ឈ្មួញ​ឈរ​ជើងនៅ​ក្រុង​ក្រចេះ បង្ហើបតម្លៃទិញ​ស្រូវ​​ពី​កសិករ​ ធ្លាក់ថ្លៃជាង​ឆ្នាំមុន

ស្រូវផ្ការំដួលដែល​ជាពូជស្រូវអង្ករល្អរបស់កម្ពុជា និងធ្លាប់មានតម្លៃសមរម្យនៅលើទីផ្សារជាតិនិងអន្តរជាតិនាពេលកន្លង​មក ប៉ុន្តែហាក់បីដូចជាមានការធ្លាក់ចុះបន្តិចនៅ​ពេលនេះ។

លោក ទ្រូ ហុល ជាឈ្មួញឈរជើងប្រមូលបញ្ជាទិញស្រូវនៅភូមិកាប៉ូ នៅ​សង្កាត់អូឬស្សី ក្រុងក្រចេះ ខេត្តក្រចេះ​បានឲ្យកម្ពុជាថ្មី​ដឹងថា តម្លៃទីផ្សារស្រូវផ្ការំដួលសព្វថ្ងៃនេះ លោកប្រមូលទិញក្នុងតម្លៃចម្លោះពី ១ ២០០រៀល ទៅ ១ ២១០រៀល ក្នុង ១ គីឡូក្រាម ខណៈ​ស្រូវចម្រុះតម្លៃចន្លោះ​ពី ៩០០ រៀល ទៅ ៩២០ រៀល។

តម្លៃស្រូវផ្ការំដួលឆ្នាំនេះ មានការធ្លាក់ចុះបន្តិចបន្តួច បើប្រៀបធៀបនឹងឆ្នាំមុន។ នេះបើតាមឈ្មួញ​ដដែល​ប្រាប់​ឲ្យ​ដឹង​។

ចំពោះតម្លៃស្រូវចម្រុះ មានដូចជា ចម្រើនផល នាងអំ ភេន ជាដើម តម្លៃធ្លាក់ពីជាង ១ ២០០រៀល មកនៅត្រឹមជាង ៩០០ រៀល។

លោក ទ្រូ ហុល បានបញ្ជាក់ថា ក្នុង១ថ្ងៃ លោកអាចប្រមូលទិញស្រូវបានចាប់ពី ១៣០ តោន ទៅ ១៤០ តោន នឹងបាននាំយកទៅលក់នៅប្រទេសវៀតណាមមួយចំនួន និងមួយចំនួនទៀតយកទៅលក់ឲ្យរោងម៉ាស៊ីកិនស្រូវធំនៅខេត្តកំពង់ចាម​។

ជុំវិញតម្លៃស្រូវធ្លាក់ថ្លៃ​នេះ កម្ពុជា​ថ្មី​បាន​ទំនាក់ទំនង​ទៅស្ថាប័ន​ពាក់ព័ន្ធ​ជាពិសេស​​មន្ទីរកសិកម្ម​ខេត្ត​ក្រចេះ ​ប៉ុន្តែ​នៅ​មិន​ទាន់​មានការ​ឆ្លើយតប​នៅឡើយទេ៕

អត្ថបទ៖ ប្រុញ វិធិន