កម្ពុជាជាប់ចំណាត់ថ្នាក់លេខ១ ជាគោលដៅទេសចរសម្រាប់ឆ្នាំ ២០២៥

យោងតាមការព្យាករណ៍របស់ Skyscanner Travel Trend 2025 កម្ពុជាមានកំណើន​ទេសចរ​ខ្ពស់​បំផុតនៅឆ្នាំ ២០២៥ ក្នុងចំណោមគោលដៅទេសចរណ៍ចំនួន ១០ កន្លែង។

ក្នុងចំណោមគោលដៅទេសចរទាំង ១០ កន្លែង កម្ពុជាមានកំណើន ៥២០% ប្រទេសថៃ មាន​កំ​ណើន ១៤១% ហ្វីលីពីន ១២៥% កូរ៉េខាងត្បូង ១២៣% ប្រទេសហ្វាំងឡង់ ១១៨% ប្រទេស​ប៉េរូ ១១៣% ប្រទេសន័រវែស ១០៧% ប្រទេសកាហ្សាកស្ថាន ៧៧% ទីក្រុង Labuan Bajo នៃ​ប្រទេស ឥណ្ឌូនេស៊ី ៦៦% និងទីក្រុងហ្សាកាតា ៥៥%។

លោក ខៀវ ធី ប្រធាន​សមាគមន៍​មគ្គុទ្ទេសក៏ទេសចរ​អង្គរច្រានចោលតួលេខព្យាករណ៍ខាងលើ ដោយលើកឡើងថា ចំនួនភ្ញៀវទេសចរនៅក្នុងឆ្នាំ ២០២៥ មិនរំពឹងទទួលបានច្រើននោះទេ។

លោក ខៀវ ធី មានប្រសាសន៍ថា៖ «ឆ្នាំ ២០២៥ យើងអត់ទាន់មានភ្ញៀវទេ ហើយ High Season យើងឆ្នាំនេះ ចាប់ពីខែ ១០ ដល់ខែ ៤ ឆ្នាំក្រោយ យើងមានតែខែ ១១ នេះទេ សម្រាប់​មគ្គុទេស​ក៏ទេសចរ អញ្ចឹងការព្យាករណ៍ថា ភ្ញៀវទេសចរឡើងខ្ពស់ជាងថៃ ឥណ្ឌូនេស៊ី ហ្វីលីពីន គឺអត់មានទេ គាត់​ព្យា​ករណ៍​លើកជើងយើងទេ ការកក់សណ្ឋាគារ ផ្ទះសំណាក់ និងសេវាកម្មមគ្គុទេសក៏ទេសចរណ៍​មាន​តែខែ១១»។

យោងតាមក្រសួងទេសចរណ៍ នៅក្នុងរយៈពេល ៩ ខែ ឆ្នាំ ២០២៤ (មករា-កញ្ញា) កម្ពុជា ទទួលបានភ្ញៀវអន្តរ​ជាតិសរុប​ចំនួន​ជាង​ ៤,៨០ លាននាក់ កើនឡើង ២២,២ ភាគរយ បើធៀបនឹង​រយៈ​ពេល​ដូចគ្នាក្នុងឆ្នាំ ២០២៣ ដែលមានចំនួន ៣,៩២ លាននាក់៕

អត្ថបទ៖ ឡេង ដេត