គិតគួរ​ដល់​សុវត្ថិភាពសិស្ស សាលាបឋមសិក្សាអញ្ចាញ​ ទប់ស្កាត់ការ​លក់​ចំណីអាហារ ភេសជ្ជៈ​ផ្អែម​​ប៉ះពាល់​សុខភាព

គណៈកម្មការគ្រប់គ្រងសាលានៅក្នុងឃុំដារ ស្រុកចិត្របុរី ខេត្តក្រចេះ បាននឹងកំពុងយកចិត្តទុកដាក់ចំពោះបញ្ហាសុខភាពរបស់សិស្ស បន្ទាប់ពីរាជរដ្ឋាភិបាលក៏ដូចជាក្រសួងសុខាភិបាល បានណែនាំអំពីបញ្ហាសុខភាពរបស់កុមារ ក្រោមអាយុ ១៨ ឆ្នាំ កើតជំងឺទឹកនោមផ្អែមមានការកើនឡើង ដោយសាររងផលប៉ះពាល់ពីការបរិភោគភេសជ្ជៈផ្អែម ឬភេសជ្ជៈប៉ូវ​កំលាំងផ្សេងៗ។

ដើម្បី​ចួលរួមជាមួយរាជរដ្ឋាភិបាល ក៏ដូចជាក្រសួងសុខាភិបាល ក្រសួងអប់រំ យុវជន និងកីឡា សាលាបឋមសិក្សាអញ្ចាញ ស្ថិតនៅភូមិអញ្ចាញ ក្នុងឃុំដារ ស្រុកចិត្របុរី តែងតែចុះផ្សព្វផ្សាយណែនាំដល់អាជីវករលក់ដូរនៅក្នុងបរិវេណសាលា និងមានការត្រួតពិនិត្យជាប្រចាំអ្វីដែលពាក់ព័ន្ធជាមួយចំណីអាហារ ជាពិសេសភេសជ្ជៈផ្សេងៗ។ នេះតាមការឲ្យដឹងពីលោក ស៊ុន សុភក្ត្រ័ នាយករងសាលាបឋមសិក្សាអញ្ចាញ បានឲ្យកម្ពុជាថ្មីដឹងនៅថ្ងៃទី១៥ ខែមករា ឆ្នាំ​២០២៥។

កន្លងមកគណៈកម្មការគ្រប់គ្រងសាលា តែងតែផ្សព្វផ្សាយជូនសិស្សានុសិស្សទាំងអស់ ពាក់ព័ន្ធចំណីអាហារណាដែលគួរបរិភោគ ឬមិនគួរបរិភោគ ភេសជ្ជៈប៉ូវកំលាំងផ្សេងៗដែលផ្ទុះនូវជំងឺផ្សេងៗ ជាពិសេសជំងឺទឹកនោមផ្អែម ដែលកន្លងមក​កើតមានឡើងច្រើន។ លោក ស៊ុន សុភក្ត្រ័ បានឲ្យដឹងបន្ថែម ។

ទន្ទឹមនឹងការផ្សព្វផ្សាយណែនាំអំពីសុវត្ថិភាពចំណីអាហារ ភេសជ្ជៈ លោកនាយករងបានបញ្ជាក់ថា ក៏មានការចូលរួមពីអាជីវករលក់ដូរ និងគណៈកម្មការសុខភាពសាលា ដោយចុះត្រួតពិនិត្យជាប្រចាំផងដែរ ។

ជំនួសមុខឲ្យលោកនាយកសាលា លោកបានអំពាវនាវដល់អាណាព្យាបាល មាតាបិតាសិស្ស ទាំងអស់ឲ្យជួយតាមដាននូវអ្វីដែលកូនៗគួរបរិភោគ ជាពិសេស ចំណីអាហារណា ដែលប៉ះពាល់ដល់សុខភាពរបស់ពួកគាត់ គឺត្រូវតាមដាន និងជួយពួកគាត់កុំឲ្យមានបញ្ហា សុខភាពតាំងពីក្មេងទៅ គឺនាំឲ្យពិបាកនៅពេលអនាគត។

ក្នុងនាមតំណាងអាណាព្យាបាលសិស្ស លោក ឃុត កុម្ភៈ បានបង្ហាញចំណាប់អារម្មណ៍យល់ឃើញថា ទាក់ទងចំណីអាហារដែលផ្គត់ផ្គង់ទៅដល់សិស្សនោះ គឺហាមមិនឲ្យអ្នកលក់ចំណីអាហារដែលមានសារធាតុផ្អែម ដូចជា គ្រឿងកំប៉ុង ប្រហិត និងចំណីអាហារហួសកាលបរិច្ឆេទកំណត់ គឺសាលាបានណែនាំពួកគាត់មិនឲ្យលក់ដូរទៅឲ្យក្មេងៗសម្រាប់បរិភោគឡើយ ពីព្រោះធ្វើឲ្យប៉ះពាល់សុខភាពសិស្ស ហើយផលប៉ះពាល់នេះមិនមែនរយៈពេលខ្លីទេ គឺប៉ះពាល់រយៈពេលវែង ដែលអាចធ្វើឲ្យក្មេងអាយុក្រោម ១៣ ទៅ ១៤ឆ្នាំ កើតជំងឺទឹកនោផ្អែម។

ជាមួយគ្នានោះដែរ អាជីវករលក់ដូរចំណីអាហារក្នុងសាលារៀនបឋមសិក្សាអញ្ចាញ ក៏បានប្រាប់ឲ្យដឹងថា ពួកគាត់បានចូលរួមអនុវត្តតាមការណែនាំរបស់គណៈកម្មការគ្រប់គ្រង សាលា គឺមិនលក់ភេសជ្ជៈផ្អែម ឬភេសជ្ជៈប៉ូវកម្លាំងឲ្យកូនសិស្សជាដាច់ខាត ដោយយល់ដឹង និងព្រួយបារម្ភអំពីបញ្ហាសុខភាពរបស់សិស្សនាពេលអនាគត៕

អត្ថបទ៖ ប្រុញ វិធិន