របបយោធាមីយ៉ាន់ម៉ាមិន​​ពន្យា​​បទឈប់បាញ់ដែល​អស់សុពលភា​ព​ថ្ងៃនេះទេ​

របបយោធា​មីយ៉ាន់​ម៉ា​​មិនបានពន្យាពេលបទឈប់បាញ់​​ដែល​ផុតសុពលភាព​នៅ​ថ្ងៃទី​​​២២ខែមេសានេះ​ ទោះបីមានការអំពាវនាវពីអន្តរជាតិឲ្យមានការពន្យាពេលបន្ថែមលើ «បទឈប់បាញ់» របស់របបយោធាដែលបានប្រកាសរយៈ២០ថ្ងៃបន្ទាប់ពីការរញ្ជួយដីដ៏សាហាវកាលពីខែមុនក៏ដោយ។ នេះបើយោងតាមការចេញផ្សាយរបស់សារព័ត៌មាន​ CNA នៅថ្ងៃទី២២ខែមេសានេះ។

កាលពីថ្ងៃព្រហស្បតិ៍សប្តាហ៍​មុន ប្រធានរបបយោធា​​មីយ៉ាន់​ម៉ា លោក Min Aung Hlaing បាន​ធ្វើ​ដំណើរ​ទៅទីក្រុងបាងកក ដើម្បីជួបនាយករដ្ឋមន្ត្រីម៉ាឡេស៊ី លោក Anwar Ibrahim សម្រាប់កិច្ចពិភាក្សាដ៏កម្រជាមួយប្រធាននៃប្លុកអាស៊ានទាំង១០។

នៅក្នុងកិច្ចប្រជុំនោះ នាយករដ្ឋមន្ត្រី​ម៉ាឡេស៊ី លោក Anwar ដែលប្រទេស​​របស់​លោក​ បច្ចុប្បន្នជាប្រធាននៃសមាគមប្រជាជាតិអាស៊ីអាគ្នេយ៍ (អាស៊ាន) បាននិយាយថា លោកក៏បាននិយាយទៅកាន់ក្រុមប្រឆាំងរបស់មីយ៉ាន់ម៉ា ដែលបានសន្យាថានឹងមានបទឈប់បាញ់ដូចគ្នាបន្ទាប់ពីការរញ្ជួយ។ លោក Anwar បានប្រាប់អ្នកយកព័ត៌មានបន្ទាប់ពីកិច្ចប្រជុំ​ថា៖«ភាគីទាំងពីរបានព្រមព្រៀងគ្នាពួកគេនឹងធ្វើអ្វីដែលចាំបាច់ ដើម្បីជៀសវាងការបន្តការប្រយុទ្ធគ្នា»។

ទោះយ៉ាងណាមកដល់ថ្ងៃនេះជាថ្ងៃដែលបទឈប់ត្រូវផុតកំណត់ហើយនោះ ប្រព័ន្ធផ្សព្វផ្សាយរដ្ឋមីយ៉ាន់ម៉ា បានរាយការណ៍ថាមិនមានការពន្យារពេលបទឈប់បាញ់នៅព្រឹកថ្ងៃអង្គារនេះទេ ហើយទីភ្នាក់ងារព័ត៌មាន​ AFP ក៏មិនអាចទាក់ទងអ្នកនាំពាក្យរបបយោធាបានភ្លាមៗ ដើម្បីសុំការអត្ថាធិប្បាយបានដែរ។

គួរបញ្ជាក់ថា របបយោធាដែលបានដណ្ដើមអំណាចនៅក្នុងរដ្ឋប្រហារឆ្នាំ ២០២១ បានបង្កឱ្យមានសង្រ្គាមស៊ីវិលជាមួយភាគីជាច្រើនបាននិយាយថា ខ្លួននឹងបញ្ឈប់ការវាយប្រហារលើគូប្រជែងប្រដាប់អាវុធបន្ទាប់ពីការរញ្ជួយដីកម្រិត ៧.៧ រ៉ិចទ័រ រយៈពេល២០ថ្ងៃ ប៉ុន្តែការប្រយុទ្ធគ្នានៅតែបន្តជាបន្តបន្ទាប់ ជាពិសេសការវាយប្រហារតាមអាកាស។ ការបន្តការវាយប្រហារនេះបានធ្វើឲ្យអង្គការសហប្រជាជាតិថ្កោលទោស និងទាមទារឲ្យមានបទឈប់បាញ់ដើម្បីរក្សាសុវត្តិភាពរបស់ក្រុមជំនួយផងដែរ។

យោងតាម​ការ​បញ្ចេញ​​ព័ត៌មាន​ដោយ​របបយោធា​មីយ៉ាន់​ម៉ា​ ចំនួនអ្នកស្លាប់ពីការរញ្ជួយដីកាលពីថ្ងៃទី ២៨ខែមីនាបានកើនឡើងដល់ ៣៧៣៥នាក់ របួស៥១០៨ នាក់និង ១២០ នាក់ទៀតកំពុងបាត់ខ្លួន​នៅឡើយ​ គិតត្រឹមថ្ងៃអាទិត្យ ។ ប៉ុន្តែ​បើ​យោង​តាម Mizzima News បានរាយការណ៍ថា មានអ្នកស្លាប់​រហូត​ដល់​​៥៣៥២នាក់ របួស ៧១០៨នាក់ និងបាត់ខ្លួន ៥៣៨នាក់៕

អត្ថបទ៖ ប៊ុន សុភាព