គម្រោងកែលម្អផ្លូវខេត្តលេខ ២៧៩ ជា​ផ្លូវ​កៅស៊ូ​ប្រវែង​ជាង ៥ ០០០ ម៉ែត្រ នៅឃុំជ្រោយបន្ទាយ សម្រេច​បាន​ជាង ១៣%

គិតត្រឹមខែឧសភា ឆ្នាំ២០២៥ ផ្លូវលំក្រាលគ្រួសក្រហម ១ ខ្សែ ប្រវែងជាង ៥ ០០០ ម៉ែត្រ នៅក្នុងឃុំជ្រោយបន្ទាយ ស្រុកព្រែកប្រសព្វ ខេត្តក្រចេះ បាននឹងកំពុងស្ថាបនាជួសជុលសម្រេចបានប្រមាណជាង ១៣% នៃផែនការគម្រោងទាំងមូល។ នេះយោងតាមបញ្ជីគម្រោងហេដ្ឋារចនាសម្ពន្ធ័ផ្លូវថ្នល់ ស្ពាន ដែលត្រូវថែទាំ និងជួសជុលសម្រាប់ឆ្នាំ២០១៦~២០២៥ ខេត្តក្រចេះ។

តាមការឲ្យដឹងពីលោក ប៉ិច ងន់ស្រ៉ឺ មេឃុំជ្រោយបន្ទាយបានឲ្យដឹងថា នៅឆ្នាំ២០២៥ ឃុំទទួលបានគម្រោងជួសជុលកែល្អផ្លូវ ១ ខ្សែ ប្រវែងជាង ៥ ០០០ ម៉ែត្រ បន្ថែមទៀត ដោយកាលពីនៅឆ្នាំ២០២៤ ឃុំបានទទួលគម្រោងផ្លូវ ១ ខ្សែ ប្រវែង ៣ ០០០ ម៉ែត្ររួចមកហើយ ដើម្បីប្រែក្លាយផ្លូវ ១ ខ្សែនេះ ទៅជាផ្លូវខេត្តលេខ ២៧៩ តភ្ជាប់​រវាងឃុំសោប និងជ្រោយបន្ទាយ ស្ថិតក្នុងស្រុកព្រែកប្រសព្វ។

លោក ប៉ិច ងន់ស្រ៊ឺ បានឲ្យដឹងបន្តថា គម្រោងកែលម្អការ​តភ្ជាប់បណ្ដាញផ្លូវថ្នល់ពីផ្លូវក្រាលគ្រួសក្រហម ទៅជាផ្លូវក្រាលកៅស៊ូ ដែលមានប្រវែងជាង ៥ ០០០ ម៉ែត្រ និងទទឹង ៨ ម៉ែត្រ បានចាប់ផ្ដើមនាដើមខែកុម្ភៈ ឆ្នាំ២០២៥ កន្លងទៅ ដែលជាគម្រោងរបស់ថ្នាក់ជាតិ និងអនុវត្តស្ថាបនាកសាងដោយ កងវិស្វកម្ម សម្ដេច ជាស៊ីម។

យោងតាមខ្លឹមសារក្នុងរបាយការណ៍ដដែល បានបញ្ជាក់ថា ការងារស្ថាបនាផ្លូវខេត្តលេខ ២៧៩ ដោយក្រាលកៅស៊ូ DBST ប្រវែង ៥ ២២០ ម៉ែត្រ ទទឹង ៧ ម៉ែត្រ និងដីល្បាយថ្មចិញ្ចើម ទទឹង ១ម៉ែត្រ សង់ខាង ដោយគិតចាប់ពីបង្គោលគីឡូម៉ែត្រ ១១៦+៤២៥ ដល់បង្គោលគីឡូម៉ែត្រ ១១៧+៥៧០ និងចាប់ពីបង្គោលគីឡូម៉ែត្រ ១២៥+៤០០ ដល់បង្គោលគីឡូម៉ែត្រ ១២៩+៤៧៥៕

អត្ថបទ៖ ប្រុញ វិធិន