ខេត្តសៀមរាប៖ ក្រុមកីឡាករ កីឡាការិនីអុំទូក កំពុងហាត់សមយ៉ាងសកម្ម ដើម្បីត្រៀមប្រណាំងទូកនៅថ្ងៃស្អែកនេះ

រដ្ឋបាលខេត្តសៀមរាប នឹងរៀបចំព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក រយៈពេល៣ថ្ងៃចាប់ពីថ្ងៃទី១៤ដល់ ថ្ងៃទី១៦ ខែវិច្ឆិកា ឆ្នាំ២០២៤។ មុនការប្រណាំងទូកនេះមកដល់ ក្រុមកីឡាក កីឡាការិនីអុំទូក កំពុងតែធ្វើការហាត់សមយ៉ាងយកចិត្តទុកដាក់ ដើម្បីត្រៀមប្រកួតយកជ័យជម្នះ។

ចំណែក ការរៀបចំផ្សេងៗសម្រាប់ព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុកនេះ លោក លី វណ្ណៈ អ្នកនាំពាក្យ និងនាយករដ្ឋបាលខេត្តសៀមរាប បានឱ្យដឹងថា រហូតមកដល់ពេលនេះ ការរៀបចំតាមទីតាំងនីមួយៗ គឺស្ទើតែរួចរាល់ទាំងស្រុងហើយ ដោយនៅសល់ការងារតិចតួចដែលក្រុមការងារកំពុងតែបង្ហើយ។លោកបានបន្តថា ដោយសារតែនៅក្នុងខេត្តសៀមរាបឆ្នាំនេះ ក៏មានការរៀបចំព្រះរាជពិធីបុណ្យអុំទូកដូចនៅរាជធានីភ្នំពេញដែរ ភ្ញៀវទេសចរ អាចនឹងមកកម្សាន្តច្រើន ព្រោះថា ក្រៅពីបានទស្សនាកម្សាន្តកម្មវិធីប្រណាំងទូក នៅតាមដងស្ទឹងសៀមរាប និងកម្មវិធីកម្សាន្តផ្សេងៗជាច្រើនទៀតផងនោះ ភ្ញៀវទេសចរ ក៏បានទៅកម្សាន្តនៅតំបន់ប្រាសាទបុរាណ តំបន់ភ្នំគូលែន តំបន់បឹងទន្លេ​សាប និងសហគមន៍ទេសចរណ៍ជាច្រើន។

ជាមួយគ្នានេះ អាជ្ញាធរ ក៏បានធ្វើការណែនាំឱ្យម្ចាស់កន្លែងផ្តល់សេវាកម្មទេសចរណ៍ទាំងអស់ ដូចជា សេវាកម្មស្នាក់នៅ សេវាកម្មម្ហូបអាហារ និងសេវាកម្មដឹកជញ្ជូន មិនឱ្យធ្វើការដំឡើងថ្លៃនោះទេ ដើម្បីធ្វើយ៉ាងណាឱ្យភ្ញៀវទេសចរដែលមានមកកម្សាន្តនៅខេត្តសៀមរាបបានសប្បាយ និងពេញចិត្តចំពោះការផ្តល់សេវាទេសចរណ៍។ លោករំពឹងថា កម្មវិធីប្រណាំងទូកនៅស្ទឹងសៀមរាបនេះ នឹងមានភ្ញៀវទេសចរមកកម្សាន្តច្រើន នឹងបង្កើនចំណូលដល់ប្រជាពលរដ្ឋនៅក្នុងខេត្ត ជាពិសេស ប្រតិបត្តិករទេសចរ៕

ដោយ៖ ជុន កុសល