ក្រុមប្រតិភូ Gumball 3000 ស្លៀកពាក់ប្រពៃណីខ្មែរ យប់មិញនេះ ជាចំណែកចូលរួមផ្សព្វផ្សាយអរិយធម៌ខ្មែរ

វត្តមានរបស់ក្រុមប្រតិភូ Gumball 3000 លើទឹកអង្គរកាលពីយប់ថ្ងៃទី១៦ ខែកញ្ញានេះ គឺទទួលបានស្វាគមន៍យ៉ាងកក់ក្តៅ ពីរដ្ឋមន្ត្រីក្រសួងនិងស្ថាប័ននានា។ ក្នុងនោះ ក្រសួងទេសចរណ៍ និងមន្ទីរពាក់ព័ន្ធ បានរៀបចំនូវផ្ទាំងទស្សនីយភាពសិល្បៈបុរាណ ដោយដកស្រង់ឈុតមួយចំនួន មកបង្ហាញភ្ញៀវបរទេសទាំងនេះ បានស្គាល់ពីភាពស្រស់ល្អផូរផង់នៃវប្បធម៌ និងប្រវត្តិសាស្ត្ររបស់កម្ពុជា។

អ្វីដែលកាន់តែពិសេសក្នុងកម្មវិធីស្វាគមន៍នេះ គឺក្រុមប្រតិភូ Gumball 3000 បានចូលរួមដោយស្លៀកឈុតប្រពៃណីខ្មែរ ទស្សនាការសម្តែងសិល្បៈបុរាណ ដែលរៀបចំធ្វើឡើងនៅមុខប្រាសាទបាយ័ន ទឹកដីនៃសៀមរាប និងបានរៀបរាប់ថា “ជារាត្រីដែលមិនអាចបំភ្លេចបាន” ។

សកម្មភាពនេះ ធ្វើឱ្យពលរដ្ឋខ្មែរ ពិសេសថ្នាក់ដឹកនាំគ្រប់ជាន់ថ្នាក់របស់កម្ពុជា មានមោទនភាពផងដែរ ក្នុងនាមជាកូនខ្មែរ។ ផ្សារភ្ជាប់នឹងរូបភាពទាំងនេះ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា “ប្រពៃណីយេីង​ យេីងរក្សា​ យេីងបានផ្សព្វផ្សាយកាន់តែល្បីសុះសាយដល់ពិភពលោក​ ពិសេសបងប្អូនជាភ្ញៀវទេសចរណ៍ជាច្រេីននៃកម្មវិធី​ Gumball 3000​ បានស្លៀកសម្លៀកបំពាក់ប្រពៃណីខ្មែរ និងទស្សនាសិល្ប:បុរាណខ្មែរ​នៅពីមុខប្រាសាទបាយ័នរបស់ខ្មែរ”។

ព្រឹត្តិការណ៍នេះប្រមូលផ្តុំដោយកំពូលតារាជាតិ-អន្តរជាតិល្បីៗ កីឡាករ YouTubers និងជនមានឥទ្ធិពលជុំវិញពិភពលោក ដែលជាប្រតិភូ Gumball 3000 ។ តាមរយៈអ្នកមានឥទ្ធិពលទាំងនេះ កម្ពុជារំពឹងថា នេះជាឱកាសរបស់ក្នុងការទាញយកផលប្រយោជន៍ជាច្រើន អំពីព្រឹត្តិការណ៍នេះ រួមមានការទាំងការផ្សព្វផ្សាយអំពីវប្បធម៌ អរិយធម៌ និងសក្ដានុពលទេសចរណ៍ ទៅកាន់ពិភពលោក។ នេះបើយោងតាមការឲ្យដឹងពីមន្ទីទេសចរណ៍ខេត្ត សៀមរាប៕

អត្ថបទ៖ ចាន់រ៉ា