បវរកញ្ញាវៀតណាម​ Thuy Tien​ ​ត្រូវ​ចាប់ខ្លួន​ ក្នុងសំណុំរឿងផ្សាយផលិតផលក្លែងបន្លំ​

​សារ​ព័ត៌មា​ន​វៀតណាមបាន​ចុះ​ផ្សាយថា កាលពីថ្ងៃទី ១៩ខែឧសភា ឆ្នាំ២០២៥ នាយកដ្ឋានប៉ូលិសស៊ើបអង្កេត-ក្រសួងសន្តិសុខសាធារណៈវៀតណាម បានចេញដីកាចាប់ខ្លួន​បវរកញ្ញា Nguyen Thuc Thuy Tien អាយុ ២៧ឆ្នាំ ពីបទ​បោ​កប្រាស់​អ្នកប្រើប្រាស់​​ ដូចមានចែងក្នុងប្រការ២ មាត្រា១៩៨ នៃក្រមព្រហ្មទណ្ឌ ក្នុងនាមជាអ្នកសមគំនិតជាមួយក្រុមហ៊ុនដែលជាចុងចោទ។

នេះក៏​ជា​លទ្ធផល​នៃ​ការ​ស៊ើបអង្កេត​បន្ថែម​ ករណីដែលរូបនាងបានធ្វើ​ការ​អះអាង​ផ្សាយ​ពាណិជ្ជកម្ម​មិន​ពិត ​អំពី​ផលិត​ផល​​ស្ករ​គ្រាប់បន្លែ «Kera» ដែល​ជាប់​ពាក់ព័ន្ធ​នឹង​ករណី​​ការ​ផលិត​អាហារ​ក្លែងក្លាយ និង​ការ​ក្លែង​បន្លំ​អ្នក​ប្រើប្រាស់​ដោយក្រុមហ៊ុន Asia Life JSC និង​ក្រុមហ៊ុន Chi Em Rot Group JSC។

ទោះជាយ៉ាងណាក៏ដោយ ដំណឹង​នៃ​ការ​ចាប់​ខ្លួនអតីតម្ចាស់មកុដ MGI 2021 មិន​ត្រឹម​តែ​ធ្វើ​ឲ្យ​បណ្ដាញ​សង្គម​នៅ​វៀតណាម​​ ភ្ញាក់ផ្អើលប៉ុណ្ណោះ​ទេ ថែម​ទាំង​ប្រព័ន្ធ​ផ្សព្វផ្សាយ​អន្តរជាតិ​ជាច្រើនផ្សព្វផ្សាយអំពីឈ្មោះរបស់​នាង​យ៉ាង​គគ្រឹក​គគ្រេង​ថែមទៀត។ គេហទំព័រព័ត៌មានសំខាន់ៗ និងវេទិកាសម្រស់ក្នុងប្រទេសថៃ ឥណ្ឌូណេស៊ី បានធ្វើបច្ចុប្បន្នភាពរូបភាពរបស់កញ្ញា Thuy Tien ដែលរូបនាងបានបង្ហាញខ្លួននៅទីភ្នាក់ងារស៊ើបអង្កេត រួមជាមួយនឹងការដកស្រង់អំពីបញ្ហាផ្លូវច្បាប់របស់រាជិនីសម្រស់។

ការរាយការណ៍ដំណាលគ្នារបស់ប្រព័ន្ធផ្សព្វផ្សាយអន្តរជាតិអំពីឧប្បត្តិហេតុដែលពាក់ព័ន្ធនឹងបវរកញ្ញាឯក Thuy Tien បានបង្ហាញយ៉ាងច្បាស់ពីឥទ្ធិពលពិសេសរបស់រាជនីសម្រស់នៅអាស៊ីអាគ្នេយ៍ ជាពិសេសប្រទេសថៃ ដែលនាងបានគ្រងមកុដ Miss Grand International 2021។

ចាប់តាំងពីខែធ្នូ ឆ្នាំ ២០២៤ មក បវរកញ្ញាឯក រួមជាមួយនឹងអ្នកមានឥទ្ធិពលផ្សេងទៀតដូចជា Hang Du Mục និង Quang Linh Vlogs បានចូលរួមផ្សព្វផ្សាយស្ករគ្រាប់ Kera នៅលើប្រព័ន្ធផ្សព្វផ្សាយសង្គម ដោយប្រើពាក្យមិនពិតដូចជា «ស្ករគ្រាប់មួយគ្រប់ជំនួសបន្លែមួយចាន»​ជាដើម​។ អ្នកស៊ើបអង្កេតបានរកឃើញថា ផលិតផលនេះមានសារជាតិសរសៃ​ទាបបំផុត ហើយមិនផ្តល់អត្ថប្រយោជន៍ដូចដែលបានផ្សព្វផ្សាយនោះទេ។

