ឆ្លងចរន្ដអគ្គិសនី ឆេះបន្ទប់ជាន់ទី៣ការិយាល័យក្រុមហ៊ុន សំណង់ ក្នុងបុរី វ៉ារីណា

បន្ទប់ជាន់ទី៣ នៃផ្ទះល្វែងក្នុងបុរី វ៉ារីណា ដែលបើកក្រុមហ៊ុន សំណង់ (ផ្នែកសិក្សាប្លង់) ត្រូវបានអណ្ដាតភ្លើងឆាបឆេះយ៉ាងសន្ធោសន្ធៅខូចខាតសម្ភារមួយចំនួនធំ ខណៈសមត្ថកិច្ចអះអាងថា បណ្ដាលមកពីឆ្លងចរន្ដអគ្គិសនី។

ករណីឆេះផ្ទះនេះបានកើតឡើងកាលពីវេលាម៉ោង២និង៤០នាទីរសៀល ថ្ងៃទី៥ ខែឧសភា ឆ្នាំ២០២៥ នៅចំណុចបុរី វ៉ារីណា តាមបណ្តោយផ្លូវបេតុង ក្នុងសង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ។

តាមការបញ្ជាក់ពីពលរដ្ឋបានអោយដឹងថា មុនពេលកើតមានអណ្តាតភ្លើងឆេះនៅបន្ទប់ជាន់ទី៣ នៃផ្ទះល្វែងខាងលើនេះ គេបានឮមានសម្លេងផ្ទុះ និងមានការស្រែកឆោឡោ លុះមួយសន្ទុះក្រោយមកក៏កើតមានភ្លើងឆាបឆេះយ៉ាងសន្ធោសន្ធៅបាត់ទៅហើយ។ ភ្លាមៗ បង្កឲ្យមានការភ្ញាក់ផ្អើលដល់ប្រជាពលរដ្ឋនៅក្បែរខាង នាំគ្នាទាក់ទងទៅរថយន្តពន្លត់អគ្គិភ័យ មកជួយអន្តរាគមន៍ដើម្បីការពាររាលដាលកាន់តែខ្លាំងឡើង។

ករណីនេះ​ បានបណ្ដាលអោយខូចខាតសម្ភាររួមមាន កុំព្យូទ័រជាច្រើនគ្រឿង តុ ទូ កៅអី ខូចខាតស្ទើរទាំងស្រុង និងបានប្រើប្រាស់រថយន្តពន្លត់អគ្គិភ័យរបស់ស្នងការដ្ឋាននគរបាលរាជធានីភ្នំពេញចំនួន៣គ្រឿង បាញ់អោយរលត់ជាស្ថាពរ។ ចំពោះមូលហេតុ សមត្ថកិច្ចបានស្រាវជ្រាវរកឃើញថា បណ្តាលមកពីឆ្លងចរន្តអគ្គិសនី៕

អត្ថបទ៖ រដ្ឋា