ប្រតិភូ​ Gumball 3000 ដក់ចិត្តជាមួយនឹងការស្វាគមន៍របស់កម្ពុជា ហើយសន្យាថា​ “នឹងមិនភ្លេចកម្ពុជាឡើយ”

មុនចាកចេញពីទឹកដីកម្ពុជា​ ប្រតិភូ​ Gumball 3000​ បានបង្ហាញនូវរូបភាពជាច្រើន​ពីសកម្មភាពផ្សេងៗ​ ក្នុងព្រឹត្តិការណ៍ខួប ២៥ឆ្នាំរបស់ខ្លួន ផ្សារភ្ជាប់ជាមួយពាក្យពេចន៍កោតសរសើរ​ និងអរគុណកម្ពុជា​ ដែលធ្វើឱ្យក្រុមខ្លួនមានពេលវេលាដ៏រំភើប​មិនធ្លាប់មាន និងមិនអាចបំភ្លេចបាន។

តាមរយៈហ្វេសប៊ុកផេកផ្លូវការ Gumball 3000 ទិដ្ឋភាពជាច្រើនដែលបង្អួតពីកម្ពុជា​ បានបង្ហាញជាបន្តបន្ទាប់ទៅកាន់ពិភពលោក​ ភ្ជាប់ជាមួយនឹងសំណេររៀបរាប់ពីអារម្មណ៍រីករាយ ដែលបានមកកាន់ទឹកដីព្រះរាជាណាចក្រកម្ពុជា និងទទួលបានការស្វាគមន៍ដ៏កក់ក្តៅ ទាំងពីថ្នាក់ដឹកនាំក្រសួង-ស្ថាប័ននានា​ និងពលរដ្ឋកម្ពុជា។​

ប្រភពដដែលបញ្ជាក់ថា​ អ្វីដែលអស្ចារ្យបំផុតសម្រាប់ក្រុមប្រតិភូ Gumball 3000 គឺពិធីស្វាគមន៍អាហារល្ងាច​ដោយមានបង្ហាញនូវផ្ទាំងទស្សនីយភាពសិល្បៈបុរាណខ្មែរ មុខប្រាសាទបាយ័ន និងជារាត្រីដែលមិនអាចបំភ្លេចបាន​ សម្រាប់ក្រុមរបស់ខ្លួន។ គួរជម្រាបដែរថា ក្នុងការចូលរួមទស្សនាការសម្តែងសិល្បៈបុរាណខ្មែរនេះ​ ក្រុមប្រតិភូ Gumball 3000 ក៏បានស្លៀកសម្លៀកបំពាក់ប្រពៃណីខ្មែរផងដែរ។

ក្រៅពីភាពភ្ញាក់ផ្អើលនេះ​​ ក្រុមប្រតិភូ Gumball 3000 ក៏បានធ្វើរឿងដ៏អស្ចារ្យជាមួយកម្ពុជា​ គឺការបំបែកកំណត់ត្រា «ការតាំងបង្ហាញរថយន្តទំនើបច្រើនបំផុតលើពិភពលោក» មុននឹងបន្តដំណើរទៅប្រទេសក្នុងតំបន់អាសុីបន្ទាប់ទៀត ជាមួយនឹងក្តីសង្ឃឹមថា​ “នឹងអាចធ្វើបាន” ខណៈគណៈកម្មការ Guinness World Record បានរាប់ចំនួនរថយន្តប្រណិតទាំងនោះរួចទៅហើយ។

ដោយឡែក ភាពភ្ញាក់ផ្អើលចុងក្រោយដែលប្រតិភូ Gumball 3000 ទទួលបានពីកម្ពុជា​ មុននឹងចាកចេញបន្តដំណើរទៅកាន់ប្រទេសថៃ គឺការការពារយ៉៉ាងល្អពីសំណាក់កងកម្លាំងមានសមត្ថកិច្ចកម្ពុជា ដោយបានសម្រួលការធ្វើដំណើររបស់ក្រុមប្រតិភូ រហូតដល់ច្រកទ្វារព្រំដែនអន្តរជាតិប៉ោយប៉ែត និងពលរដ្ឋយ៉ាងច្រើនកុះករអមសងខាងផ្លូវស្វាគមន៍ ទន្ទឹមនឹងការជូនដំណើរក្រុមប្រតិភូ។

គួររម្លឹកថា ព្រឹត្តិការណ៍ដ៏អស្ចារ្យនេះ ប្រមូលផ្ដុំទៅដោយរថយន្ត Supercar និងកំពូលរថយន្តប្រណិតៗ ពីសំណាក់ជនមានឥទ្ធិពល ធុរជន កីឡាករ និងកំពូលតារាលំដាប់ពិភពលោក មកជួបជុំគ្នានៅកម្ពុជា។ ព្រឹត្តិការណ៍នេះ មិនត្រឹមជាការជួបជុំរថយន្តប្រណិតប៉ុណ្ណោះទេ គឺបានជួយផ្សព្វផ្សាយពីវិស័យទេសចរណ៍កម្ពុជា និងស្វែងរកថវិកាពីសប្បុរសជន ជូនដល់មន្ទីរពេទ្យកុមារអង្គរ ខេត្តសៀមរាប។ ​ក្នុងនោះ ឧកញ៉ា​ លាង ពៅ អគ្គនាយកក្រុមហ៊ុន​ ជីបម៉ុង បានចាយថវិកាផ្ទាល់ខ្លួនរាប់ម៉ឺនដុល្លារ ដើម្បីចូលរួមចំណែកលើកស្ទួយមុខមាត់ប្រទេសជាតិ៕