រថយន្តក្រុងធ្វើដំណើរពីប៉ាគីស្ថាន ទៅអ៊ីរ៉ាក់ ក្រឡាប់នៅអ៊ីរ៉ង់ ស្លាប់មនុស្ស ២៨នាក់

តាមការចុះផ្សាយរបស់ BBC នៅថ្ងៃពុធទី២១ខែសីហាឆ្នាំ២០២៤ រថយន្តក្រុងដឹកអ្នកធ្វើធម្មយាត្រា Shia ៥១នាក់ ចេញពីប្រទេសប៉ាគីស្ថាន ឆ្ពោះទៅអ៊ីរ៉ាក់ដើម្បីចូលរួមពិធី Arbaeen ​បានជួបគ្រោះថ្នាក់ចរាចរណ៍ដ៏រន្ធត់នៅកណ្តាលប្រទេសអ៊ីរ៉ង់ ដោយសម្លាប់មនុស្សចំនួន២៨នាក់ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទន្ទឹមនោះ ទីភ្នាក់ងារសារព័ត៌មានរដ្ឋ IRNA បានឲ្យដឹងថា សោកនាដកម្មនេះ បានកើតឡើងកាលពីយប់ថ្ងៃអង្គារក្នុងខេត្ត Yazd ភាគកណ្តាលប្រទេសអ៊ីរ៉ង់ ហើយក្រៅពីអ្នកស្លាប់ ក៏មានមនុស្ស២៣នាក់ផ្សេងទៀត រងរបួសផងដែរ។

នាយកផ្នែកគ្រប់គ្រងវិបត្តិរបស់ប្រទេសអ៊ីរ៉ង់ លោក Ali Malekzadeh ប្រាប់ទៅអ្នកកាសែតថា រថយន្តបានឆាបឆេះនៅមុខប៉ុស្តិត្រួតពិនិត្យ Dehshir-Taft​ រួចក៏រេចង្កូតធ្លាក់ផ្លូវក្រឡាប់ ខណៈអ្នកបើកបរមិនអាចគ្រប់គ្រងស្ថានការណ៍បានទេ ព្រោះរថយន្តមានល្បឿនលឿនពេក។

សូមបញ្ជាក់ថា អ៊ីរ៉ង់ ស្ថិតក្នុងចំណោមប្រទេសដែលមានកំណត់ត្រាសុវត្ថិភាពចរាចរណ៍មិនល្អនៅលើពិភពលោក ដោយមានមនុស្សស្លាប់ប្រហែល ១៧ ០០០នាក់ក្នុងមួយឆ្នាំៗ។

តួលេខមនុស្សស្លាប់ដ៏ច្រើនបែបនេះ គឺត្រូវបានគេស្តីបន្ទោសទៅលើការមិនគោរពច្បាប់ចរាចរណ៍ យានយន្តគ្មានសុវត្ថិភាព និងសេវាសង្គ្រោះបន្ទាន់មិនគ្រប់គ្រាន់នៅតាមតំបន់ជនបទ៕

អត្ថបទ៖ សុខ សុវណ្ណ

ចុចអាន៖ រថយន្ត​នាំ​មុខ​ក្បួន​ប្រតិភូ​អតីត​យុទ្ធជន ​បុក​ជាមួយ​រថយន្ត​បែន​ដឹក​ដី​ពេញទំហឹង​ បណ្តាល​ឱ្យ​មាន​មនុស្ស​របួសធ្ងន់​ស្រាល​២​នាក់