ព័ត៌មានជាតិ
២០២៤ ក្រសួងការងារ ដាក់កំហិត និង ចេញលិខិតផាកពិន័យសហគ្រាស ជាង ៤០០
នៅក្នុងឆ្នាំ ២០២៤ ក្រសួងការងារ និងបណ្តុះបណ្តាលវិជ្ជាជីវៈ បានដាក់កំហិត និងចេញលិខិតផាកពិន័យសហគ្រាសជាង ៤០០ ដើម្បីឱ្យសហគ្រាសទាំងនោះគោរព និងអនុវត្តទៅតាមច្បាប់ស្តីពីការងារឱ្យបានត្រឹមត្រូវ។
ថ្លែងក្នុងពិធីបិទ “សន្និបាតបូកសរុបលទ្ធផលការងារឆ្នាំ ២០២៤ និងលើកទិសដៅការងារឆ្នាំ ២០២៥ របស់ក្រសួងការងារ និងបណ្តុះបណ្តាលវិជ្ជាជីវៈ កាលពីរសៀលថ្ងៃទី ២៨ កុម្ភៈ នៅវិទ្យាស្ថានជាតិបណ្ដុះបណ្ដាលបច្ចេកទេស លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា ដើម្បីធានានូវការគោរពលក្ខខណ្ឌការងាររបស់សហគ្រាស គ្រឹះស្ថាន ក្រុមអធិការកិច្ចការងារ បានចុះធ្វើអធិការកិច្ចនៅតាមសហគ្រាស គ្រឹះស្ថានដោយផ្ទាល់ និងតាមប្រព័ន្ធស្វ័យប្រវត្តិកម្មចំនួន ១០ ៤៨៤ លើក, ដាក់កំហិតចំនួន ៣០០ សហគ្រាស និង បានចេញលិខិតផាកពិន័យចំនួន ១៣២ សហគ្រាស ដែលប្រការនេះបានជំរុញឱ្យសហគ្រាស គ្រឹះស្ថាន គោរពច្បាប់ស្តីពីការងារកាន់តែច្រើន និងមានអត្រាអនុលោមភាពខ្ពស់។
លោករដ្ឋមន្ត្រី បានបន្តថា ជាមួយគ្នានេះបានរៀបចំក្រុមអធិការកិច្ចអន្តរក្រសួងចំនួន ៧ ក្រុម ដែលមានសមាសភាពមកពីក្រសួងការ ងារ និងបណ្ដុះបណ្ដាលវិជ្ជាជីវៈ, ក្រសួងឧស្សាហកម្ម វិទ្យាសាស្ដ្របច្ចេកវិទ្យា និងនវានុវត្តន៍, ក្រសួងបរិស្ថាន, ក្រសួងទេសចរណ៍, ក្រសួងសុខាភិបាល, ក្រសួងកសិកម្ម រុក្ខាប្រមាញ់ និងនេសាទ និងក្រសួងរៀបចំដែនដី នគរូបនីយកម្ម និងសំណង់ សម្រាប់ចុះអធិការកិច្ចរួមគ្នាតែ ១ ដង/ឆ្នាំ ស្របតាមគោលការណ៍ដែលរាជរដ្ឋាភិបាលបានផ្តល់ឱ្យក្រសួងការងារ និងបណ្តុះបណ្តាលវិជ្ជាជីវៈ ជាស្ថាប័នដឹកនាំ ដោយនៅត្រឹមឆ្នាំ ២០២៤ នេះ ក្រុមអធិការកិច្ចអន្តរក្រសួងបានចាប់ផ្តើមចុះអធិការកិច្ចនៅក្នុងវិស័យកម្មន្តសាល បានចំនួន ១១៨ សហគ្រាស។ បានចុះបញ្ជីសហគ្រាស គ្រឹះស្ថាន បានកើនឡើងពីចំនួន ៤០ ៩៧៥ នៅឆ្នាំ ២០២៣ ដល់ចំនួន ៤៤ ៧៩៨ សហគ្រាស នៅឆ្នាំ ២០២៤ នេះ គឺកើនឡើងចំនួន ៣ ៨២៣ សហគ្រាស ហើយចំនួនកម្មករ-និយោជិត បានកើនឡើងពីចំនួន ១ ៧១៥ ០២៩ នាក់ ដល់ចំនួន ១ ៨១៦ ០៤៦ នាក់ (កើនឡើងចំនួន ១០១ ០១៧ នាក់) ដែលបានផ្តល់ប្រាក់ឈ្នួលមធ្យមសរុបប្រចាំឆ្នាំ ប្រមាណ ៥,៦ ពាន់លានដុល្លារអាមេរិក។
លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា ចាប់ពីថ្ងៃទី ១២ ខែកុម្ភៈ រហូតដល់ថ្ងៃទី ៣១ ខែមីនា ឆ្នាំ ២០២៥ ខាងមុខ ក្រុមអធិការកិច្ចការងារចុះតាមរោងចក្រសហគ្រាសគ្រឹះស្ថានលើវិស័យវាយនភណ្ឌកាត់ដេរស្បែកជើងកាបូប និងផលិតផលធ្វើដំណើរចំនួន ១០១ រោងចក្រ នៅក្នុងរាជធានីភ្នំពេញ និងតាមបណ្តាខេត្តនានា ដើម្បីសាកសួរព័ត៌មានកម្មករ-និយោជិតអំពីការប្រើប្រាស់សេវា ប.ស.ស ក៏ដូចជាការទទួលសេវាពីមន្ទីរពេទ្យជាដៃគូរបស់ ប.ស.ស ដើម្បីកែលម្អការផ្តល់សេវា ប.ស.ស និងការទទួលសេវា ប.ស.ស ឱ្យកាន់តែល្អប្រសើរបន្ថែមទៀត ខណៈបច្ចុប្បន្ន ប.ស.ស មានសមាជិកប្រមាណជាង ២ លាន ៧ សែននាក់ នៅទូទាំងប្រទេស៕
អត្ថបទ ៖ សំអឿន
-
ព័ត៌មានអន្ដរជាតិ១២ ម៉ោង agoអស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ
-
សេដ្ឋកិច្ច២ ថ្ងៃ agoធនាគារ ARDB ចាក់បញ្ចូលទុនលើស្វាយចន្ទី និងដំឡូងមី
-
ព័ត៌មានជាតិ១ សប្តាហ៍ agoរដ្ឋបាលខណ្ឌកំបូល សហការជាមួយក្រុមហ៊ុនមីនេបៀ ប្រើប្រាស់កម្លាំងជាង ៨០០នាក់ សម្អាតអនាម័យនៅតាមដងផ្លូវ
-
កីឡា៣ ថ្ងៃ agoមូលហេតុកីឡាករអាមេរិ Penrose ធ្វើមិនបានល្អជាមួយក្រុមស្នងការខេត្តស្វាយរៀង
-
ព័ត៌មានអន្ដរជាតិ៦ ថ្ងៃ agoអ៊ីរ៉ង់ បើកច្រកចូលរូងភ្នំ ផ្ទុកមីស៊ីលសម្ងាត់របស់ខ្លួនឡើងវិញ ទោះរងការវាយប្រហារយ៉ាងដំណំ
-
ព័ត៌មានអន្ដរជាតិ១ សប្តាហ៍ agoរដ្ឋមន្ត្រីការពារជាតិជប៉ុន បដិសេធការចោទប្រកាន់របស់ចិន អំពីការវិលទៅរកយោធានិយម
-
សេចក្ដីជូនដំណឹង២ ថ្ងៃ agoក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា
-
សេដ្ឋកិច្ច៥ ថ្ងៃ agoតម្លៃប្រេងលក់រាយធ្លាក់ចុះក្រោម ៥០០០ រៀល មួយលីត្រ