គ្រូភ្នំពេញក្រោន ថា ប៉ះ ព្រះខ័នរាជ​ស្វាយរៀង ស្អែក ទោះចាញ់ ឬ ឈ្នះ អត់ទាន់រកឃើញជើងឯក

លោក Oleg Starynskiy គ្រូ​បង្វឹក​ក្លិប​ ភ្នំពេញក្រោន ហាក់ពុំសូវមានសម្ពាធខ្លាំងឡើយចំពោះការប្រកួតទល់នឹងក្រុម ព្រះខ័នរាជស្វាយរៀង នាថ្ងៃ សៅរ៍ ទី ៥ ខែ​មេសា​ បើ​ទោះ​ជា​​ការប្រកួតដ៏សំខាន់ ដើម្បីប្រជែងតំណែងកំពូលតារាងប្រចាំលីគកំពូល កម្ពុជា ខេមបូឌានព្រីមៀរ​លីគ (Cambodian Premier League) ក៏ដោយ។

លោក Oleg Starynskiy បានលើកឡើងនៅក្នុងសន្និសីទកាសែតនាព្រឹកថ្ងៃ សុក្រ ទី៤ ខែ​មេសានេះថា៖ «នេះគឺជាការប្រកួតមួយ ដែលកៀកហើយនឹងអាចយើងដឹងលទ្ធផល ប៉ុន្តែលទ្ធផលថ្ងៃស្អែកនេះ មិនអាចកំណត់ថា ក្រុមណាជាជើងឯកនៅឡើយទេ។ វាមិនទាន់ប៉ះទង្គិចខ្លាំង ពីព្រោះនៅសល់ ៥ ប្រកួតទៀតសម្រាប់យើង ហើយនៅសល់ ១ ជុំទៀតផងដែរ សម្រាប់ក្រុមលំដាប់កំពូលទាំង ៦ ។ គ្រាន់តែយើងអាចដឹងច្បាស់បន្តិចថា ជុំវិញប្រវត្តិជួបគ្នា ឬគ្រាប់បាល់យ៉ាងម៉េចដែរសម្រាប់ថ្ងៃស្អែក។ យើងអាចដឹងបាន ប៉ុន្តែវាគឺមិនទាន់ចប់ព្រឹត្តិការណ៍ទាំងមូលនៅឡើយទេ។ យើងនៅតែបន្តធ្វើការងាររបស់យើង។ យើងត្រូវតែដឹងច្បាស់ក្នុងចិត្តថា វាគឺនៅសល់ ៥ ប្រកួតទៀតសម្រាប់ការប្រកួតលីគ»។

ជាការពិតណាស់ ការប្រកួតរវាងក្រុមខ្លាំងទាំង ២ ថ្ងៃស្អែក គឺជាការប្រកួតមួយដ៏សំខាន់ ព្រោះការប្រកួតនេះ មិនត្រឹមជាការប្រកួតដណ្តើមយក ៣ ពិន្ទុប៉ុណ្ណោះទេ ប៉ុន្តែវាគឺជាការប្រកួត ដើម្បីដណ្តើមតំណែងកំពូលតារាងផងដែរ។ ព្រះខ័នរាជស្វាយរៀង បច្ចុប្បន្នកំពុងឈរនៅកំពូលតារាង ដោយមាន ៦១ ពិន្ទុ លើសក្រុមលេខ ២ ភ្នំពេញក្រោន ត្រឹមតែ ១ ពិន្ទុប៉ុណ្ណោះ។

ទោះបីជាយ៉ាងណាក៏ដោយ បន្ទាប់ពីការប្រកួតស្អែកនេះ ការប្រកួតប្រចាំ ខេមបូឌានព្រីមៀរ​លីគ គឺនៅសល់ ៥ ប្រកួតទៀត ទើបអាចរកឃើញក្រុមណាមួយ ដែលនឹងក្លាយជាជើងឯកលីគកំពូលកម្ពុជាក្នុងរដូវកាល ២០២៤-២០២៥ ពិតប្រាកដ៕

អត្ថបទ៖ សេម កុសល