ក្រោយមក នាល្ងាចថ្ងៃទី៤ ខែមេសា ឆ្នាំ២០២៥ ប៉ូលិសខេត្ត Dak Lak បានចេញសេចក្តីសម្រេចផ្អាកការចាកចេញទៅក្រៅប្រទេសជាបណ្តោះអាសន្ន ពោលគឺចាប់ពីថ្ងៃទី ១៥ ខែមីនា ឆ្នាំ ២០២៥ ដល់ថ្ងៃទី ១៥ ខែឧសភា ឆ្នាំ ២០២៥ ដើម្បីផល​ប្រយោជន៍​ដល់​ការផ្ទៀងផ្ទាត់ និងស៊ើបអង្កេតបន្ថែម។

ក្រៅ​ពីនាង Thuy Tien បុគ្គល​មួយ​ចំនួន​ផ្សេង​ទៀត រួម​ទាំង​នាយក​ប្រតិបត្តិ​នៃ​ក្រុមហ៊ុន​ទាំង​ពីរ​ដែល​ពាក់ព័ន្ធ ក៏​ត្រូវ​បាន​ចោទ​ប្រកាន់ និង​ឃុំ​ខ្លួន​បណ្ដោះ​អាសន្ន​ផង​ដែរ។ ការស៊ើបអង្កេតកំពុងបន្តដើម្បីបញ្ជាក់អំពីទំហំពេញលេញនៃការរំលោភបំពាន។

មិនតែប៉ុណ្ណោះ ទីភ្នាក់ងារស៊ើបអង្កេតបានកំណត់ថា Thuy Tien គឺជាម្ចាស់ភាគហ៊ុនដែលរួមចំណែក ៣០% នៃដើមទុននៅក្នុងផលិតផលនេះ ហើយទទួលបានប្រាក់ជិត៧ពាន់លានដុងនៅក្នុងកម្រៃជើងសារ។ ទោះបីជានាងដឹងថា ជាតិសរសៃនៅក្នុងផលិតផលមានកម្រិតទាបខ្លាំង ហើយមិនដំណើរការដូចការផ្សាយពាណិជ្ជកម្មក៏ដោយ ក៏នាង និងសហការីនៅតែផ្តល់ព័ត៌មានមិនពិតដើម្បីបញ្ឆោតអ្នកប្រើប្រាស់។ បន្ទាប់ពីមានភាពចម្រូងចម្រាសនៅក្នុងមតិសាធារណៈ Thuy Tien បានស្នើឲ្យចុះហត្ថលេខាលើកិច្ចសន្យាមួយដើម្បីធ្វើឲ្យការផ្សាយពាណិជ្ជកម្មស្របច្បាប់ ដើម្បីចៀសវាងការចាត់ទុកថាជាម្ចាស់ភាគហ៊ុន។

រម្លឹកទៅកាលឆ្នាំ ២០២១ ក៏ជាចំណុចរបត់ដ៏សំខាន់មួយក្នុងអាជីពរបស់របស់ Thuy Tien នៅពេលដែលនាងបានក្លាយជាជនជាតិវៀតណាមដំបូងគេ ដែលបានគ្រងមកុដ Miss Grand International ។ ជ័យ​ជម្នះ​នេះ ​ជួយ​នាងក្លាយ​ជា​មុខ​មាត់​ដ៏​លេចធ្លោ​មួយ​នៅ​ក្នុង​ប្រព័ន្ធ​ផ្សព្វផ្សាយ និង​សាធារណជន​វៀតណាម។

លើសពីនេះទៅទៀត ប្រព័ន្ធ​ផ្សព្វផ្សាយ​អន្តរជាតិបានចុះផ្សាយអំពីឈ្មោះ Thuy Tien កាន់តែមានភាពល្បីល្បាញយ៉ាងខ្លាំង ដោយទទួលបានកិច្ចសន្យាផ្សាយពាណិជ្ជកម្មជាច្រើន និងចូលរួមក្នុងព្រឹត្តិការណ៍ធំតូចទាំងក្នុង និងក្រៅប្រទេស។ យោងតាមប្រធាន MGI លោក Nawat ក្នុងឆ្នាំ ២០២២ ធ្លាបបាននិយាយថា នាងអាចរកចំណូលបានពី២ទៅ ៣ លានដុល្លារអាមេរិក ដោយសារសកម្មភាពផ្សាយពាណិជ្ជកម្ម និងជាទូតសុឆន្ទៈឲ្យយីហោធំៗជាច្រើនផងដែរ៕

អត្ថបទ៖ សាង ស្រីល័ក្ខ

ចុចអាន៖ក្រោយផ្ទុះរឿង​អាស្រូវ​ផ្សាយ​ផលិត​ផល​​គ្មានគុណភាព​ និង​ហាមចេញ​ក្រៅ​ប្រទេស​ ពេលនេះកញ្ញា​ឯក​វៀតណាម​ Thuy Tien ត្រូវគេតាម​ប្រមាញ់​