សម្រស់ស្ទឹងថ្វាក ក្លាយជារមណីយដ្ឋានធម្មជាតិ ដ៏ពេញនិយមទាក់ទាញភ្ញៀវមកលេងកម្សាន្តឥតដាច់

ស្ទឹងថ្វាក ​គឺ​ជា​ដងស្ទឹងសង្កែ​ដែល​បាន​កែច្នៃ​ចេញជាបែប​ធម្មជាតិ បាននិងកំពុង​ក្លាយ​គោលដៅ​ទេសចរណ៍​មួយ​ដ៏​សំខាន់​ក្នុងចំណោមគោលដៅ​ទេសចរណ៍​ជា​ច្រើន​របស់ស្រុករតនមណ្ឌល ខេត្តបាត់ដំបង និង​បាន​ទាក់ទាញ​ភ្ញៀវ​​​ទេសចរ​មក​ពីទីជិតឆ្ងាយ​ទៅ​លេង​កម្សាន្ត​ឥតដាច់។

តំបន់​រមណីយ​ដ្ឋានទេសចរណ៍​មួយនេះ បាន​និង​កំពុង​ស្ថិត​ក្នុង​ក្រសែ​ភ្នែក​អ្នកទេសចរ​​មក​គយគន់​ទេសភាព​ដ៏​ស្រស់បំព្រង និង​ងូតទឹក​លេង ជា​ហូរហែ​​ពីមួយថ្ងៃទៅមួយថ្ងៃ ជា​មួយនិង​មុខ​ម្ហូប​ដ៏សម្បូរបែប តាមរយៈ​ស្នាដៃ​កូនអ្នក​ខេត្ត​បាត់ដំបង។

ប្រជាពលរដ្ឋដែល​ជាអ្នករស់​នៅ​ក្នុង​ស្រុក​រតនមណ្ឌល បាន​មាន​ឲ្យដឹងថា នៅ​តំបន់រមនីយដ្ឋាន ស្ទឹងថ្វាក នេះមិនដែល​អាក់ខាន​ឡើយ​សម្រាប់ភ្ញៀវមក​លេងកម្សាន្ត សូម្បីតែអ្នក​នៅក្នុងស្រុក​ក៏​នាំគ្នាមក​លំហែរកាយ​ជាបន្តបន្ទាប់រាល់ចុងសប្តាហ៍ ក្នុងនោះ​ភាគច្រើន​មានអ្នក​ពីចម្ងាយ និង​ជនបរទេស​ក៏មានជាហូហែរផងដែរ។

អ្នកស្រី ចិន្តា បានប្រាប់ថា រៀង​រាល់ចុងសប្តាហ៍ គឺថ្ងៃសៅរ៍ ឬថ្ងៃអាទិត្យ ក្រុម​គ្រួសារ​អ្នកស្រីតែង​ទៅលំហែរកាយ​​ជានិច្ច ដើម្បីបំបាត់ក្តីកង្វល់ ​ព្រោះ​នៅ​ទីនោះ​ក៏មាន​មុខម្ហូបច្រើនតាម​តម្រូវ​ការ​ពីភ្ញៀវបានកម្ម៉ង់ មិនចាញ់​ម្ហូបនៅតាមហាង​ធំៗមួយចំនួនក្នុងក្រុងនោះទេ ជាពិសេស​ភ្ញៀវទេសចរអន្តរជាតិ ក៏ពេញ​និយមម្ហូប​អាហារ​នៅទី​នោះ​ដែរ​។

មន្ត្រី​រដ្ឋបាល​សាលា​ស្រុក បាន​ចាត់​ទុកថា ការកើន​ឡើង​នៃ​ចំនួន​​ភ្ញៀវទេសចរមកលេង​កម្សាន្តក្នុង​មូលដ្ឋានកាន់​តែច្រើន​នេះ អាចធ្វើឲ្យ​កម្រិតសេដ្ឋកិច្ចគ្រួសារ​របស់ប្រជាពលរដ្ឋ ដែល​រស់​នៅក្បែរតំបន់នោះ​កាន់តែប្រសើឡើង តាមរយៈ​លក់ដូរនំចំណី ឬ​ម្ហូបអាហារ​ផ្សេងៗ រួម​និង​និន្នផល​កសិកម្ម​នានា​ផងដែរ​។

