ឃាត់ខ្លួនជនដៃដល់ក្នុងសំណុំរឿងប៉ុនប៉ងឃាតកម្មលើបុរសម្នាក់កាលពីជាងមួយខែមុន

កម្លាំងនគរបាលនៃស្នងការដ្ឋាននគរបាលរាជធានីភ្នំពេញ បានសហការជាមួយកម្លាំងជំនាញនៃអធិការដ្ឋាននគរបាលខណ្ឌដង្កោ និងកម្លាំងនគរបាលខេត្តស្វាយរៀង បានស្រាវជ្រាវឃាត់ខ្លួនជនដៃដល់ម្នាក់ក្នុងសុំណុំរឿងប៉ុនប៉ងឃាតកម្ម​លើបុរសម្នាក់បណ្ដាលឲ្យរងរបួសធ្ងន់រហូតបញ្ជូនទៅសង្គ្រោះនៅប្រទេសវៀតណាម។

ប្រតិបត្តិការឃាត់ខ្លួនជនដៃដល់នេះបានធ្វើឡើងជាបន្តបន្ទាប់រហូតដល់ថ្ងៃទី៩ ខែធ្នូ ម្សិលមិញនេះទើបឃាត់ខ្លួនជនដៃដល់បាននៅក្រុងបាវិត ខេត្តស្វាយរៀង។

បើតាមលោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនៃស្នងការដ្ឋាននគរបាលរាជធានីភ្នំពេញ បានឲ្យដឹងនៅថ្ងៃទី១០ធ្នូនេះថា ករណីនេះកើតឡើងដោយសាជនរងគ្រោះខ្លួនឯងផងដែរ​ គឺកើតរឿងឡើងដោយសាស្រ្តីម្នាក់គាត់មានទំនាក់ទំនងច្រើន តែទោះយ៉ាងណាលោកសុំមិនបញ្ចេញឈ្មោះ និងរូបភាពនោះទេ។

ជាមួយគ្នានេះ លោកស្នងការរាជធានីភ្នំពេញ ក៏បានជម្រាបដល់មហាជនថា «មានករណីកើតឡើងយើងខ្ញុំមិនដែលទុកចោលនោះទេ ខ្ញុំតាមដានដឹកនាំជំនាញជាប្រចាំក្នុងការស្រាវជ្រាវ ឱ្យខានតែបាន»។ លោកបន្ថែមថា «សមត្ថកិច្ចយើងខ្ញុំអនុវត្តភារកិច្ចតាមជំនាញវិជ្ជាជីវៈ​ និងវិធានច្បាប់ គឺមិនមែនអនុវត្តតាមអារម្មណ៍នោះទេ»។ ការលើកឡើងបែបនេះ គឺជាការឆ្លើយតបទៅម្ចាស់អាខោនហ្វេសប៊ុកឈ្មោះ យឹម ដារិទ្ឋ​ ដែលជាជនរងគ្រោះក្រោយពីលោកបង្ហោះសារនៅលើបណ្ដាញសង្គមបែបឌឺដងមកលើសមត្ថកិច្ចថាអនុវត្តមិនបាន។

សូមរំលឹកថា ករណីប៉ុនប៉ងឃាតកម្មលើជនរងគ្រោះនេះ បានកើតហេតុកាលពីវេលាម៉ោង៥និង​៣០នាទី​ល្ងាច​ ថ្ងៃ​ទី​៦ ខែ​វិច្ឆិកា​ ឆ្នាំ​២០២៤​ ទល់មុខ​សាលា​សុវណ្ណ​ភូមិ​ ផ្លូវ​បេតុង ភូមិ​ម័ល​ សង្កាត់​ដង្កោ​ ខណ្ឌ​ដង្កោ​ រាជធានី​ភ្នំពេញ​។

មុនកើតហេតុគេបានឃើញបុរសជនរងគ្រោះជិះម៉ាក​ស្កុប​ពី​ ពណ៌​ស​ ពាក់ស្លាកលេខ​ ភ្នំពេញ​ 1KL 7494 មួយគ្រឿងបើកមកឈប់នៅទីតាំងកើតហេតុ ហើយបានចុះ​ពី​លើ​ម៉ូតូ​ទៅ​គោះ​ទ្វារ​រថយន្ត​មួយ​គ្រឿង​ដែល​បេីក​ដោយ​ស្ត្រី​ម្នាក់​ ខណៈ​គោះ​ទ្វារ​រថយន្ត​បាន​ពី​ដង​ក៏ស្រាប់តែមានបុរសម្នាក់បិទ​ម៉ាស​ មិន​ដឹង​ថា​ គំគួន​ ហើយ​មក​ចាំ​តាំង​ពី​ពេល​ណា​នោះ​ទេ​ បានយកពូថៅកាប់ទៅលើជនរងគ្រោះ​៣ទៅ​៤ពូ​ថៅ​ បណ្ដាលឲ្យត្រូវជនរងគ្រោះ​រង​របួស​ត្រង់​ក្បាល​ហូរឈាម​ស្រោច​ខ្លួន​ រងរបួសធ្ងន់ត្រូវបានរបស់ពលរដ្ឋដឹកតាមម៉ូតូកង់បីយកទៅសង្គ្រោះនៅឯមន្ទីរពេទ្យ​ ចំណែកជនបង្កគេចខ្លួនបាត់៕

អត្ថបទ៖ សំណាង