ព័ត៌មានអន្ដរជាតិ

នាយករដ្ឋមន្ត្រីថ្មីរបស់ថៃ ប្តេជ្ញាធ្វើការយ៉ាងជិតស្និទ្ធជាមួយ កម្ពុជា

បានផុស

២ years មុន

នៅ

ថ្ងៃអង្គារ ២០ សីហា ២០២៤

ដោយ

ឆ្លើយតបទៅសាររបស់សម្តេចធិបតី ហ៊ុន ម៉ាណែត ដែលអបអរសាទរលោកស្រី ផែថងថាន ចំពោះការឡើងកាន់តំណែងថ្មីជានាយករដ្ឋមន្ត្រីប្រទេសថៃ, កូនស្រីពៅលោក ថាក់ស៊ីន ស៊ីណាវ៉ាត្រា បានថ្លែងអំណរគុណយ៉ាងក្រៃលែងដល់នាយករដ្ឋមន្ត្រីកម្ពុជា ហើយគូសបញ្ជាក់ជាថ្មី អំពីមិត្តភាពយ៉ាងជិតស្និទ្ធនិងភាពជាដៃគូយុទ្ធសាស្រ្ត រវាងប្រទេសទាំងពីរ។

លោកស្រី ផែថងថាន (ឆ្វេង) ជាមួយសម្តេច ហ៊ុន ម៉ាណែត (រូបថត៖ Thairath)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ខណៈខួបលើកទី៧៥នៃការបង្កើតទំនាក់ទំនងការទូតកម្ពុជា-ថៃ នឹងឈានចូលមកដល់នៅឆ្នាំក្រោយ, លោកស្រីបានប្តេជ្ញាធ្វើការយ៉ាងជិតស្និទ្ធជាមួយសមភាគីកម្ពុជា ដើម្បីលើកកម្ពស់ទំនាក់ទំនងទ្វេភាគី។

សូមបញ្ជាក់ជាថ្មី កាលពីថ្ងៃសុក្រទី១៦ខែសីហាឆ្នាំ២០២៤ រដ្ឋសភាថៃ បានបោះឆ្នោតជ្រើសតាំងលោកស្រី ផែថងថាន ស៊ីណាវ៉ាត្រា អាយុ៣៧ឆ្នាំ ឲ្យក្លាយជានាយករដ្ឋមន្ត្រីទី៣១ ហើយការឡើងកាន់តំណែងនេះ ធ្វើឲ្យលោកស្រីបង្កើតប្រវត្តិសាស្រ្តថៃ ក្នុងនាមជា នាយករដ្ឋមន្ត្រីមានវ័យក្មេងជាងគេបំផុតរបស់ប្រទេស។

ក្នុងការបោះឆ្នោតរបស់រដ្ឋសភា លោកស្រីផែថងថាន ទទួលបានសំឡេងគាំទ្រ៣១៩ ប្រឆាំង១៤៥ និងអនុបវាទ២៧សំឡេង។

ផែថងថាន ឬមានឈ្មោះហៅក្រៅថា Ung Ing គឺជាសមាជិកទី៣ខៃគ្រួសារត្រកូលថាក់ស៊ីន ដែលឡើងកាន់តំណែងកំពូលរបស់ប្រទេសថៃ។ លោកស្រីក្តាប់បានអំណាចនេះ ក្រោយពេលអតីតនាយករដ្ឋមន្ត្រីមកពីគណបក្សភឿថៃដូចគ្នាគឺលោក សេដ្ឋា ថាវីស៊ីន ត្រូវបានតុលាការធម្មនុញ្ញា ចេញសាលក្រមដកតំណែង ជុំវិញការតែងតាំងទណ្ឌិត ឲ្យចូលធ្វើការក្នុងគណៈរដ្ឋមន្ត្រី។

លោកស្រីផែថងថាន កើតនៅថ្ងៃទី២១ខែសីហាឆ្នាំ១៩៨៦ ហើយមានប្រវត្តិរៀនសូត្រខាងវិទ្យាសាស្រ្តនយោបាយ គ្រប់គ្រងធុរកិច្ចនិងជាអ្នកជំនួញ មុនប្រឡូកចូលក្នុងវិស័យនយោបាយដ៏លេចធ្លោមុនការបោះឆ្នោតសកលឆ្នាំ២០២៣។

លោកស្រី ក៏ធ្លាប់អមដំណើរឪពុកលោក ថាក់ស៊ីន ស៊ីណាវ៉ាត្រា ជាលក្ខណៈគ្រួសារ មកកាន់កម្ពុជាកាលខែមីនាឆ្នាំ២០២៤ ដើម្បីជួបជុំសួរសុខទុក្ខជាលក្ខណៈមិត្តភាពផង និងជាគ្រួសារផង ជាមួយសម្តេចតេជោ ហ៊ុន សែន៕

អត្ថបទ៖ សុខ សុវណ្ណ

ចុចអាន៖ លោក ថាក់ស៊ីន ចាំឈរនៅពីក្រោយ ផ្តល់ដំបូន្មានដល់ កូនស្រីពៅ