ព្រឹត្តិការណ៍ Gumball 3000 រៃអង្គាសថវិកាបានជិតកន្លះលានដុល្លារ ជូនមន្ទីរពេទ្យកុមារអង្គរ

សម្តេចនាយករដ្ឋមន្រ្តី ហ៊ុន ម៉ាណែត នៅថ្ងៃទី ៣០ ខែកញ្ញា ឆ្នាំ ២០២៤ នេះ អញ្ជើញចូលរួមពិធីប្រគល់-ទទួល ថវិកា
សប្បុរសជនដែលបរិច្ចាគចំនួន​ ៤៥ ម៉ឺនដុល្លារ​ តាមរយ:ក្រុមហ៊ុនជីបម៉ុងគ្រុប ដើម្បីផ្ដល់ជូនមន្ទីរពេទ្យកុមារអង្គរ ដោយទទួលបានពីការចូលរួមនៃព្រឹត្តិការណ៍ Gumball 3000 កន្លងមក​។

ព្រឹត្តិការណ៍ Gumball 3000 Rally បានប្រព្រឹត្តទៅនៅកម្ពុជារយៈពេល ៣ថ្ងៃ គឺចាប់ពីថ្ងៃទី១៥-១៧ ខែកញ្ញា ឆ្នាំ២០២៤ ដោយមានកំពូលតារាលំដាប់ពិភពលោក ធុរជន ក្រុមកីឡាករល្បីៗ និងYoutuber អន្តរជាតិ មកពី
៤០ប្រទេស ចូលរួមដឹកនាំដោយលោក Maximillion Cooper នាយកប្រតិបត្តិ និងជាស្ថាបនិក Gumball 3000 ផ្ទាល់។

ជាលើកដំបូងហើយសម្រាប់កម្ពុជា ក្នុងការរៀបចំព្រឹត្តិការណ៍អន្តរជាតិដ៏ធំនេះ ដែលមិនត្រឹមជាព្រឹត្តិការណ៍ជួបជុំក្បួន រថយន្តអន្តរជាតិ Gumball 3000 Rally លើកទី២៥ ប៉ុណ្ណោះទេ តែធ្វើឡើងក្នុងគោលដៅធំ ៤ គឺដើម្បីផ្សព្វផ្សាយ វិស័យទេសចរណ៍នៅកម្ពុជា; ជាយុទ្ធនាការសប្បុរសធម៌ ដើម្បីរៃអង្គាសថវិកាជួយដល់ មន្ទីរពេទ្យកុមារអង្គរ; បើកឱកាស ឱ្យវិនិយោគិនបរទេស និងវិនិយោគិនក្នុងស្រុកបានជួបគ្នា។

គួររំឭកថា ព្រឹត្តិការណ៍ Gumball 3000 Rally ជាការរៀបចំដោយឧកញ៉ា លាង ពៅ អគ្គនាយកពហុពាណិជ្ជកម្ម និងជាសមាជិកក្រុមប្រឹក្សាភិបាល ក្រុមហ៊ុន ជីប ម៉ុង សហការជាមួយក្រសួងទេសចរណ៍ និងស្ថាប័នពាក់ព័ន្ធនានា ជាអ្នករ៉ាប់រងទាំងស្រុង ដោយមិនប្រើប្រាស់ថវិកាដែលសប្បុរសជនបរិច្ចាគ ទៅកាន់មន្ទីរពេទ្យកុមារអង្គរឡើយ៕