សេដ្ឋកិច្ចជប៉ុនធ្លាក់ចុះច្រើនជាងការរំពឹងទុក ខណៈពន្ធ ត្រាំ បន្ថែមសម្ពាធ

​​សេដ្ឋកិច្ចរបស់ប្រទេសជប៉ុនបានធ្លាក់ចុះច្រើនជាងការរំពឹងទុក​នៅតីមាសទី១ដើមឆ្នាំនេះ ដែលបង្ហាញពីភាពផុយស្រួយនៃការស្ទុះងើបឡើងវិញ​ក្រោយវិបត្តិកូវីដ១៩ ចំពេលគោលនយោបាយពន្ធគយរបស់ប្រធានាធិបតីអាមេរិក ដូណាល់ ត្រាំ កំពុងបន្ថែមសម្ពាធ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

ទិន្នន័យបឋមពីរដ្ឋាភិបាលជប៉ុន ដែលចេញផ្សាយនៅថ្ងៃសុក្រនេះ បាន​បង្ហាញថា ​ផលិតផលក្នុងស្រុកសរុប​ (GDP) របស់ជប៉ុន បាន​ធ្លាក់ចុះ ០,៧ ភាគរយ ក្នុងអត្រាប្រចាំឆ្នាំ នៅត្រីមាសចន្លោះពីខែមករា ដល់ខែមីនា ​​ពោលគឺច្រើនជាងការធ្លាក់ចុះ ០,២ ភាគរយ ដែលគេរំពឹងទុក ក៏ដូចជាធៀបនឹងនឹងកំណើន ២,៤ ភាគរយ នៅ​ត្រីមាសទី៤ ចុងឆ្នាំមុន​។ ​

ការធ្លាក់ចុះនេះ គឺដោយសារតែការនៅទ្រឹងនៃការប្រើប្រាស់ឯកជន​ និងការធ្លាក់ចុះនៃការនាំចេញ ដែលវាបង្ហាញថា សេដ្ឋកិច្ចជប៉ុនរងផលប៉ះពាល់ដោយ​កម្សោយតម្រូវការពីក្រៅប្រទេស តាំងពីមុនលោក ត្រាំ ប្រកាសពន្ធគយបដិការនៅដើមខែមេសា មកម្ល៉េះ។ ​

សេដ្ឋវិទូប្រតិបត្តិជាន់ខ្ពស់នៅវិទ្យាស្ថានស្រាវជ្រាវ Dai-ichi Life លោក Yoshiki Shinke បាននិយាយយ៉ាងដូច្នេះថា៖ «សេដ្ឋកិច្ច​ជប៉ុន ខ្វះកត្តាជំរុញកំណើនដោយសារភាពទន់ខ្សោយក្នុងការនាំចេញ និងការប្រើប្រាស់»។

ការ​ប្រើ​ប្រាស់​ឯកជន ​ដែល​រួមចំណែកជាង ៥០ ភាគរយ នៃទិន្នផល​សេដ្ឋកិច្ច​​​ជប៉ុន​ គឺ​​នៅថេរ​ក្នុង​ត្រីមាស​ទី១ ខណៈ​ការ​ចំណាយ​មូលធន​ បាន​កើន​ឡើង ១,៤ ភាគរយ​។ យ៉ាងណាមិញ ការនាំចេញបានធ្លាក់ចុះ ០,៦ ភាគរយ​ ដែលជំរុញដល់ការធ្លាក់ចុះនៃសេដ្ឋកិច្ច ចំពេលដែលការនាំចូលកើនឡើងឡើង ២,៩ ភាគរយ។ ផ្ទុយទៅវិញ តម្រូវការក្នុងស្រុកបាន​កើនឡើង ០,៧ ភាគរយ។ ​

​ទិន្នន័យនេះ បានគូសបញ្ជាក់ពីបញ្ហាប្រឈមដែលអ្នកបង្កើតគោលនយោបាយជប៉ុនប្រឈមមុខនៅពេល​ពន្ធគយរបស់សហរដ្ឋអាមេរិក បង្កការរំពឹងទុកពីផលប៉ះពាល់លើការនាំចេញ ជាពិសេសវិស័យរថយន្តរបស់ប្រទេសនេះ​៕