នគរបាល​ប៉ុស្តិ៍​ច្បារអំពៅ​ទី២ ឃាត់​ខ្លួនជនសង្ស័យម្នាក់ ជួញដូរ​នូវ​សារធាតុញៀន

ភ្នំពេញ ៖ កម្លាំងនគរបាលប៉ុស្តិ៍ច្បារអំពៅទី២ សហការជាមួយសាលាសង្កាត់ច្បារអំពៅទី០២ ចុះរដ្ឋបាលនៅភូមិដើមចាន់ជាតំបន់ស្មុគស្មាញ ចាប់បានជនសង្ស័យម្នាក់ រក​សុីជួញដូរ​ខុស​ច្បាប់​នូវ​សារធាតុ​ញៀន​មួយកញ្ចប់។

ការឃាត់ខ្លួន​នេះ ធ្វើ​ឡើង​កាលពីវេលាម៉ោង ១០ និង ៣០ នាទីព្រឹកថ្ងៃទី ១២ ខែមីនា ឆ្នាំ២០២៥ នៅចំណុចមុខផ្ទះគ្មានលេខ ផ្លូវលំ ភូមិដើមចាន់១ សង្កាត់ច្បារអំពៅ២ ខណ្ឌច្បារអំពៅ រាជធានីភ្នំពេញ ។

ជនសង្ស័យឈ្មោះ វីធឿន ភេទប្រុស អាយុ៤៣ឆ្នាំ ជនជាតិ​ខ្មែរ មុខរបរមិនពិតប្រាកដ មានទីលំនៅ ភូមិដើមចាន់១ សង្កាត់ច្បារអំពៅ២ ខណ្ឌច្បារអំពៅ រាជធានីភ្នំពេញ។

បើ​តាម​ការ​បញ្ជាក់​ពី​លោក​វរសេនីយ៍ត្រី អ៊ុំ រតនា នាយប៉ុស្តិ៍នគរបាលរដ្ឋបាលច្បារអំពៅទី២ បាន​ប្រាប់​ឱ្យ​ដឹង​ថា នា​ព្រឹក​ថ្ងៃ​ទី១២ ខែមីនា ឆ្នាំ២០២៥នេះ កម្លាំងនគរបាលប៉ុស្តិ៍ច្បារអំពៅ២ សហការ​ជា​មួយ​សាលា​សង្កាត់​បាន​ចុះ​រដ្ឋបាល​នៅ​តាម​តំបន់​ស្មុគស្មាញ នៅភូមិដើមចាន់ នឹង​ស្រាវជ្រាវ​រក​ឃើញ​មាន​ជនសង្ស័យ​ម្នាក់ លួចលាក់ ប្រកបរបរ រកសុី​ជួញដូរ​នូវសារធាតុញៀនខុសច្បាប់ ភ្លាមៗកម្លាំងបានឃាត់ខ្លួនជនសង្ស័យនៅទីតាំងចុះរដ្ឋបបាលខាងលើនេះ បញ្ជូនទៅកាន់ប៉ុស្តិ៍តែម្តង។

ជាក់ស្តែងក្នុងការចុះបង្រ្កាបនេះដែរ​ សមត្ថកិច្ចបានដកហូតបានវត្ថុតាងមួយចំនួនរួមមាន ក្រាមពណ៌សថ្លាចំនួន ០១ កញ្ចប់ថង់ធំល្មម , ទូរសព្ទ០១គ្រឿងម៉ាក Vivo។

បច្ចុប្បន្នជនសង្ស័យខាងលើត្រូវបាន កម្លាំង​ជំនាញ​បាន​ធ្វើ​របាយការណ៍​កសាង​សំណុំ​រឿង បញ្ជូន​ទៅ​កាន់​តុលាការ ដើម្បី​ចាត់​តាម​នីតិវិធីច្បាប់៕

អត្ថបទ ៖ រដ្ឋា