មន្ត្រីដដែល សំណូមពរ​ដល់​អ្នកគ្រប់គ្រងត្រូវ គ្រប់គ្រង​ផ្នែកអនាម័យ​ឲ្យ​ខាន​តែបាន ព្រោះទឹកស្ទឹង​ក៏ត្រូវបាន​ប្រជាពលរដ្ឋផ្នែកខាងក្រោម​​ប្រើប្រាស់ជាប្រចាំថ្ងៃផងដែរ ហើយក្នុងនោះ​ក៏ត្រូវគ្រប់គ្រងឲ្យបាន​ប្រសើផ្នែកសន្តិ​សុខសុវត្ថភាព​របស់ភ្ញៀវ បើទោះ​បីការ​លេងទឹក​ក្នុងកម្រឹត​រាក់​ក៏ដោយ ជាពិសេសលើក្មេងៗតូចៗ ត្រូវយកចិត្តទុក​ដាក់ជា​ចម្បង ​និង​ត្រូវមានក្រមសិលធម៌ទៅ​លើភ្ញៀវ ជាពិសេសភ្ញៀវជាជន​បរទេស។

លោក ហម អរុណ អនុប្រធាន​នៃមន្ទីរទេសចរណ៍​ខេត្ត បាន​ឲ្យដឹងថា គ្រប់គោល​ដៅ​តំបន់​រមណីយដ្ឋាន ក្នុង​ខេត្ត លោកតែង​​ធ្វើ​ការណែនាំ​អ្នកគ្រប់គ្រង​ទៅ​លើផ្នែកសេវ៉ាកម្ម​ទទួលភ្ញៀវ ប្រកប​ដោយ​ក្រម​សីលធម៌ រួសរាយ រាក់ទាក់ ដែលជា​ផ្នែកមួយមិនអាចខ្វះបាន ហើយ​ក៏ជាផ្នែក​មួយ​សម្រាប់ឆក់យកកំណើនភ្ញៀវទេសចរផងដែរ។

លោកថា បើសិនជាខ្វះ​នៅផ្នែកទាំងនេះ បើទោះបីតំបន់នោះ​មានទេសភាពល្អប៉ុណ្ណា ហើយម្ហូប​អាហារមាន​រស់ជាតិ​ឆ្ងាញ់ប៉ុណ្ណា ក៏ភ្ញៀវគេមិន​មកលេង​ជាលើក​ទីពីរ​ឡើយ ដែល​កត្តា​នេះ​ក៏ធ្វើឲ្យប៉ះពាល់​មុខមាត់​ខេត្ត​បាត់ដំបងដែរ​។

គួបញ្ជាក់ថា រមណីយដ្ឋាន ស្ទឹកថ្វាក ស្ថិតនៅ​មិនឆ្ងាយ​ពី​ទីប្រជុំជន​ស្រុក​រតនមណ្ឌល​ប៉ុន្មាន​ទេ ដោយគ្រាន់​តែធ្វើដំណើរ​ចេញពីមុខ​សាលាស្រុក​ ប្រ៉ប​តាមផ្សារស្រុក​រតនមណ្ឌល នៅលើផ្លូវកៅ​ស៊ូដែល​ទើបតែចាក់​ក្រាលរួចរាល់ថ្មីៗ ត្រូវចំណាយពេលត្រឹមតែជាង ១៥នាទីប៉ុណ្ណោះ នឹងទៅដល់រមណីយដ្ឋានដែល​គេឲ្យឈ្មោះថា ស្ទឹងថ្វាក ព្រោះនៅតំបន់នេះ​មានវត្តមួយឈ្មោះថា វត្តថ្វាក ហើយ​នៅទល់មុខវត្តនេះ គឺជាដងស្ទឹង​សង្កែដែលបាន​នាំទឹកដ៏ត្រជាក់ថ្លា​ឈ្វេង មក​កាន់​ក្រុងបាត់ដំបង​សម្រាប់ការ​ប្រើប្រាស់​ប្រចាំថ្ងៃ​របស់ប្រជាពលរដ្ឋ ដែលរស់​នៅតាម​បណ្តោយ​ដងស្ទឹងសង្កែ៕

អត្ថបទ៖ សៅ សារិទ្ធ