ រំលងអធ្រាត្រ (ម៉ោងក្នុងស្រុក)។

ភ្លាមៗក្រោយការធ្វើឃាត, ក្រុម​ចលនា​តស៊ូ​ប៉ាឡេស្ទីន បាន​រៀបរាប់​នៅ​ក្នុង​សេចក្ដី​ថ្លែងការណ៍​ថា​ «​ក្រុម​ជន​ក្បត់ Zionist បាន​លួច​វាយ​ឆ្មក់​លំនៅដ្ឋាន​របស់​លោក Ismail Haniyeh នៅ​ក្នុង​រដ្ឋធានី តេហេរ៉ង់។ លោក​បាន​ទៅ​អ៊ីរ៉ង់ ដើម្បី​ចូលរួម​​ពិធី​ស្បថ​​​ឡើង​កាន់​តំណែង​របស់​ប្រធានាធិបតី​ថ្មី​នៃ​​សាធាណរដ្ឋ​ឥស្លាម លោក Masoud Pezeshkian»។

ជុំវិញការវាយប្រហារនេះ ក្រសួងការបរទេសរុស្ស៊ី ក៏ចេញមុខថ្កោលទោសផងដែរ ដោយចាត់ទុកការធ្វើឃាតលោក Haniyeh ជា អំពើឃាតកម្មនយោបាយដែលមិនអាចទទួលយកបានទាំងស្រុង ខណៈអនុរដ្ឋមន្ត្រីការបរទេស Mikhail Bogdanov និយាយថា ការស្លាប់របស់មេដឹកនាំក្រុមហាម៉ាស នឹងបញ្ឆេះឲ្យមានភាពតានតឹងបន្ថែមទៀត នៅតំបន់មជ្ឈិមបូព៌ា។

ទន្ទឹមនោះ ក្រសួងការបរទេសតួកគី ក៏ថ្កោលទោសដែរចំពោះការធ្វើឃាតដ៏អាម៉ាស់នៅទីក្រុងតេហេរ៉ង់ ដោយនិយាយក្នុងសេចក្តីថ្លែងការណ៍មួយថា «ការវាយប្រហារនេះ គឺមានគោលបំណងធ្វើឲ្យសង្រ្គាមហ្គាហ្សា កាន់តែរីករាលដាលធំឡើងៗ»។

សូមបញ្ជាក់ថា កើត​នៅ​​ថ្ងៃ​ទី​២៩​ខែ​មករា​ឆ្នាំ​១៩៦២​​ ក្នុងជំរំ​ភៀស​ខ្លួន Al-Shati តំបន់​ហ្គាហ្សា​ស្ទ្រីប លោក Ismail Haniyeh ត្រូវ​បាន​ជ្រើស​តាំង​ជា​ប្រមុខ​ដឹក​នាំ​ក្រុម​ហាម៉ាស​​នៅ​​ឆ្នាំ​២០១៧។ លោក​ធ្លាប់​ធ្វើ​ជា​​នាយករដ្ឋមន្ត្រី​ប៉ាឡេស្ទីន ក្នុង​ឆ្នាំ​២០០៦ ក្រោយ​ក្រុម​ហាម៉ាស​បាន​ឈ្នះ​ការ​បោះឆ្នោត​ថ្នាក់​ជាតិ តែ​ត្រូវ​​បាន​ដក​តំណែង​វិញ​នៅ​ឆ្នាំ​បន្ទាប់ ក្រោយ​ពី​​​​​មាន​ការ​ប៉ះ​ទង្គិច​គ្នា​រវាង​​​ក្រុម​ហាម៉ាស និង​​បក្ស Fatah របស់​ប្រធានាធិបតី​​ប៉ាឡេស្ទីន​លោក Mahmoud Abbas។

លោក Haniyeh ក៏ធ្លាប់​ជាប់​ពន្ធនាគារ​៣​ឆ្នាំដែរ​នៅ​អ៊ីស្រាអែល​ក្នុង​ឆ្នាំ​១៩៨៩ ហើយ​ត្រូវ​និរទេស​ខ្លួន​​​ក្នុង​ឆ្នាំ​១៩៩២​ទៅ​តំបន់​ដែល​គ្មាន​អ្នក​គ្រប់គ្រង ​រវាង​​​លីបង់ និង ​អ៊ីស្រាអែល។ រួចលោកក៏​បន្ត​ទៅ​​រស់នៅ​ក្នុង​ប្រទេស​កាតា​​​ ក្រោយ​ចាក​ចេញ​​ពី​តំបន់​ហ្គាហ្សា​នៅ​ក្នុង​ឆ្នាំ​២០១៧ ហើយ​បាន​ក្លាយ​ជា​​អ្នក​សម្របសម្រួល​យ៉ាង​សកម្ម​ដើម្បី​បញ្ចប់​​សង្គ្រាម​ប្រល័យ​ពូជ​សាសន៍​របស់​អ៊ីស្រាអែល​នៅ​ហ្គាហ្សា៕

អត្ថបទ៖ សុខ សុវណ្ណ

ចុចអាន៖ ក្ដៅៗ! មេ​ដឹក​នាំ​កំពូល​ក្រុម​ហាម៉ាស ត្រូវ​បាន​សម្លាប់​នៅ​ក្នុង​ប្រទេស​អ៊ីរ៉ង់